L’articul 132 de Costituzion taliane, al proviôt la pussibilitât di une comunitât di passâ di une realtât aministrative a une altre. Tal nestri câs, rivâ a passâ al Friûl di difûr, al fâs gole a tancj di lôr, forsit ancje par resons di oportunitât economiche legjislative, ma par podê pandi une reson di tâl fate, al covente mostrâ di vê une storie, une culture e une afinitât plui valide des resons di oportunisim. O vin fat une fevelade cun Alessandro Mauro, puartevôs dal grop che si bat par che Sapade e passi al Friûl.
La regjon dal Venit si è esprimude di resint in maniere positive su la cuistion dal passaç di Sapade a la regjon dal Friûl-VJ, cualis sono stadis lis reazions de int?
Al moment o vin vinçût la semifinâl e o podìn dî di zuiâse, la finâl a Rome. Lis reazions a son stadis di moderade sodisfazion. In tancj no i crodin ancjemò e a scrupulin che il Parlament nol rivarà a fâ une leç che e dedi legjitimitât al passaç di Sapade al Friûl. Dut câs il vôt in regjon al è stât un segn di grande maturitât e di grande inovazion positive tai rapuarts jenfri lis istituzions e il popul.
Il President Zaia al à declarât la sô opinion positive sul dirit pe autodetrminazion des popolazions, ma tal stes timp al à fat scrupulâ che la reson e sedi plui di oportunisim che no di partignince storiche culturâl. Se il Friûl al fos stât une regjon ordenarie, varessiso fat la stesse sielte?
O scuen dî che il partît che al fâs part Zaia, al à simpri sostignût in dutis lis istituzions, la idee che Sappde e podès tornâ a fâ part dal Friûl. Il prin a crodii al è stât il President da provincie di Udin, Pieri Fontanini che o ringrazii.
Dit chest, o pensi che il President Zaia, no jessint stât presint joibe (ai 28 di Jugn date de votazion in Consei regjonâl dal Veint, n.d.a), nol à podût lâ daûr cun suficiente atenzion a lis documentazions che a cjalavin al câs Sapade, ridusint il sô pinsîr a une motivazion dome di nature economiche. Tal 1966, prin des istituzions des Regjons, sedi ordinariis che a statût speciâl, a Sapade si è fate une consultazion dai cjâfsfamee: il 98% di lôr a volevin tornâ cun Udin. Prime dai statûts e je la storie a rispundi.
Ce che o vês fat al è partît dal bas, de int, cualchi aministradôr locâl al è stât pluitost fredut, cemût mai?
Se o tabaìn dai aministradôrs di Sapade o crôt che il lôr ategjament spaurôs al sedi di cirî te urgjence aministrative e a la pôre di no rivâ a gjestî il paîs spietant che a passin agns prin de decision dal Parlament. Il fat che i aministradôrs a vedin di dâ rispuestis imediadis e che la Regjon e tegni la borse des palanchis, ju à sburtâts tune posizion spavide e defilade, mancjant cualchi volte di chel sens civic necessari a sostignî la volontât popolâr.
Si sa che i caratars dai oms a son diferents, cui al nas leon, cui al nas piore. Il nestri moviment al è fat dal popul, ven a stâi 860 leons che a àn votât sì al Referendum… i aministradôrs locâi no si pues dî che a vedin la indule dai leons.
In ogni confront al esist il contraditori, tal vuestri câs cui si isal oponût e parcè?
Formalmentri, in pôcs e isolâts si son oponûts. La oposizion plui tremende e je chê di chei che no crodin che si pues vinci cheste bataie. Chei cuintri a fevelin di senaris indulà che dut il Venit al passi al Friûl o al Trentin.
Il mont politic furlan us aial poiât? E la int furlane us aie sostignût?
Dal mont politic furlan o vin vût une poie grande che no inmagjinavin. Fuarcis politichis e istituzionâls a son cun nô. Par sierâ la cuistion a Rome, a saran propit i politics furlans a jessi determinants. Disìn che a fâ gol cumò a varan di jessi lôr. Nô ju vin metûs denant dal puartîr e se a vuelin, cumò, a puedin sierâ la partide. (O dopri une metafore di balon par omagjâ il bielonon campionât Cjargnel indulà che di 40 agns al zuie il Sapade).
In spiete che Rome e disi alc, cemût imagjinaiso Sapade furlane?
Sappade e je za furlane. Dal pont di viste aministratîf o imagjinin un rapuart plui sempliç e diret cu lis istituzions. Sperìn di jessi part di chê rêt di rapuarts culturâi e economics che vuê o vivìn dome di sbis. Insome, o sarìn a cjase e chel al sarà impuartanton. ■
MAURO DELLA SCHIAVA
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +