MUSIS DI… FACEBOOK. Pal Friûl no i vûl cjavei… ma fantatis bielis

Intal 2013, La Patrie dal Friûl e à inviade la sô pagjine Facebook. Un imprest par difondi il gjornâl, ma ancje par incuintrâ e dialogâ cui letôrs e cu la int che e frecuente il social network. E cussì al capite di cjatâ cualchi realtât interessante…
✽✽
E je la pagjine cul non furlan plui frecuentade e mancul politically correct che e sedi, tacant za dal non: “A vûl bighe e no cjavei”. A Novembar e à passât i 20.000 iscrits. E je une pagjine gjestide di plui di un di lôr, ma dopo un pocje di ricercje ae fin o vin rivât a cjatâ fûr il fondadôr.
–––
Mandi Simone (il cognon no tu vuelis dîlu…), di dulà sêstu, trops agns âstu e ce fâstu te vite?
Mandi, o soi di Spilimberc, o ai 39 agns e o soi un libar professionist.
–––
Cemût ise nassude la pagjine?
Personalmentri, o ai simpri amade la bandiere dal Friûl e mi soi domandât cemût che o varès podût fâ in mût che e fos il plui pussibil visibile. Dopo cualchi ricercje sul web, la pagjine su Facebook mi à parût il metodi miôr. Duncje o ai decidût, tal timp libar, di creâ e di fâ cressi la pagjine.
–––
O disevi te introduzion che la vuestre pagjine no je tant “politically correct”. Par esempli, une des carateristichis e je la publicazion di fotografiis osée di feminis (e, par dî la veretât, cualchi volte di oms) ma “caraterizadis” ae furlane, dant a chestis frutis un non e une provignince di chenti. Cemût ise vignude fûr cheste idee? Si puedial dî che e je stade un dai motîfs di sucès de pagjine?
Mi plâs chest pinsîr di Seneca: “Nol esist aiar favorevul pal marinâr che nol sa dulà lâ”. La mission de pagjine e je la difusion de bandiere dal Friûl su internet, duncje tocje agjî di consecuence. Postâ fantatis nininis e batudis divertentis al è il miôr mût par fâ cressi une pagjine Facebook amatoriâl e duncje la visibilitât de nestre bandiere!
–––
E lis feminis, ce disino des fotos “osée” des fantatis? Mi pâr che a ‘nd è tantis iscritis distès…
Lis feminis a fasin batudis simpatichis sui post (rârs) là che o metìn fantats gaiarts! Mai volgârs, però si ingropin cui post des besteutis… Ve mo, lis feminis…
–––
In trops sêso a aministrâle, e cemût si devential aministradôr? Lis “iscrizions” sono ancjemò viertis?
Al moment, o soi l’unic aministradôr, plui un amì che mi da une man. Cetantis personis mi contatin par partecipâ a chest gno progjet di difusion de bandiere furlane. Purtrop, a son aspiets tecnics che mi impedissin di fâju partecipâ. Ma in curt o cumbini di cjariâju ducj. Plui o sin e miôr al è.
–––
In gjenerâl cuâi sono, a part lis bielis frutis, i contignûts che a àn plui sucès? E cuâi sono i post in particolâr che a àn vût plui sucès, che a àn zirât di plui su Facebook?
I contignûts di plui grant sucès a son lis imagjins dal nestri Friûl (paisaçs, oparis di art, paîs) e lis vignetis divertentis cun batudis, miôr se par furlan. I post, o ju fâs jo o ju condivît de rêt. Cualchi nestri post al à vût 5.000 condivisions, che par une pagjine amatoriâl a son une enormitât.
–––
O publicais ancje post in lenghe furlane e a son in tancj che a comentin in lenghe. Secont te, cemût ise la presince dal furlan su Facebook?
La lenghe furlane e je un valôr zontât che o vin di difindi cui dincj di cui che – cence vê origjins di podêsi svantâ – al vûl che e discomparissi. Su Facebook un grum le doprin e, tancj di lôr – chest al è interessant – a son zovins. Jo, tal gno piçul, o fas chel che o pues. Mi auguri che lis istituzions a cjapin cussience des potenzialitâts dai social network, ma al vûl timp. Il gnûf e la burocrazie a son tant che il cjan e il gjat.
–––
L’aministradôr de pagjine “Brute di muse, biele di buse” (lu vin intervistât tal numar di Otubar, ndr) mi diseve che cui che nol è usât a doprâle al è plui facil che si buti a scrivile, sedi in internet o cui sms, che no a fevelâle. Ce pensistu?
In efiets cheste osservazion e je interessante. Une lenghe si salve se si le scrîf e se si le fevele; Facebook al pues fâ la sô part, in chest sens. Jo mi auguri che lis istituzions locâls a capissin che, se lôr no doprin i social network, nol vûl dî che une part consistente dai furlans no lu fasi. Vuelino salvâ il furlan? Che a doprin ancje, ma no dome, internet.
–––
O publicais ancje contignûts politics, tantis voltis ancje provocazions. A voli, la pagjine e je orientade a diestre, isal cussì? E ce idee âstu dal Friûl?
Par jessi sincîr, jo o soi di centridiestre e autonomist, però cuant che o viôt porcariis lis denunzi, che a sedin di diestre o di çampe. Jo o crôt inte democrazie là che ducj a puedin esprimi in maniere libare lis lôr ideis.
Il Friûl? E je la mê Patrie, e al è un dovê di ducj noaltris che, cuant che o murarìn, le lassedin miôr di cemût che le vin cjatade. O viôt dome un difiet di limâ. O dopri lis peraulis di Pre Checo Placerean  «Il sotanisim e je une brute robe, une malatie che o vin assoludementri di vuarî». Vive il Friûl! Vive la bandiere!
–––
A part la tô, cualis sono lis miôr pagjinis o i miôr profîi dai furlans su Facebook?
Dutis lis pagjinis dai Fogolârs Furlans, parcè che nus rapresentin tal mont! ❚
Dree Venier