“Il fros curt”, tragjedie furlane di un timp tormentât

Baste savê spietâ. Rivât il timp just, ancje il libri imparziâl, onest e ben fat si presente: al è il câs di “Il fros curt” di Ido Cibischino, Aviani & Aviani editôr, une conte storiche insedade tal mieç de ultime vuere, fra i agns Trente e Cincuante dal 1900, cun fassiscj e partigjans, e contôr di mucs. Sôl il titul al è scrit par furlan, il rest par talian; ma il libri al è furlan che plui no si pues.
◆ Un libri li che la ideologjie no è preminente a pet des personis, che a mantegnin il lôr temperament, cui aspiets bogns e chei pôc simpatics o magari disgustôs, cul lôr valôr e cu lis lôr debilecis, no cate che si cjatin di une bande o di chê contrarie. Nissun al ven piturât tant che il fassist o il comunist par antonomasie, di condanâ – di bande di chescj o di chei – cence nissun dubi; ducj a conservin la lôr umanitât. Une novitât spietade di un pieç.
◆ L’ecuilibri al sflorìs no dome de savietât dal autôr, ma de sô sielte di fâ de comunitât li che si davuelç la storie une coprotagoniste insiemi cu lis dôs figuris centrâls. L’autôr stes al è part de comunitât di Flambri, Cjarmacis, Talmassons che e vîf ta chest libri: ducj a cognossin il fassiston, paron di une fabricute di cjadreis, boriôs, nomenât podestà un pâr di voltis e po finît a fâ il president de scuadre di balon locâl; e a cognossin ancje i partigjans e in particolâr un frutat di disevot agns, fuart, sclet e inespert che par salvâ la sô cjiçute al à ruvinade une azion partigjane cuintri i mucs. Dôs figuris nassudis e cressudis lenti: impussibil privâlis de partignince, e duncje de dignitât vanzade magari dopo vicendis no convenientis.
◆ Il cûr de storie al è vêr, sucedût e ben documentât, un fat tragjic vonde sempliç a prin viodi. Ma un personaç losc al savolte ogni plan: il destin, trist, al trame sot vie fin a trasformâ un tentatîf di riscat tune disgracie cence fin; e al sielç la sô seconde vitime fasintij tirâ la bruscjete plui curte.
◆ Cibischino al sa creâ situazions gnervosis o contrastadis par meti in sene i moments cruciâi, al sa leâ in maniere lizere i fats storics cun chei inventâts, cuntune scriture nete, ornade di metaforis, spieli dal trat fin dal autôr; e i biei dissens di Gianni Di Lena, che a compagnin lis peraulis, ansiôs e interogatîfs, si sposin cul test.
Une storie di agns indaûr – di une striche di timp tormentade – ma contade pe int di vuê, no passade pal ingôs de vuere: chest al è “Il fros curt”. Une conte coletive, che la comunitât e à metût di bande a lunc, ma conservantle cun dignitât e marum; cul autôr che si è dât il compit di sfadiâ par metile in ordin e fissâle su la pagjine: une sensibilitât, chê di Cibischino, che pôcs scritôrs a puedin svantâ. Une storie ben contade, di lei e meditâ. E se un i ten a jentrâ tal significât intim dal lavôr, lu consei di tornâ a passâ il prin cjapitul, dopo vê finît di lei il libri.  ❚