Cence retoriche, une preiere di pâs in onôr dai muarts di dutis lis vueris

A Rude il ricuart dai oms che, te prime vuere,
a àn scombatût come “fradis cuintri fradis”,
cui intervents dal sindic e dal president de “Patrie”
Il cîl nol podeve jessi plui grîs, cheste matine dal prin di Novembar, a Parteulis di Rude. La dì dai Sants e je simpri stade cussì in Friûl: o fumate o zulugne, come par judânus a visâsi di chei che no son plui cun nô. In dut chel grisum a risaltin dome i colôrs vîfs des bandieris e dai  confenons. Jenfri ducj chei verts, blancs e ros e je une bandiere turchine cu la acuile di aur. E somee une robe strambe viodi la bandiere de Patrie dal Friûl in chê ocasions. Ma strambe no je. Si lu capìs a pene che il il sindic Franco Lenarduzzi al fevele dentri de gleseute antigone di S. Andree. Al memoree i muarts di dutis lis vueris, ancje chei, come i oms di Rude che, te prime vuere, a àn scombatût cu la monture dal Imperadôr de Austrie. Ma jerin furlans, al marche, come furlans e jerin chei che a scombatevin cu la monture dal Re de Italie e magari a jerin a stâ dome di là dal clap dal confin. Intant che al fevele i voi a van su lis sculturis langobardis, sui afrescs gotics, testemonis di une storie e di une civiltât che no jere todescje, slave o taliane, ma furlane. Al va dilunc fevelant dai “fusilâts di Çurçuvint”, dal inovâl dal viaç dal “Milite Ignoto”, ocasion juste par memoreâ ducj chei che, in che volte, a àn pierdude la vite par il dovê. Ma ocasion mancjade par zontâ la memorie di ducj i muarts di ogni nazion, e no dome di chê taliane. La justizie lu pretint.
◆ Dree Valcic, president de Clape “la Patrie dal Friûl” al fevele cun passion propite de storie dal Friûl che no je cognossude e, anzit, pal plui ancje falsificade di une vision che, scomençant dai libris di scuele, e justifiche la prime vuere par “liberâ” tieris che te veretât no volevin jessi liberadis. Tieris che a àn subide une ocupazion e une distruzion tremende e, dopo, un dislidrisament culturâl e identitari, fintremai cul cambiâ i cognons de int e i nons dai lûcs. Une vuere volude de monarchie e de economie ma “inutile strage”, cun milions di muarts e che e à parturît il fassisim e une altre seconde e oribile vuere. “No ise ore di finîle – al à sbrocât Valcic – di viodi tant che nemîs i fradis furlans di chescj paîs. Di bon che plui di cualchi comun, come Rude, al à zontât il non dai siei muarts te piere.” Mi à plasût il riferiment personâl di Valcic “Pensait che gno nono de bande di pari al jere polac di Galizie e gno nono de bande di mari al jere furlan. Cui varessial di jessi nemì par me?” Al à sierât cul invît a ducj nô a impegnâsi par pandi la storie e la veretât ai zovins, confidant intune prospetive europeane di popui e no di confins.
◆ Tal prât dongje de gleseute, intant che la trombe e sunave il corot e il sindic al poiave une rose, dal cîl grîs e colave une plovisine di lagrimis. Biadelore, vuê no ai sintudis peraulis di eroisim, glorie, onôr e dut il solit ritornel de retoriche false. Ce biele matinade! La bandiere de Patrie e jere propite tal puest just!  ❚