La identitât e pues rindi ancje in economie

La vicende de aziende siderurgjiche Palini e Bertoli di S. Zorç di Noiâr, cussì come chê de Electrolux, a segnalin cun fuarce la diference tra impresis e, soredut, tra imprenditôrs che a vivin e a progjetin il lôr futûr intal teritori e chei che, invezit, a àn tant che riferiment gjeografic e fisic cualsisedi lûc dal mont.
Pes multinazionâls, di fat, un sît dulà colocâ la ativitât produtive al vâl chel altri e la uniche carateristiche calcolade e preseade dal lûc là che a son lis lôr fabrichis e je chê di podê gjavâ fûr dut il profit che si pues. Chestis grandis impresis sorenazionâls, masse dispès no sintin nancje il sens plui piçul di responsabilitât viers des lavoradoris e dai lavoradôrs, figurìnsi intai confronts dal teritori e de comunitât che ur àn dât acet.
Nol è pussibil, però – viodude ancje la situazion de imprenditorie locâl – rinunziâ a capitâi e ai invistiments forescj. A cundizion che cuant un “font” o un grant grup si propon, a sedin subiets a valutazions e verifichis aprofondidis su la lôr vocazion industriâl reâl, par evitâ disposizions speculativis dal gjenar “beche e scjampe”.
Se po dopo al è fintremai l’aiût public, par chestis realtâts a van metûts palets e regulis par stabilizâ la permanence sul puest par un periodi congrui.
Dut câs, chest nol baste. Il teritori al à di jessi tratîf, ven a stâi al à di jessi apetibil, sedi par cui che al fâs za imprese sedi par cui che al vûl inviânt une gnove.
La politiche regjonâl, duncje, e à di impegnâsi a meti in vore chei fatôrs competitîfs di contest che a facilitin il sucès des aziendis: infostruturis, infrastruturis, ricercje e inovazion intes impresis e cu lis impresis, burocrazie amie e no ostative, formazion professionâl smirade, e v.i.
In plui, si à simpri di visâsi che un teritori al è tant plui tratîf se li si pues ancje vivi ben, se nol è desolât e al ufrìs la pussibilitât di gjoldisi lis bielecis artistichis, paisagjistichis, culturâls, ambientâls e, parcè no, enogastronomichis. Ve parcè, par esempli, l’eletrodot Redipulie-Udin al va intierât!
Al reste il fat che chescj agns di crisi industriâl profonde a àn fat capî, o speri ancje ai liberiscj plui oltranciscj, che la economie e scuen no dome jessi reâl, ma ancje riteritorializade, ripuartade al teritori.
Ancje parcè che intal mont globâl a varan sucès e si fasaran indenant chês regjons e chei teritoris bogns di fâ sisteme, di fâsi ricognossi, di caraterizâsi, di fâ valê – in definitive – lis propriis origjinalitâts e particolaritâts.
Intun mont simpri plui omogjeni e indistint, la identitât – se e je vierte e ben spindude – e je un valôr zontât ancje in economie. ❚
Roberto Muradore
Segretari gjenerâl de CISL di Udin