Une roste furlane prime de montane
La disfide di Barlete
Par Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.
◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn intun tamar di pioris e li che si molin pachis di vueli sant. Nissun spetacul, a dî il vêr, che la Le Pen e distire daurman Salvini cuntun scufiot a plene muse, e cuntun sgarduf tal barbuç e distire ancje Orban. Come premi de vitorie par KO tecnic, la Le Pen e puarte a cjase la Valdaoste. I valdostans sul imprin ducj contentons, come che simpri al sucêt cuant che si cambie paron, ma timp cuatri dîs si sintin benzà malapaiâts. Dut câs, a deventin francesons ferbints.
◆ Salvini content, che “tant – al dîs – i valdostans a son cumò mieçs calabrês!”.
Mê agne Jacume
In Friûl no savaressin cui meti a molâsi sgardufs; personis cun sgrimie no tu lis cjatis chenti nancje se tu impiis un bengala. Une altre “Mozion dal Clero” no si viodarà in curt, e no nome parcè che al mancje il predessam; il Moviment Friûl al è colât par colpe dal Moviment Friûl e par colpe dai furlans. Ai furlans no ur interesse gran de lôr lenghe e de lôr culture; a fevelin par talian ancje cul cjan. E par chest si pues dâi la colpe a la television, ma ai furlans no ur interesse nuie nancje de lôr economie, no ur interesse nuie nancje dal avignî dai lôr nevôts.
◆ Par dîle sclete, no ur interesse nancje di vê nevôts.
◆ Ju sintîso mai fevelâ di economie? La stampe locâl i da la peraule a cualchi industriâl che al tire la aghe tal so mulin e vonde. Cence une idee, no dîs di Friûl, ma nancje di societât e di ce che al è daûr de poolade. O pûr al sglonfe la bufule un rapresentant dai industriâi, magari un carampan di passe setante agns che i gote il nâs e che al è ancjemò cul cjâf, chel fregul che i reste, ai timps di mê agne Jacume.
Nancje di dîlu!
Coventaressial un altri Moviment Friûl? Nancje di dîlu che al coventarès.
◆ Ma no un partît, propit un moviment. Dulà che la int e ten di voli chei che a menin la barcje. Di un moviment che al sa doprâ il cjâf e la scorie a podin saltâ fûr sindics, assessôrs e conseîrs tes listis civichis.
◆ Il Friûl al à di bisugne di sindics come chei dal taramot: no jerin Nembo Kid, ducj int normâl, ma che i crodevin che si pues fâ alc pe sô int.
Cucuc!
Il virus nol è un altri taramot, a son dôs robis diferentis, ma, par cont di altris fastidis, o sin sui paradôrs.
Il solit caghedubits, che in Friûl al è une costante come il pi grêc par cjatâ la aree dal cercli, al disarà “ma ancje se il Friûl al fâs une politiche pardabon pai furlans (clime, alimentazion, agriculture, ben stâ…) e chei altris dongje no si çugnin di distrigâ alc al è dut dibant, al è come puartâ aghe tal mâr”.
◆ No je vere. Intant si da l’esempli, come cul taramot. No nus baste di sigûr la Udinese par fâsi cognossi. E, po, vûstu meti, fâ une politiche pe salût? Tante prevenzion, par esempli. Cu la prevenzion nissune Big Pharma no cjape un carantan. Nancje la Novartis, par dînt une. Però si scurtarès la trasêf de spese sanitarie regjonâl. O no?
◆ – Baste la salût! – si diseve une volte. Ma o ai come la impression che nancje di chê no ur interessi cuissà ce ai furlans: tant e sarà simpri une pirule magjiche, une suposte a missil, un miedi dai miracui che ti comede. Cucuc!
Avonde trisculis
Almancul un 30% de energjie dal setôr agroalimentâr le mangjin i traspuarts. Cun dut ce che al coste il petroli, cun dut ce che al coste il gas! Cun dut ce che si paie di autostrade! E alore çugnìnsi, distrighìn, spesseìn a meti in govene filieris curtis: avonde cui sparcs che a vegnin dal Perù, lis glasimis dal Messic, lis nolis dal Oregon, lis coculis de Californie, lis frambuis dal Maroc, lis trisculis de Andalusie (par un chilo a van 800 grams di anidride carboniche, 280 nome pal traspuart), lis lints dal Canadà, i pevarons de Olande, i armelins de Murcia e i coçuts di jù pe Italie.
◆ L’avignî al à di sei chel di une agriculture “labor intensive”, familiâr e furlane, altri che camions, autostradis, puarts e aeropuarts e “just-in-time-delivery”.
◆ Vitaminis e lavôr, ve!. ❚