Viers il cidinôr Gijviane vistude di fieste pe VI edizion dal Festival dal Cjant spontani

Al è di diviers agns che Gjiviane si vistìs di fieste, vierzint puartis e barcons, par dâi acet ae zornade conclusive dal festival dal cjant spontani. Chest an, la VI edizion dal festival – organizade de associazion Culturâl Furclap di Udin – e veve par titul ‘Viers il cidinôr’. Un titul che al podarès jessi interpretât ancje come il cidinôr des istituzions, il cidinôr culturâl viers chest mont che si sta pierdint, se no fossin lis personis interessadis a tramandâ oralmentri il patrimoni storic e culturâl dai cjants spontanis de nestre int.
Chest an a Gjiviane, in gracie di une ricercje storiche fate di Novella Del Fabbro cu la colaborazion di Leo Gracco, e je stade puartade in lûs une vecje tradizion, pierdude intai agns ’60: la benedizion de crôs di Lorene, tipiche di Gjiviane, che e vignive fate cun piçulis stechis di neâr in ocasion des processions des rogazions.
Tal dopomisdì, te gleseute di Gjiviane si son sparniçâts ta la arie i cjants des vôs de Onorande Compagnie dai Cjantôrs di Çurçuvint, da Las Puemas di une volte di Paulâr, dai doi artiscj Barbara Zanoni e Predrag Maric e dal rapresentant dai cjantôrs di Viganella (Verbania) .
“La vierzidure de VI edizion, in realtât, e je stade fate ai 26 di Març intal Museu Etnografic di Udin, cuntun conciert de Onorande Compagnie dai Cjantôrs di Çurçuvint”, al conte Giovanni Floreani, organizadôr – cun Novella Del Fabbro – dal festival. “Ai 5 di Jugn o sin lâts a Rome, tal Fogolâr Furlan, a presentâ il festival. Dopo trê agns di riflession sul teme dal ‘Sacri’, o vin resonât sul ‘Cidinôr’,  tacant cuntune performance a Vignesie dal titul ‘I Suoni di Venezia’. O sin lâts indenant cun doi apontaments a Udin (Museu Etnografic) e a Fare dal Lusinç (Museu de Civiltât contadine), cuntune schirie di intervents une vore interessants. La partecipazion e je stade buine, ancje se il festival si caraterize tant che un event di nicje e no je nancje nestre intenzion di fâlu deventâ plui grant. O vin programât une sorte di events itinerants (sedi in Italie che tal forest). O stin za pensant al an cu ven, previodint la organizazion di une cunvigne a nivel nazionâl che o fasarìn – probabilmentri – a Vermiglio, in provincie di Trent.
O vin voie di coinvolzi docents, students, musicolics, filosofs e altris personaçs de culture e da la art, par rifleti sul cjant spontani o pûr – se o volìn – arcaic, dal pont di viste tecnic (lis lidrîs, tal câs furlan, dal vecjo cjant patriarcjin), des assonancis tra lis regjons di Italie (massime Sardegne, Provence e dute la aree alpine) ma ancje Istrie, Dalmazie, e v.i., e ancje sot l’aspiet filosofic. Ven a stâi, cemût podaressie jessi la vite se il concet dal cjant al fos plui slargjât? Il cjant spontani al significhe lentece, sobrietât, socializazion e, di là di cemût che si cjante, al podarès jessi un fenomen catalizant par modificâ in miôr la societât dal dì di vuê. Utopie? Forsit, ma nô o provìn distès a cjantâ.”
E, come che al diseve Padre Maria Turoldo, ‘fin cuant che un popul al cjante al è inmò ce sperâ”. ❚
Marta Vezzi