Walter Tomada, Fausto Zof, “Il Friûl vie pai secui”

La storie de Patrie che no ti àn
mai contât, Feagne, 2021
“Finalmentri! Di tant timp spietade, vele chi che e jes cheste Storie dal Friûl, firmade di doi nons che inte suaze de culture e dal pinsîr a bon pro de nestre int a vuelin dî e cetant, ven a stâi di Walter Tomada e di Fausto Zof. Che insiemi le metin adun pai caratars di Corvino Edizioni, un editôr furlan simpri plui atent al ‘mont di chenti’ e che intai ultins agns al à publicât plui di cualchi tesaur, cul gust di fâ libris come che si faseve une volte, zontant i contignûts e ancje la bielece dal ‘manufat’”
◆ E scomence cussì la prefazion di Agnul Floramo a chest libri di cuasi tresinte pagjinis, dutis scritis intun furlan biel e vivarôs e insioradis di passe otante fotografiis o dissens. Daspò de Cuintristorie di Marchet e de Storie dal popul furlan di Pieri Piçul e coventave une opare che e tignìs cont des modernis inovazions dai studis storiografics e ancje di gnovis scuviertis, come par esempli chês archeologjics in tantis bandis dal Friûl.
◆  Scrivi un libri di storie e je une cuistion di sieltis. Ce tai dâi ae ricercje? A cui isal indreçât il studi, a zovins, a viei, a students o a studiâts? Cuâi fats sono impuartants, cuâi mancul, cuâi par nuie? Trop spazi dâi a chel secul o a chel altri, a chel personaç o a chel altri e v.i.
◆ La opare di Tomada e di Zof e à ben clare la impuartance dai acjadiments che a son stâts fondamentâi pe storie dal Friûl. Il tai scolastic si lu viôt intes tabelis des pagjinis 12 e 31 che a rindin di un pont di viste visîf la linie dal timp. Ma al è presint in dute la opare, ancje cuant che nons e datis a deventin tancj che si fâs fature a metiju in rie. Parcè che la storie di cheste tiere di confin e je une vore complesse. Scomençant dal fat che no je simpri stade tiere di confin, anzit. E jere tiere di incuintri di razis, religjons, lenghis, culturis, etniis diferentis. Propit chest miscliçament al à creât une identitât precise dilunc dai secui.
◆ Identitât che e je pandude in ogni pagjine dal libri. Al è di sperâ che al cjapi un so puest su la scrivanie di ogni student furlan e che ancje paris e maris i butin un voli. E che il voli nol vedi masse premure di cori vie, ma che si fermi a lei. E a imparâ alc di plui su la lôr tiere. A partî de preistorie e de protostorie, dai cjastelîrs e dai Celtis, par continuâ cu la epoche romane e cu la fondazion di Aquilee. Impussibil fevelâ di Friûl cence fevelâ di Aquilee, romane, paleocristiane, patriarcjâl. E po i barbars, Vignesie, la Austrie, la Italie e il Friûl dividût in doi.
E podarès alore ancje nassi la curiositât di savê alc di plui sui popui che a son vignûts o passâts chenti: Uns, Ostrogôts, Langobarts, Avars, Francs, Ongjars, Turcs (e magari, domandâsi parcè che a son passâts propit par chi). O su personaçs tant che i patriarcjis Popon, Volchîr, Bertolt, Bertrant, i imprenditôrs Linussio e Zanon, i poetis Pasolini e Ungaretti, il mulinâr Menocchio. Sui miracui di Trave, su la costruzion de fuartece di Palme, su la incuisizion, su la emigrazion. E su lis vueris, tantis, teribilis dutis, ma devastante la prime mondiâl che e je stade combatude propit in chestis tieris e che e à sdrumade la economie dal Friûl tant che i àn volûts agns e agns par ripiâsi. E il fassisim, lis leçs raziâls, la seconde vuere, i alpins de Julia, i cjamps di concentrament di Visc e di Gonârs, la Resistence, lis brutis maglis di Porçûs e des foibis, ma ancje l’eroisim des zonis libaris.
◆ Se chel pari o chê mari no varan la pazience di lei dut, a podaran cjapâ in man lis pagjinis 291-295, vâl a dî la tabele complete dai cjapitui e sielzi chei plui ur interessin.
◆ Il studi al è completât cuntune bibliografie di ben cuatri pagjinis, dut o cuasi dut ce che al è stât scrit su la storie dal Friûl, in ordin cronologjic di jessude.
◆ Dome un osservazion mi sintarès di fâ: se il libri al ves di jessi doprât tant che test di insegnament de storie furlane e sarès une vore utile e pratiche une tabele dai nons e magari ancje dai lûcs citâts. ❚