Sfuei Mensîl Furlan Indipendent
Archivi de Patrie

«La lenghe furlane e va doprade par slargjâ la vision dal teritori»

Dree Venier

Ancje cheste interviste de serie di chês ai sindics che a fasin part de ACLiF- Assemblee de Comunitât Linguistiche Furlane o ai di fâle telefoniche, ancje se mi sarès plasût cjatâmi cul sindic di persone, magari intune ostarie intal centri dal so biel paîs. O fevelìn di Spilimberc, innomenât come puest just dulà cjatâ un bon tai, e il sindic al è Enrico Sarcinelli. Stant che tai messazuts par metisi dacuardi pe interviste mi rispuindeve plui par talian, i domandi se la interviste al à miôr di fâle par furlan o talian. «Mah… forsit miôr par talian, ancje se jo o feveli furlan». E cussì, dopo di cheste frase… le vin fate dute par furlan.
__
Cuant sêso jentrâts inte ACLiF, e parcè?
O sin jentrâts cu la votazion in Consei comunâl ae fin di Març. Il Comun nol è jentrât prime par vie de proteste cuintri de riforme dai Ents locâi cu la costituzion des Uti. Jo però o cjalavi la sô ativitât “di lontan” za intant che o jeri assessôr ae istruzion te Zonte di prime, e cuant che o soi deventât sindic o ai volût jentrâ parcè che secont me nus pues judâ par tantis robis che o vin voie di fâ e che o fasìn za pe tutele e promozion linguistiche e culturâl.
__
A chest proposit, la ACLiF e à inviât un cors pe formazion su storie e culture dal Friûl.
Covential? Lui e i siei coleghis sêso preparâts sul Friûl?
O feveli par me: jo no soi masse preparât su la storie dal Friûl. O viôt ancje tancj zovins aministradôrs che no san tant. Di là di cualchidun di nô che al è apassionât, no je grande cussience. Bisugnarès savêle di fonde, no dome se sburtâts de passion, e duncje un cors cussì al è dal sigûr util.
__
Lui le viôt plui tant che un organisim cun obietîfs culturâi, ma no puedie meti dongje i sindics par altris cuistions, ancje economichis? E podaressie vê il rûl di sistemâ i ecuilibris che cumò a somein lâ a pro di Triest?
No mi somee che e puedi fâ il lavôr di meti dongje i comuns, che a àn sì bisugne di lavorâ insiemi par condividi servizis, ma cun numars plui piçui. O pensi al bon lavôr che o vin fat cu la comunitât montane di chenti. Par chel che al tocje Triest, jo no viôt chest sbelançament, se no par vie di une situazion contingjente. Cumò si sburte la citât come puart in vision logjistiche, e duncje al è clâr che plui bêçs a van li. Dopo, che i triestins a sedin brâfs a domandâ, chel al è simpri stât, ma i sta. Jo o marcarès di plui invezit la autocritiche che o vin di fâ: o vin di fâ miôr tal tirâsi dongje par domandâ robis che nus coventin par svilupâsi. Par me, nus mancje soredut chel.
__
La crisi post pandemie puedie jessi ancje une ocasion?
No dome e pues jessi une ocasion, ma e à di jessi une ocasion, se no o stin ca dome a vaîsi intor. Il gno pinsîr al è che Friûl al à di svilupâsi dal pont di viste de logjistiche: o vin di fâ di crosere jenfri Est e Ovest, tra il Nord e il mâr, e fâlu frutâ di un pont di viste economic. Seconde robe: digjitalizazion serie pai paîs piçui e pe mont, par vê un teritori ecuilibrât dal pont di viste de oportunitâts.
__
O ai viodût che il sît dal Comun al à une version furlane, ancje se parziâl. Vêso intenzion di adotâ il Plan speciâl di politiche linguistiche (PSPL)? Lu cognossial?
O sai che che al è, ma tal specific mi cjatais al moment impreparât: disìn che o soi in fase di studi. O vin tacât a fevelâ di PSPL di resint parcè che nus è rivât alc su la cuistion, ma intant e je daûr a viodi di chest la assessore ae culture Ester Filippuzzi.
__
Come ex assessôr ae istruzion i domandi se lui al è dacuardi che la lenghe furlane e sedi insegnade a scuele.
La lenghe e à di jessi insegnade, soredut par che e sedi veicul pe culture e tradizion locâl, par mostrâ la apartignince a un teritori, par interiorizâlu. Chest sedi che i fantats a sedin di origjin furlane o no. O vin di superâ ancje chest aspiet: la lenghe furlane e covente par slargjâ la vision di un teritori. E doprâle ancje par un esercizi di comparazion: confrontâle cun altris lenghis par capîle miôr e par capî chês altris.
__
Spilimberc al è une fuartece de lenghe furlane inte provincie di Pordenon, che cualchidun al volarès logâle fûr dal Friûl. Ce sintial cuant che a disin che il Friûl al è dome la provincie di Udin?
Nô o sin furlans ad implen, e nol è nancje ce discori. Se a dîlu a son chei de provincie di Udin, mi displâs parcè che a son lis solitis “barufis di paîs” (mi ven di clamâlis cussì) pe sieradure mentâl de int, mintri che invezit il furlan, cun dutis lis sôs varietâts al varès di jessi element di viertidure e di comunitât. Se a dîlu a son chei bande Pordenon che nus volaressin gjavâ dal Friûl, mi ven dome di ridi: la provincie di Pordenon e je Friûl e vonde.
__
Par finî, mi disial cualchi particolaritât di Spilimberc?
No je une robe gnove, ma o ai voie di fevelâ dai nestris “bacari”. Nol è un tiermin furlan e nancje la sô origjin: a jerin rivenditis, massime di vueli, e cun dongje distribuzion di vin. Mi plâs fevelâ di bacari parcè che, cun chest ategjament di acet si marche il rûl che al à vût e che al à Spilimberc, di incuintri, di cumierç, di riferiment par dute la zone dulintor e ancje pe regjon. ❚
………………………………………………………………………………………………………
FOCUS Spilimberc, un passât di splendôr e la bielece dai mosaics di cumò
Spilimberc al cjape non dai conts carinzians Spengenberg che chi si àn instalât tor dal XI sec.
Il prin document che al ripuarte il non dal castrum di Spengenberg al è dal 1120 ma la storie dal sît e je ben plui antighe, logât cemût che al jere in prossimitât de strade romane che, traviers il Tiliment, al zontave Sacîl a Glemone e duncje ae Gjermanie.
◆ La citât, inte ete di mieç, al è stât un centri impuartant di passaç e di cumierçs. Intal 1420 sicu dute la Patrie dal Friûl, al à passât sot dal domini de Serenissime lant daûr aes sô sortis cun plui e mancul fortune. Intal XV e XVI sec. Spilimberc al à cognossût il so splendôr massim: a operarin diviers artiscj di valôr. Tra i leterâts si visin Gian Domeni Cancianini, Eusebi Stele e Bernadino Parteni. Cul tratât di Cjampfuarmit dal 1797 Spilimberc al à passât ae Austrie e intal 1866 la Regjon e je stade anetude al Ream di Italie.
◆ Intal 1922, par interessament dal Comun e de Societât Umanitarie di Milan, e vignì fondade la Scuele di mosaic: i siei arlêfs, sparniçâts in dut il mont, a gjoldin di meretade innomine. ❚
……………………………………………………………………………………………………….
Ce che al è il Plan speciâl di politiche linguistiche (PSPL)
La LR. 29/2007 «Normis pe tutele, valorizazion e promozion de lenghe furlane», e previôt che «la Regjon, i ents locâi e i concessionaris di servizis publics a fasin bon ogni cinc agns, un Plan speciâl di politiche linguistiche par fissâ i obietîfs di rivâ a vê an par an in ogni aree di intervent». Il plan in vore cumò al è chel 2018-2022, e al previôt une schirie di “buinis pratichis” pal plen disvilup dal ûs de lenghe furlane te vite di ogni dì, ancje intai rapuarts cui ents publics.
◆ Il Comun di Tresesin al è stât il prin in regjon, intal 2018, a indotâsi dal PSPL ❚
……………………………………………………………………………………………………….
Cui che al è il sindic di Spilimberc
Enrico Sarcinelli, 42 agns (19.6.1978), di Spilimberc, dopo de Maturitât classiche al Liceu «Stellini» di Udin si è laureât in Jurisprudence te Universitât di Bologne. Di profession al è avocat.
◆ Dal 2003 al 2008 al è stât conseîr comunâl di minorance cun A.N.; dal 2008 al 2018 assessôr cul sindic Renzo Francesconi (e dal 2013 al 2018 ancje vicesindic). Al è Sindic dal 2018.
◆ Om di grande passion sportive, al à zuiât di balon par tancj agns cul US Barbean intai campionâts diletants. ❚
Dree Venier

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +