Sfuei Mensîl Furlan Indipendent
Archivi de Patrie

E DUCJ A VIVERIN… FURLANS E CONTENTS. Capuçut blanc e neri

............

E jere une volte, intun paisut de pedemontane, une frute che si vistive simpri cuntun mantel cul capuç, e che ducj a cognossevin tant che “Capuçut blanc e neri”, no pal colôr dal mantel (che al jere ros) ma par vie che lu veve comprât al marcjât e paiât un blanc e un neri.
La frute e viveve cun sô mari, e dispès e lave a cjatâ la none di chê altre bande dal bosc.
Une dì che la none e stave pôc ben, la mari e prepare un zei cuntune pignate di broade e muset, lu da a Capuçut e i spieghe: “Puarte ae none la broade e il muset, parcè che no sta ben e e à bisugne di sostance, ma sta atente a no jessî dal troi!”.
Cussì, Capuçut e partìs cul so zei ma, rivade tal bosc, e cjate il lôf che al tache a fevelâ cun jê. Savût che la frute e sta lant li di sô none, il lôf al cîr di fâi pierdi timp par rivâ li de none prime di jê: “Cjale, Capuçut, ce bielis rosis! No âstu voie di cjapâlis sù?”. “Rosis? E a ce coventino? Cjale li invezit ce biel cjamp di ardielut!”.
Cussì Capuçut si ferme a cjapâ sù ardielut e il lôf al rive te cjase de none, le mangje e si met sù i siei vistîts.
Cuant che Capuçut e rive li de none, si inacuarç di alc di strani:
“Ce voi grancj che tu âs, none!”
“Par gucjâ miôr!”
“Ce mans grandis che tu âs, none!”
“Par lavorâ miôr tal ort!”
“Ce bocje grande che tu âs, none!”
“Par babâ!”
La ultime rispueste e fâs insospetî Capuçut. Cun di plui, cheste “none” e veve un acent une vore strani. Cussì la frute e prove cuntun ingjan:
“E ce piel scure che tu âs!”
“Parcè che o cjapi il soreli a Barcola!”
Eh, si: il lôf al jere di Triest, ma Capuçut e jere rivade a smascarâlu.
Il lôf al tache a cori daûr a Capuçut par mangjâ ancje jê ma, stant che al è vistût come la none, si inçopede tai scarpets e al cole jù come un piruç. Capuçut e prove a clamâ un taielens par vierzi la panze dal lôf ma la badante rumene de none, che e sa fâ un pôc ducj i mistîrs, le tire in bande e e rive a tirâ fûr la none sane e salve.
Ducj insiemi a mangjin broade, muset e ardielut, e la none, par ringraciâ Capuçut, i gucje une siarpe par lâ al stadi a viodi l’Udin. Di chê dì, Capuçut blanc e neri e je cognossude come “Siarpute blancje e nere”.
E ducj a viverin furlans e contents.
Lis flabis di Bete di Spere

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +