Il Comitât 482 al denuncie, si spere che alc si movi e intant pe scuele simpri mancul beçs

Al pues ancje stâi che intun moment di dificoltât si decidi di taiâ cualchi vôs dal belanç. Si à di pretindi tal câs che e sedi une sielte fate cul cjâf e no un tant al chilo. Si à duncje di viodi in ce maniere distribuî lis risorsis restadis a disposizion. Il comitât 482, nassût par difindi la aplicazion de lec nazionâl a pupilance des minorancis linguistichis in Italie, al à presentât la situazion de prossime finanziarie regjonâl in merit ai bêçs che i tocjin al furlan. La denunzie e je clare: une sielte fin cumò in continuitât cun la vecje linie di Tondo, ancje de bande de zonte Serracchiani. Fin cumò, o scrivin, parcè che pal Comitât 482 e je le pussibilitât che tes comissions, e po dopo in aule, un alc di plui al puedi jessi zontât. Une puarte vierte duncje par verificâ se il centri çampe al à voie di cambiâ troi par chel che al tocje la marilenghe.
Prime des elezions, o vin scrit che la Serracchiani e varès tignût une muse denant e une daûr su cheste cuistion. La finanziarie nus da rason: il centri çampe a peraulis nol pues lâ cuintri lis leçs su lis minorancis parcè che a vegnin fûr de sô bande e parcè che fin chê altre dì al à dât cuintri a Tondo e compagnie, propit parcè che lis dineave. Ma ce che a contin a son i fats, e la propueste de zonte regjonâl pal belanç 2014 e puarte a un mancul 46% (ven a stâi -1.260.000 euros) pe lenghe furlane.
La robe plui grivie dut câs no je cheste, ma il fat che e sarà la scuele a patî plui di ducj cheste situazion. Vuê, cun cheste distribuzion di risorsis, difilcimentri al sarà pussibil meti man a une serie organizazion didatiche dal insegnament dal furlan tes scuelis. E je dibant – anzit, e sune tant che une cjapade pal cûl – la declarazion de assessore Panariti che e dîs “viodarìn di cjatâ i bêçs in Lui”. Sì, par fâ fâ i compits des vacancis!
Duncje, la veretât e je che il risultât di cheste manovre al sarà di meti i gjenitôrs, lis fameis che a àn domandât il furlan pai lôr fîs, di front al faliment de lôr richieste.
Un an sì, chel altri no, e la serietât, la continuitât didatiche e va a fâsi benedî. Cul risultât che alore al è miôr l’inglês, che pierdi timp suntune robe che no funzione.
Cussì si difindin i dirits des minorancis de bande de çampe: fasint fruçons.❚
✒ L’om di Buri