SIMPRI BOGNS. Marie Fanin, Le frute che e dave i nons…, Basandiele, 2011

“Si sintive daûr da puarte dut un fevelâ fis fis, ma no si capive ni trops che e erin che e cjacaravin, ni ze che e disevin.
Alore le frute e veve poiât le orele su le puarte…no si pareve bon a scoltâ di scuindon, ma e veve pur di savê cui che al ere in ta sô cjamarute, che i tignive cussì tant a vêle dome par sé.
-A mi, no mi plâs par nuie. –
-A nun, no nus plâs par nuie. –
-Se si podès almancul savê di dulà che e son vignûz. –
-Se si podès almancul savê cui che ju à clamâz. –”
Cussì e scomence la conte che Marie Fanin e à dade fûr sul finî dal 2011, cu la colaborazion de associazion culturâl e di ricercje Ad Undecimun di S. Zorç dal Noiâr. Un librut di 62 paginis, miezis par furlan e miezis cu la traduzion par talian. E insiorât dai dissens di Maria Grazia Cicuto, che a compagnin la storie, cualchi volte, piçui, altris voltis grancj di jemplâ dute la pagine. Ilustrazions vivarosis e coloradis che a son in stât di rindi ben lis emozions che a puedin nassi intun frut devant de magjie che e si displee devant di lui, intal scoltâ une conte. Che a son, pôc sù pôc jù, chês stessis imagjins che ognidun di nô al à platadis intai siei ricuarts.
Il test di Marie nol pues no lassâ scaturîts pe grande fantasie che lu inspire. Lant daûr il scheme tradizionâl des flabis, ve che o fasìn la cognossince cuntune schirie di personaçs che a son lis impersonificazions dai vizis capitâi: la aviditât, la sporcizie, la bastiane contrarie, la prepotance e v.i. Val a dî lis fuarcis dal mâl. E il ben? La redenzion di dulà vegnie? Di un pipin, un leopart di piece cuntune orele a sbrendolon, che al è l’intermediari jenfri i triscj e la frute che e ricêf la incarghe di gambiâur i nons a chês creaturis e a fâlis deventâ buinis. Ma il biel e la origjinalitât de flabe a son intai nons che la autore ur met a siei personaçs, i nons di triscj e po dopo ancje chei di bogns. Disìn dome che Bocjelove e devente Gustine. E fermìnsi culì par no vuastâi al letôr il plasê di scuvierziju lui chei nons.
O vin dit ‘al letôr’. In realtât Marie, plui che leile, i vûl sintude e viodude a contâ. Si môf, e rît, e cjante, e cjape la atenzion dal uditori. Pai grancj une fieste di moviment e di peraule. Pai frutins, po, si pues dome inmagjinâ ce sorte di esperience! Ancje par vie che lis contis a son simpri pensadis ancje in funzion didatiche, une didatiche studiade a pueste pai plui piçui.
Une vôs une vore significante pe culture furlane, chê di Marie.
✒ Laurin Zuan Nardin