«O fâs l’ort par butâ jù mûrs» | Il profîl | La barburice e la pazience

Di Londre a Ruvigne: Maria Teresa Bortoluzzi, cjâf e cûr di OrtoBorto, esperience di comunitât, par coltivâ intal rispiet de tiere
De viste sul Tamigi, dal so ufici cun teraçon in face dal flum a Londre, a chê sul Tiliment, dai cuei di S. Jacum, cûr di Ruvigne, lûcs di bielece cidine, di pâs e maravee. Li e à volût tornâ, dopo tancj agns di lavôr lontane dal Friûl, Maria Teresa Bortoluzzi, e li al è nassût l’OrtoBorto, un ort di comunitât, viert a ducj, parcè che l’ort «al è democratic, gjenerôs e universâl: patatis e pomodoros no vegnin miôr o piês a seconde di dulà che tu rivis o des tôs abilitâts, a vegnin ben se tu âs rispiet de tiere e dal ambient». Maria Teresa e fevele cun passion e agrât de “creature” che e à inviât cul jutori di famee e amîs, li che «o coltivìn ortaiis par butâ jù mûrs».
◆ Classe 1973, dopo de lauree in Storie, Maria Teresa e jentre intal mont de editorie. Lis primis esperiencis a son a Milan, prime intune aziende che e cree contignûts web e po pal grup RCS e par Il Sole 24 Ore li che si è ocupade di redazion e di progjetazion editoriâl. Al è il 2004 cuant che e decît di cambiâ aiar. La mete e je Londre. «No savevi ce che o varès fat e il gno inglês al jere misar – e ricuarde –. O ai tacât a lavorâ par bancjis gruessis corezint i stampons par talian di prospets ilustratîfs di fonts di invistiment. Po, o ai insegnât il talian a fruts e grancj, ancje a polizais e aministratîfs di Scotland Yard, fin che, paronant aromai ben l’inglês, o ai cjatât lavôr tal setôr de editorie scolastiche tant che redatore e progjetiste editoriâl par Pearson, Harper Collins e Hachette UK». Di foreste, pardabon une biele sodisfazion par Maria Teresa, che intant e madurìs la decision di tornâ a S. Jacum. «O jeri contente dal gno lavôr, o vivevi intun cuartîr bielissim, ma o sintivi che chê esperience e jere finide. A passe 40 agns, o vevi gole di esplorâ altris stradis e di fâlu a cjase mê».
◆ Ae fin dal 2016 Maria Teresa e vierç un gnûf cjapitul de sô vite. Di volontarie de Caritas, e insegne talian ai richiedents asîl, cualchidun al tache a frecuentâ l’ort di famee. Un in particolâr, Waiz, si afezione al pont di deventâ soci dal OrtoBorto, che al tache a cjapâ forme.
«Sul imprin no mi cjapavin masse sul seri, plui di cualchidun al diseve cun ironie che o jeri une citadine», e ricuarde, riduçant, Maria Teresa. «Insiemi a mê mari Caterina e a mê sûr Laura si sin domandadis cemût doprâ al miôr dut ce che gno pari Loris, che al jere mancjât cualchi an prime, nus veve lassât: cjase, tiere, machinaris agricui e imprescj. I miei gjenitôrs a àn simpri viert lis puartis a ducj inte nestre cjase di vie Petris. O vin decidût di puartâ indenant chel spirt e di fâlu intun moment li che il “diferent” al faseve za une vore di pôre. E cussì, coinvolzint un pâr di amîs, e je nassude la idee di fâ dal spazi che o vevin a disposizion un ort condividût, un lûc di incuintri, di socialitât, di integrazion, dulà contrastâ l’isolament e promovi la diversitât come risorse, in sinergjie cul teritori e cul ambient». Ae fin dal 2017, e nas la Associazion di promozion sociâl OrtoBorto (che inte denominazion e cjape il cognon de famee). L’ort de tradizion rurâl furlane al devente identitât che e da acet a ducj – abii e disabii, fruts, vecjos, forescj –, ognidun cu lis sôs capacitâts, e al distribuìs, a cui che lu lavore, lis ortaiis, ma massime benstâ e relazions, un patrimoni cetant preziôs.
◆ «La matine dal lunis al vinars intai orts di OrtoBorto cuatri zovins cun disabilitât, vuidâts di un nestri educadôr cualificât e di un o plui volontaris esperts in orticulture, a viodin dai orts, de sidrere e des dôs mussis che o vin, e a partecipin a dutis lis iniziativis di OrtoBorto: dai marcjaduts aes cjaminadis, al scambi di semencis. Un percors, chest, che al viôt une biele colaborazion cu la Aziende pe assistence sanitarie n. 3. Di chest an o vin tacât a produsi plantutis ancje intune sidrere li de Onlus “Il Samaritan”  di Ruvigne, struture residenziâl par personis cun disabilitât, e o vin realizât, ancje cu la poie de Fondazione Friuli, un gnûf ort li de Associazion “Amici dell’Hospitale” di S. Tomâs di Maian pes plantis oficinâls e aromatichis, che o vin a pene tacât a comercializâ intai marcjâts locâi. E po, pai plui piçui o inmaneìn laboratoris pratics di orticulture e di promozion de cure e dal rispiet dal ambient, simpri cuntune grande  partecipazion». Cuant che i fruts no van intal ort, al è l’OrtoBorto che ur va incuintri diretementri a scuele! Tant che a son za nassûts doi orts: un inte scuele primarie di Ruvigne e un ta chê di S. Denêl. E cul Istât «a saran inviâts laboratoris gratuits par mularie dai 11 ai 17 agns su la mont di Ruvigne, intal bosc di un dai nestris socis, cun viodude sul Tiliment, par scuvierzi la nature locâl e la impuartance de sô conservazion e valorizazion».
◆ In mancul di 4 agns, l’OrtoBorto al è cressût e al semenât tant, no dome plantutis. Si son dâts dongje amîs e cognossints, che lu sostegnin in plui formis, e altris, massime zovins, si stan svicinant: «Cumò o sin 55 socis, pal plui dal dulintor, ma no dome». E je Maria, 82 agns, di Ruvigne, che e puarte la semence dal so pevaroncin: cressût e secjât, cun chel si fasin lis confezions regâl a Nadâl. Al è Simone, che al à 21 agns e al ven di Buie: une matine par setemane al va al OrtoBorto a dâ une man e al è une vore babio cui fantats disabii. E po, Lucilla, di Forgjarie, che e rive cu lis sôs taleis di mente e di fasûi, parcè che al OrtoBorto si condivît dut: ancje lis plantutis e lis semencis, tant che si faseve une volte. «Si din il diplui, no stracìn nuie e si judìn – e dîs Maria Teresa –. Intai nestris orts o coltivìn dome robe nostrane, o promovìn metodis di coltivazion biologjiche, sostignibile e conservative, parcè che o pensìn che al sedi nestri dovê rispietâ la tiere e lassâle a nestris fîs e nevôts miôr di cemût che le vin cjatade».
◆ Cui che al à voie di dâ une man, l’OrtoBorto (www.ortoborto.org) al è viert ogni dì, dal lunis al vinars, des 8.30 aes 12.30. Maria Teresa us darà acet cuntune bocje di ridi. «Al OrtoBorto lis nestris storiis personâls, lis nestris dificoltâts no nus definissin, ma nus insiorin. Ducj. Savê che chel che tu fasis al da confuart e al fâs stâ ben cualchidun altri al è alc di straordenari. No volarès jessi di nissune altre bande. De vite di prime, no mi mancje nuie». ❚
………………………………………………………………………………………………..
IL PROFÎL
Maria Teresa Bortoluzzi e je nassude a S. Denêl tal 1973. Diplomade al Liceu classic “Stellini” di Udin, si è laureade in Storie contemporanie te Universitât di Triest.
◆ Dal 2000 al 2004 e à lavorât a Milan tant che redatore di sîts web e di libris pal Grup RCS e par Il Sole 24 Ore. Po si è trasferide a Londre li che e à insegnât talian tant che lenghe foreste par students britanics de scuele primarie e secondarie e daspò e je jentrade a vore tal setôr de editorie scolastiche tant che redatore e progjetiste editoriâl par Pearson, Harper Collins e Hachette UK.
◆ Tal 2016 e je tornade in Friûl, inte sô Ruvigne, li che, l’an dopo, cu la mari, la sûr e un pâr di amîs e à metût in pîts la Associazion di promozion sociâl OrtoBorto, li che e je presidente e responsabile operative. ❚
………………………………………………………………………………………………..
La barburice e la pazience
La barburice e je il simbul dal OrtoBorto. «Maria, la nestre socie plui anziane, mi à vût dit che dulà che a vegnin sù lis barburicis, la tiere e je nete. Imagjine ce braùre cuant che chel altri an a son nassudis ancje intai nestris orts insiemi cui papavars, intal mieç des cumieris di patatis», e conte Maria Teresa. Cuant che tu âs cure di jê, tu le rispietis, la nature ti fâs regâi maraveôs e par chê frute cressude a S. Jacum, dongje de none che e faseve l’ort e che cumò lu lavore jê, la sodisfazion e je grande e si involuce cui ricuarts de infanzie. «Sentade, inte ombrene, o cjalavi mê none che e sapave planc la tiere, intal cidinôr. Tu podevis jessi in bulidure tant che tu volevis, no jerin sants. Tu vevis di spietâ che e ves finît. Al è stât un grant insegnament. L’ort mi à insegnât a vivi cun plui serenitât, a vivi il gust de spiete e a ralentâ i nestris timps. Mi à insegnât a cjatâ la pâs, che o sint ancje cumò, lavorant intal cidin – e dîs Maria Teresa –. Dispès mi vegnin intal cjâf lis mês nonis, lis lôr maris e dutis lis feminis prime di lôr e prime ancjemò; o imagjini la lôr fature, lis dificoltâts che a àn vivût e o ai agrât pe tradizion che nus àn lassât. L’OrtoBorto al è ancje lôr». ❚