Sfuei Mensîl Furlan Indipendent
Archivi de Patrie

SAN SIMON. LETARE. E parcè no une pidade tal cûl a Tolazzi?

............

No si oyes simpri tasê e fâ i furlans. Al ven il moment li che si scugni jessi triscj.
Ogni an mi tocje di lei sul ‘gjornâl’ il coment di Tolazzi, president de jurie dal S. Simon di Codroip, sul stât da la leterature furlane, dal biel scrivi in marilenghe.
A son considerazions che mi fasin mâl al cûr e mi urtin. Ce che mi fâs soredut stâ mâl al è il fat che a rivin di un tâl che al à un concet da la leterature avonde discutibil, che al pontifiche cuntune libertât di no crodi, cjatant il consens da la puare intelighenzie furlane che e sta ancje a sintîlu e i rispuint.
O scrîf cheste riflession parcè che no soi di bessôl a pensâle cussì. Mi è vignût il confuart di pre Roman Michelotti che sul numar di Otubar da la Patrie dal Friûl al ripuarte un articul dal grant Antoni Beline dal 1985, dal titul une vore significatîf “S. Simon: a cuant un premi pe zurie?”
L’emerit president dal S. Simon lu ai cognossût tal 2009 a traviers il so articul al Messaggero. Mi impensi che a chel S. Simon o vevi mandât un cuindis contis in marilenghe. Parcè? Mi plâs scrivi par furlan cul intent di condividi cualchi esperience cun altris furlans; ce che al sucêt par solit cu la nestre piçule lenghe che no ti da bêçs e tant mancul sucès e visibilitât.
Tolazzi al jere dentri chê jurie che e veve tacât i lavôrs cun cinc di lôr, ma dopo a àn finît dome in trê: Tolazzi, Turello e Marchetta. Interessant ancje la posizion di chest ultin che un an al judiche e l’an dopo, e chel dopo ancjemò, al è judicât e al vinç cu la stesse comission. Al sucêt ancje chest!!
Nissun al à mai savût nuie di Aldo Colonnello e Giacomo Vit, sparîts di chê jurie 2009. Parcè? Ce jerial sucedût? Bastavie une aspirine?
Subite dopo la premiazion di chel S. Simon, l’articul di Tolazzi sul Messaggero dal Otubar 2009. La mê prime impression in chê volte e je stade di un scrit di une persone veramentri inrabiade cun cualchidun, o di un mat di manicomi, tante e jere la violence dal articul.
Di sigûr trê osservazions mi vevin lassât scaturît, dificilis di dismenteâ.
La prime. Il nestri espert al sostignive che la conte no varès la dignitât dal romanç. Balis. Si sa che i grancj autôrs a àn scrit contis e romançs, e tancj a son plui famôs pes contis che a àn publicât.
La diference e po jessi la lungjece e la complessitât da la trame, ma a àn il stes valôr leterari, a puedin rivâ al stes pathos.
La seconde. Il nestri grant al diseve che i partecipants al S. Simon 2009 no san scrivi, a improvisin. Il motîf al jere che no son usâts a lei. Al seguive il paternalistic invît a cjapâ sù i libris, a tornâ a scuele. Lu ai fat. Mi son bastadis la leture da ‘La Salamandrie tal Fûc‘ e la sô traduzion/interpretazion dal Odissee par capî la sostance. Pocje robe di un che al olse. Dome tecniche e nissune emozion.
La tierce osservazion. Il Tolazzi al descriveve i ‘vielis’ partecipants a chel S. Simon e i lôr scrits cuntune acezion taliane che no mi impensi di precîs, che però o podìn definî par furlan come … ‘a pucin di frait, di muart’. Incredibil! Dopo o ai pensât che l’espert si riferive di sigûr a se stes.
O pensavi che e fos la fin dal Tolazzi, che si fos copât, invezit, al è inmò ca, president dal S. Simon 2010, 2011, 2012, 2013… S. Simon nol à fat il miracul.
Cualchi considerazion finâl. Claramentri, no soi in linie cui intervents che a àn tabaiât e a tabaiaran da la pocjece da la culture furlane, da la leterature furlane, ma pluitost o vuei sotlineâ la pocjece da lis personis che nus rapresentin. Al è simpri cussì cun nô furlans. Un invît al sindic di Codroip e ai tancj zovin furlans di valôr a dâ une pedade ai Tolazzi, Zanon e Donada, e a doprâ la marilenghe, a scrivile cence pôre, par continuâ un patrimoni che nol à di finî. Une biele netade di dutis chestis personis autoreferenziâls di pôc valôr che no puartin a nuie e a dan lûc a ducj i atacs cuintri il furlan e la nestre identitât.
Mandi,
Graziano Urli (Listize) ❚

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +