Sfuei Mensîl Furlan Indipendent
Archivi de Patrie

Dispersion scolastiche: cuant che la crisi e tocje ancje l’avignî de mularie

Serena Fogolini

A somein aromai lontans i timps dal ideâl de ostrighe di memorie verghiane, cuant che l’avignî di un individui al jere segnât des sôs cundizions socioeconomichis e de divignince de famee, cu la puare int obleade a “tignîsi tacade cun fuarce al scoi li che la fortune le veve lassade colà, intun rassegnâsi ardimentôs a une vite di faturis e di miserie”.
◆ Purpûr, se si van a cjalâ lis statistichis, al pâr che i dâts a voledin propite confermâ cheste teorie, massime tal cantin de scuele, li che par altri il pinsîr di Verga, cjamât di prejudizis, al va a risi di mudâsi intun pericolôs efiet Pigmalion.
◆ E la mularie taliane e je pardabon daûr a instradâsi viers di un primât pôc gloriôs, stant ai dâts Istat (2020), che le viodin al prin puest in Europe par “Neet”, o ben i zovins tra i 15 e i 29 agns che no lavorin e no studiin (23,3% cuintri une medie europeane di 13,7%), cuntune disparitât une vore fuarte inte componente feminine (25,4% cuintri dal 21,3 dai fantats) e foreste (medie parsore dal 30% che però, cjapant in considerazion dome lis fantatis forestis e passe il 40%). Intal Nord di Italie la situazion e je mancul grivie (mancul dal 20%) rispiet al meridion, li che si passe il 30%. Par fortune, la nestre e je une des regjons cu la medie plui basse (13,6%) rispiet al dât european, dongje de provincie autonome di Bolzan (12,4) e dal Trentin (13,5%).
◆ Lant a viodi la dispersion scolastiche esplicite (dâts Istat), o ben chel fenomen li che i zovins tra i 18 e i 24 agns no rivin ae fin de scuele secondarie di secont grât, e chê implicite (dâts Invalsi), ven a stâi i zovins che a rivin al diplome cence vê lis competencis suficientis, si viôt che lis dificoltâts a incressin soredut intai sogjets cuntune estrazion sociâl plui basse. In medie, in Italie, il 18% dai fantats al lasse la scuele cence diplomâsi, cun pontis che a rivin parsore dal 30% in Sicilie e Sardegne. Intal Nord, invezit, il Venit e la provincie autonome di Trent a rivin a stâ sot dal 10% par chel che al inten la dispersion scolastiche totâl, che al jere ancje l’obietîf de Union Europeane pal 2020, biel che il Friûl-Vignesie Julie (13,5%) al è di pôc parsore chê medie.
◆ I dâts Invalsi, cun di plui, a testemonein cemût che i nestris zovins a sedin tra i miôr in Italie, massime se si van a viodi lis statistichis pes scuelis secondariis di prin grât, li che il Friûl-Vignesie Julie al à la percentuâl plui basse di “arlêfs in dificoltât”, o ben cun competencis no suficientis in inglês, talian e matematiche (6,6% cuintri di une medie dal 14,4%).
◆ Nol è ce stâ trancuîi, dut câs, par vie che i efiets di une scuele a sangloç, tra sieraduris e didatiche a distance, si son subite fats viodi, cun fruts che no rivavin a stâ daûr des lezions in linie, domandis di poie psicologjiche e fintremai fantats che a molavin il percors scolastic. Clare che in Friûl chestis segnalazions a rivin soredut des zonis de mont, li che al mancje il colegament ae rêt internet, o di students forescj e di fruts cun cualchi disabilitât, che a restin duncje taiâts fûr dal sisteme, ma ancje la incressite di fameis li che i gjenitôrs si son cjatâts cence lavôr e à savoltât il rindiment di arlêfs che no vevin mai vût problemis. Stant aes classifichis dal “Welfare Italia index”, la nestre e je stade une des regjons li che il sisteme di welfare al à funzionât miôr intal 2020, plaçantsi al 4 puest a nivel talian, ma lis consecuencis de pandemie a àn ancjemò di mostrânus la lôr muse plui triste, che forsit o rivarìn a intraviodi dome ae fin di chest an cruziât. E, magari cussì no, il lavôr par tornâ ai nivei di prime al sarà une vore ardimentôs e plen di problemis mai frontâts fin cumò. ❚

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +