Segnâi bilengâi: Udin si dismentee masse dispès che e varès di jessi capitâl

O savevin di un pieç che Udin e je capitâl dal Friûl dome di non. Ma la brute sensazion e je che no vedi propit mai voie di cambiâ piel. Stant che lis robis plui evidentis (un cuotidian che al è Veneto par definizion, une Universitât che di furlan no i reste nancje un fregul) a son sot dai voi di ognidun che nol sedi vuarp, a ‘ndi è altris che no si rive pardabon a capî.
Come la storie de gnove taronde che e je stade screade dongje dal cimitieri, alì che si butin viâl Cadore/Nogara/della Faula. Un biel lavôr, gnûf di steche, lustri e preseabil, che i mancjave dome une piçule robute: i segnâi. Lis indicazions stradâls lis à metudis il Comun di Udin: ma dome par talian, cuant che al è za di un pôc che al varès di jessi automatic che i cartei che a visin i automobiliscj a varessin di jessi ancje par furlan. Lu dîs la norme, lu dîs il bon sens: dongje dai tancj cartei bilengâi che bielzà a esistin, parcè si àno di lei chestis tabelis – puaris – dome par talian? E sì che la aministrazion e fevele une vore di atenzion aes lenghis minorizadis. E e à une assessore tant che Antonella Nonino che e je une vore sensibile e e à viert un sportel, Furlan in Comun, propit su chescj temis.
Ma propit par chest, parcè sucedino robis di cheste fate? Parcè il furlan a Udin aial simpri di jessi considerât di mancul, o parfin nuie? In chest câs, la cuistion e à no dome rilevance simboliche, ma ancje rilevance politiche. Di fat, al è stât fat bon de Regjon il Plan Gjenerâl di Politiche Linguistiche che al previôt propit la realizazion bilengâl sistematiche di ducj i gnûfs cartei che a vignaran metûts o sostituîts di ca indevant. La ARLeF, che e je l’orghin di pueste par monitorâ la atuazion di chest plan, e varès – simpri che no lu vedi za fat – di tamesâ pardabon la situazion e sclarî che i cartei, par furlan o par talian, a costin chel istès ma no valin compagn. Une lenghe in plui e insiore une citât e une regjon, une lenghe çoncjade le lasse invezit mutilade, duncje plui puare. ❚
✒ Walter Tomada