Sfuei Mensîl Furlan Indipendent
Archivi de Patrie

«La adesion ae ACLiF e jere un at dovût, o sarìn sul confin ma si sintìn furlans al 100%»

Dree Venier

Interviste a Gionata Sturam, sindic di Claut
In mont e sui confins dal Friûl: par cheste gnove pontade des intervistis ai sindics dai Comuns che a fasin part de ACLiF- Assemblee de comunitât linguistiche furlane, o lin a Claut.
Il sindic Gionata Sturam mi rispuint al telefon dopo di cualchi dì che lu cîr «che mi scusi, ma o soi simpri plen di robis di stâ daûr», mi dîs. In chel moment al è là sù, in paîs.
__
Ancje par lui isal faturôs il lavôr di sindic?
Ben, al è un incaric simpri plui complicât, ancje parcè che no je une struture di sostegn aministratîf: jo, par esempli, o soi il responsabil tecnic e economic dal Comun e, no jessint dal mistîr, mi rangji cemût che o pues. Di fat, dopo di un prin mandât o ai fat 5 agns di “polse”. Cumò o soi tornât a fâlu cuntune liste che e jere plene di zovins e di feminis: cuant che jo o ai fat il prin mandât o ai vût la fortune di jessi sostignût di int che mi à insegnât tant, e cumò o cîr di restituî la esperience ai zovins di mût che al sedi un passaç di gjenerazion.
__
Cuant sêso jentrâts te Assemblee e parcè?
Se no mi visi mâl o sin jentrâts tal 2020.
__
Cemût mai cussì tart?
No sai se la aministrazion di prime e veve frontade la cuistion ma jo, a pene che o ai savût di cheste pussibilitât, o ai sburtât par aderî, par me al è un at dovût. O dopri di pueste un tiermin penç.
__
Duncje si sintîs furlans, pûr jessint bande il confin cul Venit…
Sigûr! Furlans al 100%, ancje se no fevelìn furlan ma il clautan. Magari a son plui chei di Nert e Cjas che a àn une influence dal longaronês o dal belumat, ma nô o sin “pe acuile”. Cun di plui, jo o pensi che chenti la apartignince e sedi plui fuarte parcè che o sin un tic isolâts, magari in provincie di Udin no si rindin cont di ce che al vûl dî e al somee che no i tegnin cussì a fuart. Come pai clautans che a son tal forest o a Milan: lôr si sintin furlans ad implen.
__
Secont lui, la Assemblee aie dome un rûl culturâl o varessie di vê ancje un compit plui politic, in chest moment li che i ecuilibris a somein lâ ducj in favôr di Triest, cul gnûf asset istituzionâl cence provinciis?
Par me, che al esisti un organisim culturâl pai furlans al è za tant. Par chel che al inten i ecuilibris de Regjon no mi soi fat un judizi, ma dal sigûr par nô piçui comuns la Provincie, tant che ent intermedi, e jere utile. Cumò o restìn piçui e o vin a ce fâ cuntune realtât plui grande e duncje o sin ancjemò plui debii. In plui, tignît cont che par lâ a Triest di ca i vuelin dôs oris e mieze, un viaç! Duncje i rapuarts a son dificii.
__
Claut, plui mont di cussì no si pues, al ven di un isolament durât secui ma che al è rivât a saltâ fûr in gracie dal turisim. Ma la mont puedie jessi dome turisim? Ce fâ par un vêr disvilup de mont?
Il turisim al pues fâ la part dal leon, ancje parcè che ca o sin propit intun paradîs naturâl, e o vin dome di fâlu cognossi e fâ sù struturis adatis par svilupâlu. Ma chest dal sigûr nol baste, ancje se o pensi simpri a ativitâts che a rivin a sfrutâ particolaritâts dal teritori. O pensi ae industrie dal legnam, o pûr pensìn al câs de Dolomia, la aghe che e ven des nestris risultivis. Cun di plui, e je une gnove tindince une vore vivarose: tancj zovins a stan metint sù aziendis agriculis o di arlevament vignint vie des citâts par fâ alc ca sù di nô. O pensi che cheste imprenditorie zovine e à di jessi judade, e al è compit dal public.
__
Cemût ise lade la situazion dal turisim cul Covid?
Par strani che al pues someâ, ca sù cul Covid il turisim si è disvilupât di plui. La int e à tornât a scuvierzi la gjite in mont, e une mont no cuntune presince “di masse”, ma plui risiervade. Come che al dîs Mauro Corona «qui da noi non nevica firmato». La sfide e je però garantî un servizi a dutis chestis personis che nus vegnin a cjatâ.
__
In specific su la lenghe furlane, lui ce pensial dal insegnament a scuele? Isal dacuardi? E sui cartei bilengâi?
Sul insegnament de lenghe a scuele o sai che no sarà une posizion che e plasarà, ma o soi contrari. Miôr imparâ une altre lenghe come l’inglês che ti permet di lâ ator pal mont. Ancje parcè che al è il probleme di ce furlan o dialet locâl che tu insegnis. Par esempli, te nestre scuele o vin int dai varis paîs dongje che ognun al fevele un dialet diviers. Cuâl insegnìno?
Sui cartei, no ai mai pensât ae cuistion, ma no soi contrari. No sai se nô o varessin di meti Claut-Cjolt, i pensarai (“Cjolt” al è il non dal paîs par clautan, ndr). O sai che a Cimolais a àn metût il cartel bilengâl Cimolais-Thimolei, ma probabil par pandi il non locâl plui che chel uficiâl furlan.
__
Stant che lui al è stât president dal Parc Naturâl des Dolomitis Furlanis i domandi se i parcs a puedin jessi un fatôr di svilup.
Fâ sù aeris protetis al è un valôr par un teritori. Ma bisugne jessi plui coragjôs, no puedin fermâsi ae cure e vigjilance dal teritori. Par valorizâ chel che a puartin, in plui di tutelâ il teritori e va tutelade la int che cheste mont le vîf cun jutoris di pueste, cussì di podê jessi volan par une vere ricjadude economiche che e duri.
__
Par finî i domandi une robe biele di fâ cognossi dal so Comun che secont lui no je avonde cognossude.
Plui che une robe particolâr o volarès dî a ducj di tignî di voli ce che o fasìn a Claut in gjenerâl, sedi di Istât che di Invier. O vin une grande vivarositât di iniziativis in gracie dal fat che i citadins a rivin a mantignî un sens fuart di comunitât. Come riferiment cirît il Parc des Dolomitis Furlanis e a pene che o viodês alc, vignît sù, che e vâl propit la pene. Mandi a ducj! ❚
………………………………………………………………………………………
FOCUS. Un teritori isolât par tant timp che cumò al è une ecelence turistiche
Un grup di paîs che, pûr svantant origjins antighis, a son stâts presonîrs par tant timp di une val, la Val de Ciline. Il non dal Comun, Claut, al ven propit dal latin Clauditu, che al vûl dî “lûc sierât”.
◆ Il Comun al è citât pe prime volte intal 924 intun at di donazion ae Abazie di Siest de bande de contesse langobarde Imeltrude. Ancje se cun origjins tant antighis, fin al 1911-13 dome che un piçul troi al colegave Claut, passant par Barcis e Andreis, ae planure furlane, di une bande, e par Cimolais e Nert e Cjas al leve a straplombâ inte val de Plâf. Chescj paîs a sorevivevin intun ambient tant dificil in graciis de cjace, de pescje, di un pocje di agriculture di mont, dal arlevament e dal sfrutament dai boscs. Cu la dominazion de Republiche di Vignesie chescj ultins si àn trasformâts in cumierç di legnam.
◆ Dome sul tacâ dal ’900 al è stât costruît il prin toc di strade Montereâl-La Molasse, di 5 Km, par disfrutâ la energjie eletriche de Ciline. Dopo e je stade fate la vere strade, par gjoldi des potenzialitâts strategjichis di un colegament cu lis trupis militârs dal Cjadovri, intal 1911-13.
◆ Chest al à fat jentrâ in crisi la vecje economie locâl e al è scomençât l’esodi de popolazion tal forest e intes citâts industrializadis. Intal dopovuere, l’esodi si à fermât in part in graciis di un ciert turisim di masse, che al sielç il Cjanâl de Ciline pai aspiets interessants dal paisaç e il cost modest.
◆ Intal 1963 si fâs sintî su la comunitât il disastri dal Vaiont. Muarts, disconfuart, sieltis dificilis. Intal 1976 il taramot dal Friûl si fâs sintî ancje chi, cun dolôrs, ma dismovint ancje esemplis biei di solidarietât e di desideri di vivi.
◆ Intal 1993 e ven fate infin la gnove strade che e garantìs sigurece e destrece di passaç e il Comun di Claut al cjape in maniere decise la vie dal disvilup turistic leât al sport. Vuê il comun al svante un palaçut de glace, pistis pal schi e pal schi di fonts, la palestre, e struturis varis pal timp libar. ❚
………………………………………………………………………………………
Cui che al è il sindic di Claut
Gionata Sturam al è nassût a Manià ai 21/04/1975, al è diplomât al liceu sientific. Maridât, di mistîr al lavore in ufici par une dite privade. Al è stât elet intal 2020 sot de liste Clautans cul 52% des preferencis. Al è za stât assessôr al turisim e sport dal 2000 al 2005 e dopo sindic dal 2010 al 2015. Al è stât president dal Parc Naturâl des Dolomitis Furlanis dal 2002 al 2005. ❚

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +