Sfuei Mensîl Furlan Indipendent
Archivi de Patrie

Vite sul confin dal Imperi tor de “grande” vuere (seconde part)

............

[La prime pontade sul numar di Novembar 2013]

Dissen di Giovanni Di Lena

A Visc, il Dean al diseva messa di matina bunora, e cussì a sunavin li ciampanis… il comant [talian, n.d.R.] al à crodût che il predi al des il segno che li trupis entravin ta tiara austriaca; una volta in paîs, i soldâts a son curûts subita in glesia; a àn guantât il dean, un ricevidôr di dogana e Domeni Gratton [al jere un cjamerari, ven a stâi un aministradôr de glesie, n.d.R.] ju àn cjariâts suntun caret tirât di un mus…rivâts in plaza a Palma, la int salvadia si à butât come bestiis cuintra di lôr, cun puins, patàs, e spudagi in musa, e al puar dean gi àn taiadi la viesta; l’è stât il siôr Brumat, cugnât di Pieri Gioitti [e jere int che e contave a Palme e a Visc, n.d.R.] che si à mitût tal miez e ju à svergognâts; un bregadîr al rideva a viodi chista commedia, ve ca la civilizazion!”. Chest mal à contât Onorio Del Ponte, un om di Visc, e bon pitôr, che al veve vivût diretementri o indiretementri chei moments; ma lis versions, pûr cun cualchi piçule diference, a son simpri su cheste ande (une sessantine di predis a son stâts depuartâts de arcidiocesi di Gurize, e miârs di personis).
Pre Justulin – par spaurîlu, a Palme, i soldâts i vevin metude in pîts ancje une finte fusilazion – tornât a cjase a pene tal 1919, nol à mai volût savênt di meti plui pît a Palme… nancje par lâ a cjatâ so fradi che al stave par murî. Fra la int puartade vie, Luzia Gattesco “par jessi massaria di internâts” (Giorgio e Sara Milocco), Maria Sollig cui fîs Mario, di 5 agns e Amerigo, di 3, par vie “che e jera femina di un funzionari austriac”. Dolfo Schubert (al jere il vicepodestât di Visc) al murì in esili a San Severino Marche.
✽✽
L’archivi de parochie butât par aiar: lis cjartis che Justulin al veve metût dongje pe storie di Visc sparidis e, “La cassa da Glesia  – intor das 500 coronis – veva cjapât il svol dopo vê scassinada la cassafuarta inta canonica dopo da nestra ocupazion”, al scrivè don Ostuzzi. Chest predi al fâs capî des sôs letaris di jessi dongje dai problemis de int (pai fruts al veve cjapât in man la dissipline, stant che i paris a jerin in vuere), ma nol jere tal câs di capî che al jere jentrât intun mont diferent (si ben che al fos de arcidiocesi di Udin). A fevelâ par lui, la letare che i à scrit il comissari dal re ai 26 di Jugn dal 1915: “… Il segn tradizionâl di cheste int in plui di mieç miâr di agns di domini da la Austrie, al à distudât ‘la voce di razza’, no je une dificoltât che no si puedi passâ pe mê mission. Chest, par vie che cumò intrics e dolôr di un an di vuere a àn lassât tal cûr dai furlans che a crodin dome un sintiment: ven a stâi la sperance di une pâs plui vicine che si pues. In chest mût di sintî de int jo o cirarai di incalmâ une propagande prudente, planc a planc, ma penze”. Parfin in lui, gjornalist, personaç dal moviment catolic dal Friûl bande Udin, la propagande e il nazionalisim a vevin scjafoiât la analisi storiche.
Cumò al sarà ben cjalâ di dongje pre Mesrob Justulin, dean di Visc dal 1907 al 1921. Nassût a Dael, predi a scomençâ dal 1898; persone di culture, bon di organizâ, caratar fuart, plen di volontât; no si tirave indaûr cuant che al jere di “lâ cuintra”. Al jere un dai predis “sociâi”; in paîs al veve fondade la casse rurâl, ma prime di dut al jere pastôr di animis… Tornât dal internament in Italie dopo tancj patiments, il gnûf guvier i veve proibît di tornâ tal so puest, cussì al fo promovût a dean di Acuilee.
Prime di partî, te cronache di Visc al lassà cualchi note storiche che e fâs intindi la sô idee dal nazionalisim: il cancar dal Stât. Al capive in ce maniere che a stavin lant lis robis e al osservà: “la tendenza a purgâ la lenga e scancelâ dut se che nol è propi prodot nazionâl, a fasarà sparî ancia chiscj documents storics”, e ancjemò “Il nazionalisim estremist – di essi ‘rampolli’ di Romolo e di Remo (no sai, dal rest, se gloria che a sedi) e je una roba ridicula…”.
✽✽
Plui voltis al fevelà de injustizie che lu veve scrofât, ma pûr cun spirt di perdon cristian, al pandè in public la sô acuse, a Vuanis (ai 8 di Lui dal 1920), cuant che, cun tancj confradis, al celebrà il ricuart di pre Ernesto Scremin, muart in esili a Viareggio ai 19 di Zenâr dal 1919: une laut funebre imbombide di drame e di passion: “…Taponìn… cul mant da caritât l’esecrabil tratament sopuartât di don Ernesto e di una vora di noaltris predis, e svolìn parsora cun granda anima cristiana a dutis li persecuzions e li injuriis che nus àn fat… Pari, perdonigi, par via che no san se che a fasin…Don Ernesto nol piardè mai il coragjo, nol si avilì nancia tai fats plui penz ta presons di Palma e di Udin, ni tal dolôr dal reclusori di Cremona, e parfin nancia ta desolazions dal cjamp di concentrament da ‘orrida e torrida’ Sicilia…Don Ernesto Scremin, a 34 agns al spirà la sô biela anima al Creatôr…murint in esili, come citadin suspiet, pericolôs pal Stât…”. Su Justulin si podarès ancjemò contâ une vore, di tornâi almancul alc di chê justizie che al merte; chest par vie che la storiografie uficiâl no si à interessade di lui, stant che da râr e à mostrât di interessâsi par altris vôs che no fossin chês imbombidis di retoriche o dal eroisim de violence. I storics dal ex Friûl austriac a àn fevelât di lui (une vore, il batistrade di chescj argoments, Camillo Medeot). Ma dopo de vuere, come ofesis a int benemerite, al è saltât fûr ancje di piês, par esempli cuant che il Consei Comunâl di Gardiscje i à tiradi vie la citadinance onorarie al deputât catolic a Viene e Cjapitani de Contee di Gurize e Gardiscje Luigi Faidutti (1861-1931); e a lui la violence nazionaliste i veve decretadi l’ostracisim!
✽✽
Justulin al le dean di Aquilee e al scrivè tal cjamp de divulgazion storiche, no – si capìs – in prospetive nazionaliste, ma di Aquilee tant che fâr de cristianetât. Lui al fo ancje rimadôr, in furlan e talian. Intune strofe dedicade ai predis, si pues cjatâ ancje par lui une definizion che i sta propit juste: “…Siete stelle fulgenti di luce,/ siete regi potenti d’impero,/ begli atleti del buono, del vero/ chiari raggi del sole divin…”. Un Stât che al intindi jessi a pene a pene just, al dovarès pensâ in maniere serie a chê operazion che, cun peraule plene di gramece, si clame riabilitazion!
Pôc prime de ocupazion di Visc, la int e je restade calme, no mostrà inimicizie cuintri chescj gnûfs rivâts; e le daûr dai conseis dal dean Justulin: ju veve dâts la zornade prime, intant de funzion dal mês di Mai (al jere di domenie).
✽✽
Il paîs al fo lûc di un grant moviment des retroviis, massime dal pont di viste sanitari: a jerin li almancul cinc ospedâi. Al è stât il 0.35 de Crôs Rosse Taliane a vê il moviment plui grant: al jere chel intes tendis plui grant di Italie: 1.000 puescj jet! Tai ospedâi (dal 1915 al 1917) a son muarts 1071 soldâts e une otantine di civîi di dute la Contee. Il prin a lassâ la sô zovine vite al fo un soldât napoletan. Tal 1915, une tremende epidemie di gastroenterite e câs di colere; cualchi câs di tif tal 1916 e une vorone di meningjitis; il gas al fasè un centenâr di muarts tal 1916. I numars cence anime no contin e no mostrin la anime sbregade, a viodi la muart protagoniste di ogni dì, banalizade di certificâts e regjistris, ma pronte a dâi anime ae vite che e va vie, ai lûcs, a personis, parincj, strachis peraulis di ordin che si distudin intun timbri e intune firme!
Tal Otubar dal 1917, Cjaurêt, la liberazion des nestris tieris. I Talians, in ritirade, a brusarin lis scuelis, a faserin a tocs i dipuesits. A forin simpri lis feminis a ufrî la resistence al sburt dai events, a salvâ ce che si podeve, a lavorâ la tiere, une tiere simpri plui crote che e dave simpri di mancul, e propit lôr, lis feminis, le bonificarin di tantis porcadis che la tiere e veve sopuartât, inneade di glerie e di cogui…
✽✽
Ai 31 di Otubar dal 1917 (al sarà sepulît ai 3 di Novembar) al mûr, cence non, un “… puer decem annorum servitio addictus apud genium militare e ferrara ab Italis relictus aegrotus in nosocomio militari C.R.I. 35”.
No si sa propit cuant, ma dopo Cjaurêt, a Visc, al nas Borgo Piave, pai sfolâts dai paîs su lis rivis de Plâf martielâts des bombis. A jerin in 400 e a forin sistemâts in vincj par barache. I locâi a jerin stâts tirâts sù  “cun ducj i comforts modernis”, secont il podestât di Visc, ma il stât di chê puare int nol doveve jessi alc e ce: dai 18 di Dicembar dal 1919 ai 28 di Novembar dal 1921 a nasserin là cutuardis fruts, e vot di lôr a son muarts; il plui grant al veve tredis agns; i plui piçui a àn vût un destin cussì curt che ancje a vuê, dopo tancj agns, a comovin. A nassevin prime dal lôr timp: il prin, gjavât fûr muart ai 6 di Lui dal 1919, nol à vût nancje un non; la zimule, che e à viodût la lûs ai 7, e je vivude dome une dì, ma almancul un non lu à vût, batiade Teresia (i gjenitôrs a jerin di Noventa de Plâf. I certificâts di muart a fevelin intune maniere che nol è dificil stroligâ cualis che a jerin lis condizions di che puare int).
Cui che al jere lontan de patrie al sburtave par tornâ. Chescj desideris leâts ae proprie int e aes propris tieris no podevin jessi esaudîts: su la Plâf, la soference e jere ancjemò pesante. Ai 19 di Lui dal 1921, un curt, ma plen di anime, telegram dal sindic di Noventa de Plâf a chel di Visc, clâr clâr al diseve: “… si pree di suspindi cence fal il rimpatri dai sfolâts, stant che al è impussibil dâur un ricovar…”.
✽✽
A vuere finide, Visc al scomence planc a planc a tirâsi sù di une crisi tremende, sociâl, ma ancje economiche, stant che nol jere plui il confin che al dave une vore di lavôr. In vuere, a forin une setantine di Vischês: di lôr, cuindis no son tornâts. Tal cimitieri militâr a polsavin tancj zovins muarts, dispès vignûts di tieris lontanis; i soldâts furlans da la Austrie, il “nemì”, no àn vût fortune nancje te muart e a àn dovût restâ lontans de lôr patrie, par vie di chê antighe che no rivave a fâju tornâ, e di chê gnove che no i interessave di lôr, ma un doman dut al podarès jessi miôr e forsit, la “patrie” gnove mancul avare di amôr e di justizie. Al jere vignût il moment de pietât (…cuant che e jere) e di altris lotis, sui principis, lis tradizions, e pe vision sociâl e politiche.
L’Archivi de parochie di Visc al à une vore di letaris di gjenitôrs che a cirivin i fîs muarts in vuere o cul desideri di fâ tornâ i muarts tes lôr tieris. Il cimitieri militâr al jere une grande peza a retangul fisse fisse di filis, une compagne di chê altre, cu lis tombis; tal mieç un strop a forme di crôs, e une mitraie, “ricuart” de vuere, tal viâl di mieç.
Forsi chest vivi insieme il dolôr par cui che al jere lât e il cirî chei che no si cjatavin al è stât il prin element di union, intun moment che pûr al veve ancjemò une grande cjarie di violence.
✽✽
Subite, un scuintri cu la gnove realtât al è saltât fûr pal insegnament de religjon intes scuelis. Tal periodi dal armistizi, dopo de ocupazion taliane, il comissari gjenerâl civîl, onorevul Augusto Ciuffelli, in contrast cul dirit internazionâl e cence passâ part al guvier, al ordene di bot di çoncjâ la pussibilitât dal insegnament de religjon e, in ogni mût, no in orari di scuele. Il decret Ciuffelli, ispirât in maniere ideologjiche ancje di ambients dal puest, al discjadene une violente reazion: proteste des jerarchiis eclesiastichis, petizions talianis, cravuatis e slovenis firmadis dai gjenitôrs des trê etniis, e mandadis aes autoritâts centrâls. Manifestazions spontanis di contrarietât si learin a voltis ae inimicizie cuintri chei “rivâts ca di pôc”. A Vilès, lis maris di famee a larin a protestâ, cence rivuarts, prime a scuele e dopo in municipi. “A ciasa il predi!”, e sberlà une di chês, “Che a ledin a cjasa lôr, che nissun ju à clamâts!”. Al jere clâr che ai siei predis la int ur voleve ben.
Intune seconde circolâr, Ciuffelli al ordene che ogni dirigjence scolastiche e cirìs cuâl che al jere il volê dai gjenitôrs rivuart al insegnament de religjon, cuntune schede dulà che si doveve scrivi un sì o un no e meti la firme. La rispueste e fo corâl: sì il 95% a Triest, e il 99% te provincie di Gurize, tant che si reste scaturîts a viodi la diference fra chest sintî e i risultâts des elezions che a son vignudis plui tart.
Ai 21 di Novembar dal 1920, il guvier Giolitti al ricognossè lis disposizions austriachis in materie di insegnament de religjon. Camillo Medeot al viodè in cheste sielte “… la olma pardabon liberâl di Benedetto Croce, in chê volte Ministri da Publica Istuzion…”.
Une retoriche di fals patriotisim e à contât lis robis in maniere diferente e lis à trasformadis parfin in bausiis di piere e di marmul, come la lapide ingrampade su la façade dal municipi di Visc, che e ricuarde la anession vignude dal 1921.
Par dî la veretât, chel aniversari no i à vignudi tal cjâf a di nissun e al è un ben, segn che – magari in maniere soteranie – chel che al è vignût a flôr a pene cualchi desene di agns fa, cul fondamentâl libri di Camillo Medeot, al jere cognossût magari tant che revoc, revoc di unitât che nissun al volarès meti in discussion, però madurît intun clime di prejudizi e di prepotence che si dovarès cognossi, par un just ancje se une vore tart, risarciment morâl.
Par dut chest, pluitost che « celebrâ » une vuere, al sarès une vore miôr studiâle ancjemò un toc, par viodi che la vuere, propit nissune vuere, no rive a fâ miôr il mont, ma lu strucje simpri di plui… di Caìn incà! ❚
✒ Ferruccio Tassin

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +