Vê cussience de nestre condote
e des reazions che o vin
Cuant che o pensìn al razisim, nus vegnin tal cjâf soredut ofesis e resonaments di asse. Te realtât, il fenomen al è une vore complès. Si plate ancje intes peraulis che o doprìn, in tantis batudis velenosis tai confronts di altris che a son te cundizion di incassâ cence reagjî.
◆ Stereotips e prejudizis a àn origjinis diferentis. A van de ignorance ae pôre di cualchidun che no si cognòs o di chei che a àn usancis diviersis. Cun di plui, il sens di apartignince a un popul e a une comunitât al pues bastâ a no tirâ dentri dai confins (fisics o mentâi) un forest.
◆ Il razisim al rive di un mût di pensâ, une interpretazion de esistence une vore antighe: la tindince a dividi il mont in “noaltris” e “chei altris”. Une distinzion che e devente pericolose tal produsi jerarchiis, dulà che ciertis personis a son calcoladis inferiôrs, pôc afidabilis o mancul meritoriis di pussibilitâts nome par vie de lôr divignince, dal colôr di piel, de culture o de religjon.
◆ Frasis che a somein no fâ mâl a di nissun, sul model di “i forescj a son brâfs tai lavôrs manuâi”, ancje se a puedin someâ un compliment, a ridusin cetantis personis a une cualitât ugnule come se altris rûi no fossin taiâts par lôr. Domandâ a cualchidun di famee foreste ma nassût e cressût in Italie “di dulà sêstu pardabon?” e je une altre espression di integrazion falade intune comunitât. Maraveâsi se un stranîr al fevele ben furlan o talian al mostre une spiete implicite su la sô inferioritât culturâl.
◆ I prejudizis no son mai facii di ameti. Ideis e associazions mentâls, interiorizadis vie pal timp, a vegnin de formazion personâl, de comunicazion (imagjins, art, musiche, cines, publicitât, articui di gjornâi e vie indenant), de storie e dal contest sociâl dulà che si vîf. Fintremai chei che a son convints di vê une mentalitât vierte a puedin colâ in automatisims mentâi che no simpri a coincidin cui valôrs di avualance che a professin.
◆ Po dopo e je une dimension une vore largje dal probleme: il razisim struturâl. Al compet il funzionament des istituzions e lis oportunitâts sociâls. Fâs cont une persone cuntun non percepît come forest che al cjape mancul rispuestis ae domande di lavôr rispiet a un candidât talian, ancje se il curriculum al è compagn. No dome une evenience isolade ma dispès un segn di un mecanisim discriminatori plui larc.
◆ Il prin pas che o podìn fâ nol trate di dineâ la evidence, ma domandâsi cemût che cualchi diference culturâl e je considerade strambe o mancul civilizade. Invezit di incolpâ lis personis che za a son discriminadis, sfuarcìnsi di scoltâ lis lôr esperiencis, di promovi leams basâts sul rispiet mutualistic, di corezi batudis discriminatoriis e di svuincâ gjeneralizazions e etichetis.
Ricognossi il razisim, sedi tes formis esplicitis che in chês invisibilis, nol divît la societât; al contrari, al è un dai struments plui impuartants par rindile inclusive pardabon. ❚
