Lungje po!

Il libri di Andrea Del Favero
su la culture
e la musiche popolâr furlane
“Lungje, po!”, e je une espression che si sintive dispès intes fiestis, intes sagris, in dutis lis circostancis indulà che a jerin sunadôrs e balarins. Cheste espression sclete e da il non ancje al libri a pene jessût, scrit di Andrea Del Favero, studiôs, musicist, antropolic che si interesse di culture e di musiche popolâr furlane di une vite. “Lungje, po!”, i disevin i balarins ai sunadôrs par sburtâju a no smeti di sunâ, e lungje e ben spiegade e je la ricercje di Del Favero che, come che al dîs il sottitul de publicazion, e trate di “Strumenti e suonatori tra Mito e Musica”. La prefazion e je di Angelo Floramo che al rimarche lis cualitâts dal libri, scrit cun criteri sientific ma tal stes timp lontan dai academisims, che a rindaressin sterpe une materie e une tratazion che invezit e je vivarose.
◆ Un libri penç di storiis, imagjins, liendis e informazion, cuntune code di partiduris musicâls di tocs de tradizion furlane ma no dome, e in zonte un cd di 21 liniis regjistradis dal vîf, de fin dai agns Otante a vuê, simpri di bande di Del Favero. In chês regjistrazions si sint a sunâ – intes ocasions plui diviersis, tra ostariis, sagris, salis di bal – grups musicai improvisâts o di sunadôrs abituâts a sunâ insiemi, e lis vôs di oms e feminis che a cjantin, che a ridin, che a contin di une storie che purtrop e somee finide, o miôr, e je cambiade, e al è simpri plui râr sintîle.
◆ Si sintin armonichis, violins, lirons, trombons, bunkulis, zitiris, mandulins, ghitaris, clarins, fintremai fros di jerbe e sedons che a sunin! Dut regjistrât ator pal Friûl, dispès in Cjargne, par une scolte di influencis cu lis culturis di confin, tra polkis, mazurkis, valzers, staiaris, cjants di ogni sorte. Un document cetant preziôs, insiemi aes tantis fotografiis che al à dentri il libri, diviersis storichis dal prin Nûfcent, indulà che si viodin vecjos sunadôrs furlans e lis plui diferentis situazions dal fâ musiche in Friûl, in plui che esemplis di oparis visivis di iconografie musicâl imortaladis in diviersis glesiis de Patrie.
◆ Il libri si divît in cinc cjapitui iniziâi, indulà che si invie un percors tra storie, culture e musiche in Friûl, che – partint dal mît e dai rituâi antîcs – al passe traviers la ete de rason e de industrie, fin che al rive ai timps nestris. Di ca, si vierç daspò intune serie di 23 cjapitui plui curts, ma alternant sponts interessants sui struments musicâi che si dopravin, e che si spere si doprin ancjemò tal contest de musiche popolâr furlane: i struments a flât, a cuarde, a percussion, tra pifars, cuarnamusis, salteris, armonichis, struments rituâi e processionâi tant che lis craçulis, fin a rivâ aes bandis, aes orchestrinis, ai liutârs e ai costrutôrs di strument musicâi atîfs in Friûl fin ae metât cirche dal Nûfcent.
◆ Un biel libri, complet e ben scrit, che al propon une prime significative ricognizion suntune materie cetant largje e messedade cun altris dissiplinis. Si propon tant che une buine bussule par orientâsi – e magari par aprofondî – cheste dimension maraveose che e je la musiche popolâr furlane. ❚