Organarie furlane: inovâi e tradizions che a rivochin ator pal mont

Lant indenant cui aniversaris e dant un cuc ae tradizion de organarie furlane, ve che chest an a colin i 70 agns de nassite di Francesco Zanin, organâr vîf e une vore atîf, tant che al espuarte i struments liturgjics fats di lui par dut il mont, fintremai in Gjapon. E je resinte e gnove di une sô partecipazion direte tal restaur e pe costruzion di orghins gnûfs inte Basiliche di Sant Marc a Vignesie. Augurons a Francesco e compliments pes sôs mans e orelis di aur! Partî di lui al significhe partî dal ultin anel di une cjadene secolâr, fate di buteghis, maestrie tecniche e fedeltât a un mistîr che in Friûl al è deventât art. La storie de famee Zanin, che o vin bielzà contât in plui ocasions e cun grant plasê in chestis pagjinis, e je une vere epopee: il cjâf mestri Valentino Zanin, dopo di lui Giuseppe e Pietro, daspò Beniamino, chest an i 170 de nassite, duncje Francesco senior, Giuseppe senior, Gustavo Zanin, il dean dai orghins, e Francesco; la continuitât di cheste scuele ecelente dal orghin, colme di une civiltât dal orghin dute furlane. Par fâ cualchi non impuartant, al vûl citât, slargjant i nestris orizonts, Francesco Antonio Comelli, di Udin, nassût tal 1753, Giacomo Bazzani, di Cjavàs, chest an i 170 agns de muart. Cjargnei a son Pietro Antonio De Corte, di Davaste di Davâr, chest an 160 agns de muart. A lôr si zontin i Bossi di Romans dal Lusinç, altre famee che e dimostre trop che il savê fâ furlan al fos stât bon di movisi bielzà a chei timps ator pe Mitteleurope. Tra i organârs plui antîcs de nestre storie al ven fûr il non di Giovanni Spica, atîf dal 1550 tra Bologne, Vignesie, Cenede e Glemone, e metint dentri ancje chei no nassûts in Friûl, ma atîfs achì di nô, bisugne almancul nomenâ Pietro Nachini, Gaetano Callido, Francesco Dacci.
◆ Tornant chenti, la fuarce de nestre art organarie e je no tant intun non bessôl, ma intune costelazion di fameis, tra la mont e la plane, buinis di trasformâ il len, il metal, l’aiar e la mecaniche intune e plui vôs, sunôrs che vie pai secui a àn compagnât e a continuin a compagnâ la liturgjie, ma ancje la identitât de nestre comunitât. Il patrimoni organistic de nestre regjon, censît graciis ae ativitât di ricercje promovude dal Côr Polifonic di Rude, nus mostre cun evidence trop che cheste tradizion e je sparniçade e inlidrisade, chi di nô ma no dome. Par dut il mont. ❚