Sapade in Senât e la regjon F-VJ e reste cidine

Ai 4 di Dicembar e je scomençade in Comission afâs costituzionâi la discussion dal dissen di leç presentât de senadore e sindic di Pontebe Isabella De Monte (dal PD) pal passaç di Sapade dal Venit al Friûl. O vin plui voltis ricuardât il percors dai Sapadins che cul referendum vinçût a vevin dit sì par tornâ, ancje dal pont di viste aministratîf, dulà che si sintin di stâ. Dute la storie e va te direzion dal Friûl e cumò la lungje bataie par chest ricognossiment e fronte il Parlament.
«Une strade ancjemò di rive sù – e dîs la De Monte- parcè che i contraris a son e a fasin di dut par frenâ i lavôrs. No vin di dismenteâ che dopo dal Senât, la leç e varâ di passâ ancje a la Cjamare dai Deputâts». Un moment delicât duncje, dulà che i sorestants de Regjon a varessin di jessi dongje des aspirazions dai Sapadins, ma il cidinôr, cuasit il fastidi, di Triest su la cuistion al è simpri stât une vore pesant. ❚
Redazion