Sfuei Mensîl Furlan Indipendent
Archivi de Patrie

«Il furlan al è une risorse preziose di doprâ in ogni ambit de vite cuotidiane»

Dree Venier
Lucia Brunettin

Interviste a Lucia Brunettin, sindiche di Cordovât
A Cordovât o jeri stât l’Istât passât intant che o jeri a torzeon a visitâ il Friûl Ocidentâl. Pûr jessint un paîs sul confin cul Venit, o vevi vualmât un grant numar di bandieris de Patrie cu la acuile di Bertrant. In sume, o jeri curiôs di intervistâ la sindiche Lucia Brunettin par viodi ce che al è sot di cheste floridure zale e blu sui barcons dal so paîs. Nol da di maravee che chest Comun al sedi dentri de ACLiF- Assemblee de Comunitât Linguistiche Furlane…
__
Sindic (o sindiche?), cuant sêso jentrâts te ACLiF?
Che mi clami “sindic”: par me al è un tiermin neutri, che nol va a identificâ il gjenar masculin o feminin, ma la figure istituzionâl. O sin jentrâts intal 2017 cuntune deliberazion cun unanimitât di consens di bande de sentade consiliâr.
__
Parcè sêso jentrâts e cun ce convinzion (di là dal vôt unanim)?
Il Comun al è dentri intal ambit teritoriâl di tutele de lenghe furlane e o crodìn inte impuartance de valorizazion de lenghe furlane; parcè che il Friûl-Vignesie Julie al è une regjon a statût speciâl e une des sôs specialitâts al è propit il furlan che al va viodût tant che une risorse preziose. Cun di plui, pûr jessint zone di frontiere cul Venit, cun influencis che a vegnin massime dal dialet venit, la nestre volontât ferme e je chê di favorî un ampliament de cognossince dal furlan ancje intai comuns dongje de aree venite, che a àn une comunitât furlanofone.
In bande de lenghe furlane, al zuie dal sigûr un rûl fondamentâl ancje l’aspiet socioculturâl dal nestri jessi furlans, colegât ai costums, rituâi, tradizions, sens de storie, cussience, volontât e sens di apartignince. E po la laboriositât, e la fuarce che e ven dal jessi un popul di frontiere e de fede cristiane che la int e à simpri pandût. In dut chest, nô si ricognossìn ad implen e dal dut.
__
In cheste otiche ancje culturâl, ce pês aial jessi un Comun di confin?
Cemût che o ai dit prime, lu sintìn tant che une risorse preziose e nus permet di viodi lis robis intune otiche di prin plan, ancje a pet de fuarte influence venite tes nestris zonis.
__
E a proposit di identitât, il pordenonês isal Friûl? Cualchidun lu met in dubi…
Jo o soi di Pordenon e no sai il furlan: i miei no lu fevelavin e duncje no ai vût la ocasion di imparâlu, ma mi sint e mi soi simpri sintude furlane. Il pordenonês al è Friûl Ocidentâl, pont. Cence nissun dubi.
__
Par promovi la nestre lenghe, voaltris ce iniziativis vêso fat o vêso in cantîr?
Chest an, cundut dal probleme COVID  che al à di fat blocât ogni gjenar di iniziative, tal mês Mai, vie pe setemane de culture de Societât Filologjiche Furlane, o vin vût la presentazion dal libri Il gjalut postin. Dopo, une robe che us tocje: la presentazion dal vuestri mensîl La Patrie dal Friûl, vinars ai 27 di Avost intal ambit dai incuintris La Patrie sot dal tei che al memoree lis tradizions des riunions vicinâls antighis dai nestris paîs sot di un tei. Propit a Cordovât al è un esemplâr secolâr di cheste specie arborie fuarte. A Otubar o vin chê di presentâ la mostre itinerante de Arlef Furlan Lenghe di Europe intal ambit des fiestis pe Madone dal Rosari. O ricuardi ancje la divulgazion capilâr dai depliants cul fumet Free & Ulli e lis besteatis prodot de Arlef cun riferiment ae emergjence sanitarie covid-19. La distribuzion e je stade fate tai centris estîfs, ae utence de biblioteche civiche comunâl e aes scuelis dal teritori.
__
Viodude la sô convinzion tal prudelâ il furlan, i domandi: ce si podaressial fâ di plui?
O disarès che si varès di favorî une cognossince plui profonde de lenghe furlane, par che no si pierdi, stant che plui al passe il timp e plui o pierdìn chês memoriis storichis dai nestris nonos o barbis che lu savevin fevelâ tant ben e che a podevin lassâlu aes gjenerazions futuris. La politiche regjonâl si à di impegnâ di plui intal individuâ e programâ iniziativis par un ricognossiment plui marcjât de impuartance di cheste nestre lenghe romanze. Par tant che e sedi za ricognossude uficialmentri, al va fat une vore di plui par promovile, valorizâle e soredut tutelâle. Duncje, al è ben favorî il bilinguisim inte toponomastiche e inte segnaletiche stradâl, sostignint ancje il so ûs intes aministrazions publichis locâls e in ogni ambit de vite cuotidiane.
__
E ce podaressie fâ di plui la Regjon?
La Regjon e scugnarès judâ i piçui comuns tant che il nestri, che par adeguâ la segnaletiche i coventin risorsis consistentis che no si rivin a cjatâ fûr cun fonts propris. La istituzion regjonâl e varès di jessi plui comunicative in merit ae oportunitâts contributivis che a son pe promozion e pe valorizazion de lenghe furlane: o calcoli che cheste comunicazion cumò e sedi un pôc carente.
Cun di plui, agjevolâ la assunzion di un bon numar di insegnants di lenghe furlane, che vuê a mancjin, e, simpri tal rispiet des normis, valutâ di ingaiâ chei che a son za in cuiessence, che, se si aprofondìs cheste tematiche in mût plui incisîf, e sarès une buine base di partence par une difusion capilâr in ambit scolastic. La Regjon e varès di finanziâ ancje la realizazion di laboratoris, cors e ativitâts no dome pai zovins ma ancje pai adults e che a vadin soredut inte direzion di cjapâ dentri i comuns limitrofs de aree venite intune condivision di progjetualitât difusive dal furlan su scjale plui largje.
__
La ACLiF aie dome un rûl culturâl o puedie vê ancje un rûl politic par belançâ i ecuilibris de Regjon, saltâts cul vê sdrumât lis provinciis, e che a somein butâ viers Triest?
Par me, ogni organisim istituzionâl al à di fâ il so, e la Assemblee e je nassude cuntun profîl di promozion culturâl, sociâl e valoriâl. Dâi altris compits le snature e i gjave energjiis.
__
Par finî, mi disie cualchi particolaritât o event furlan che o vês tal Comun?
Us invidìn ae nestre Sagre dal Lengal, ae Madone dal Rosari, e o ricuardi la presince di Cordovât intai scrits di Pasolini e di Ippolito Nievo, la tradizion dai pignarûi epifanics, ducj simbui dal nestri sintiment furlan profont. ❚
::::::::::::::::::::::::::::::::::::::::::::::::::::::::::::::::::::::::::::
Cui che e je la sindiche di Cordovât
Lucia Brunettin e je nassude a Pordenon tal 1965. E je educadore e consulente familiâr. Laureade in siencis e tecnichis psicologjichis, e je sindiche di Cordovât dal 2019. E je stade vice sindiche tes dôs aministrazions di prime. ❚
::::::::::::::::::::::::::::::::::::::::::::::::::::::::::::::::::::::::::::
FOCUS. Un borc che al à madressût ispirazions poetichis
Cordovât al è stât nomenât pe prime volte intun document intal 1186, dulà che si lu segne tant che possediment concedût di pape Urban III al vescul di Concuardie. Dut câs, il borc antîc al è nassût salacor sui rescj di un castrum roman.
◆ Al è plen di storie e di monuments preseabii, cuntun cjistiel, un borc medievâl, il santuari marian plui vecjo de diocesi, une plêf antighe che e rimonte al secul XV; al è, e al è stât di ispirazion poetiche par grancj leterâts tant che Ippolito Nievo e Pier Paolo Pasolini.
◆ La storie documentade e scomence inte Ete di Mieç, cu lis vicendis dal grues complès agricul che si slargjave dongje dal vât suntun ram antîc dal Tiliment. Il passaç al veve dongje une strade impuartante che e colegave Puart ae aree austriache e todescje. I vescui di Concuardie a àn fortificât il borc tor dal secul XI-XII e a àn sielzût Cordovât tant che cjistiel plui impuartant de planure.
◆ Dopo dal passaç dal Friûl a Vignesie, il cjistiel al à pierdude la sô funzion militâr. Intant l’insediament al prosperave: inte zone de Plêf di Sant Andree e esisteve la vile rurâl, dentri des muris si jere disvilupât il borc e a Nord al cresseve il borc gnûf dai marcjadants, dai nodârs, dai parons, ae dai rtesans.
◆ Chescj spazis si àn ampliât une vore dopo che, intal prin Sîscent, al è stât fat sù il Santuari de Madone, dongje dal lûc là che intal 1592 une femine e veve dit di ve viodude la Mari di Diu.
◆ Intal secont deceni dal secul XVIII, ae glesie al è stât metût dongje un convent di paris Domenicans, che chi a restarin fin al 1806.
◆ Dal Dicembar dal 2004 al è tra i “Borcs plui biei di Italie”. ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +