“Salacor la strade e à di jessi un tic di rive jù. Parcè che rivant par di ca, i balotuts pidâts a van plui lontan che di chê altre bande. Al è un zûc che Lucio al fâs simpri: cirî di ripâ i balonuts fin dentri de bocje dal tombin. Tîr di punizion. La bariere sistemade e invisibile. Il zuiadôr cu la maie a riis e il numar blanc su la schene al cjape la smire. Al è concentrât. Nol pues falâ”.
◆ Par capî che e je pardabon une storie sole, i vûl rivât insom des scuasi cent e cincuante pagjinis di chest libri, premi S. Simon dal 2022. Chest par vie che i personaçs a son tancj e, leìnt, si à la impression di une schirie di contis ognidune par so cont. Il prin personaç al è Lucio che al scomence a no stâ ben, propit nuie ben: al sarà lui chel che al sierarà il libri tornant a meti adun dutis lis tramis. Daspò o cjatìn Robert, un frut indotât di une inteligjence fûr dal normâl e, par chel, disadatât e cjolt vie dai compagns; Laurinç il miedi che al à un bon ce fâ cuntune zovine in riviel cuintri dal mont; Mario che al mande in fas il so matrimoni e al piert ancje la amante; Lavinie che un riflès di une pierute dal mosaic che e je daûr lavorâ i puarte inte memorie une brute esperience vude di zovine; Federiche ancje jê vitime di violence; Fulvio il sfigât che dome inte musiche al cjate une reson di vivi; Indrì e Mateu, doi impleâts che a zuin di scacs; Lino che al piert la viste ma che al torne a cjatâ Bice, la sô femine; Fabio che al à inventât lis scarpis plui brutis dal mont ma che ducj a vuelin comprâlis; Gino Lavandin, idraulic di bon cûr e sô fie Elene che e va a finîle su la brute strade de prostituzion. Interessante la figure di Patrizie che e à vude une storie brute, un matrimoni falît propit in chel che al veve di scomençâ e une mari stufadice e invadente. E fâs la stampadore e no i sparagne cualchi critiche al autôr dal libri che e je daûr a impagjinâ. Cuâl libri? Propit Une storie sole, cjale il câs! Inte architeture complesse e une vore ben struturade dal romanç, une pocje di autoironie no sta mâl.
◆ Che al sedi stât scrit in timps di Covid, si lu capìs ben intal cjapitul plui incuietant, il dodis. Come se no fossin avonde il patî, il dolôr, la tristerie, lis delusions, la violence, velu un altri pericul catastrofic.
◆ Ma no dut al è brut in chest mont: i compagns di scuele di Lucio a son une lûs vivarose di sperance. ❚
