LA STORIE – Il venezian Denêl Dolfin, ultin erêt de Glesie di Aquilee

Udin – Zenâr dal 1738. La cusine dal palaç patriarcjâl e je dute un davoi di feminis che a curin pes, fantats che a puartin zeis di verzis e di lidric di cjamp, pignatis e cits che a bolin. Al è vinars, si mangje di magri e su dut al sorintint il voli di Gotart, il cogo glemonàs. Pre Meni Ongjar al jentre di buride “Bundì, mestri Gotart.” E il cogo al cancelîr: “Bundì, pre Meni. Ce muse blancje! Frêt, no mo,  tal palaç?” . “Par dî la veretât lis salis, ancje cu lis stuis, a son a pene clipis e o ai lis mans dutis inglaçadis. Ma achì, dongje di chest fogolâr bocon, si stâ benon.” “Ve ca un tai di refosc cjalt, e cerçaitmi par plasê une saradele in saor. I plasin une vore al patriarcje Denêl. Al è venezian il Dolfin, no mo, e di chestis al è golôs.”
◆ “Gotart, ti conti une biele di vuê. Tu sês furlan come me e ducj i doi i tignìn al nestri patriarcjât gloriôs. Alore, tu âs di savê che il patriarcje Denêl al è une vore in pinsîr parcè che la Austrie e domande al pape di disfâ la grande diocesi di Aquilee e di nomenâ un vescul pai teritoris imperiâi e un pai teritoris venits. E sarès la fin dal Patriarcjât… – al spieghe il cancelîr smorseant une saradele – ma il Dolfin al è ben in paste cun Vignesie che e je mestre di diplomazie e di politiche. Il nestri patriarcje, cundut che al è venezian patoc, al à a cûr il patriarcjât e, intant che si môf la politiche, si à dât di fâ par infuartî la so autorevolece e par vierzi i voi ai furlans.” – “E cemût?” al dîs il cogo. “Al à tornât a clamâ Tiepolo! Il pitôr nomenât! Come che al veve fat so barbe, il grant patriarcje Dionisi Dolfin.” “Ma cemût puedial un pitôr otignî chest?” “Tiepolo al è une vore di mode – i rispuint pre Meni parant jù il refosc – e ce che al fâs al rive in orele a ducj. Il patriarcje Denêl i à dit di fâi un grant cuadri di meti tal domo di Udin cui sants Ermacore e Fortunât, i fondadôrs de nestre diocesi gloriose, e i à dit cemût fâlu, cu la citât di Aquilee daûr. Lui al vûl fâ savê a ducj che o vin une origjin une vore plui antighe di Vignesie e di Viene. E dopo, al à ordenât ai predis di marcâ la figure dal Beât Beltram di S. Gèniès, grant difensôr de nestre Patrie, e ancje lui, te dì de sô fieste, al à fate une predicjone comovente, che le ai tignude di cont tal archivi.” “No vevi mai pensât – al dîs Gotart – che si podès fâ la vuere cun chestis armis…” “Ma âstu cjalât ben lis pituris di Tiepolo tes salis dal palaç?” “Sigûr! Bielonis, biei colôrs e un biel significât religjôs…” “No dome – lu ferme il cancelîr – ma ancje politic. Il patriarcje Dionisi, il barbe dal nestri Denêl, ancje in chê volte al vualmave pericui pal patriarcjât e i à fat piturâ a Tiepolo chel che al coventave par insiorâlu di bielece e di glorie. Al à fat piturâ la schirie dai patriarcjis de Bibie: Abram, Isac e Jacop, tant che riferiment ai patriarcjis di Aquilee e al lôr primât. La Ereditât di Jacop e legjitime la sucession dai nestris patriarcjis, come la Scjale che e rive in cîl e legjitime la origjin apostoliche de nestre Glesie. A ‘nd è une vore di altris messaç politics ma il plui clâr al è il Judizi di Salomon. Lu âstu presint?”  “Sigûr, te sale da tribunâl. Bielon!” “Gotart, la piture e fevele de diplomazie che e veve voie di dividi il patriarcjât in dôs diocesis. Il frut al è il patriarcjât, lis dôs maris in barufe Vignesie e Viene. Ma il plui curiôs al è il boie che al stâ par taiâ il frut in doi tocs. Cjalilu ben e dimi se chê muse ruane no ti somee chê di un di chei austriacs plens di bire che a vegnin jù di Scluse cui cjars! E, par finî, cjale i nûi che a son dâur dal profete Denêl: un al à la forme dal lion cu lis alis di Vignesie, e chel altri la forme de acuile cun doi cjâfs di Viene. Clâr, no mo!” “Mi vês viert i voi, sâr pre Meni. Massime sul stamp dai patriarcjis Dolfins. Venezians ma cul cûr pe Patrie. Mi tocje metii un altri tai di refosc.”
◆ Ai 6 di Zenâr dal 1751, simpri te cusine dal palaç. “Mestri Gotart, par plasê metimi un tai di chel bon.” “Ce nassial, pre Meni? O sês strani.” “Il patriarcje Denêl al è fûr di se!” “Parcè po? Juste pe Pifanie?” “Par vie dal patriarcjât. Aromai o sin tes ultimis… Za l’an passât il patriarcje al veve scrit che “il so dovê al jere chel di tramandâ ai patriarcjis dopo di lui ducj i dirits de Glesie di Aquilee e che dutis lis leç dai oms e di Diu a jerin cuintri de sopression dal patriarcjât”. Vuê, magari cussì no, i à rivade la gnove che il pape al à decidût (ancje se no lu à ancjemò scrit) di disfâ il patriarcjât e di meti tal so puest doi vescui, un a Udin e un a Gurize.” – “Sacrabolt! – i scjampe a Gotart – e il patriarcje?” “Al è rabiôs invelegnât! Al à dât ordin che vuê, Pifanie o no, e à di jessi dì di desolazion e di lagrimis par ducj. Tu pues studâ dut che tant usgnot no si cene ma si dizune.” “Orpo! E i colaçs a pene cuets?” “Ordin di dâ dut ai puars!” “Po ben, ma cerçaitint almancul un e contaitmi ce che al capitarà cumò.” “Intant il Dolfin al spiete ad oremus il bonsignôr Josef Bini che al veve mandât a Rome. Nissun miôr di lui al cognòs la storie de Glesie di Aquilee e si à fat meti tal sac di chei di Rome. Il patriarcje – al zonte pre Meni gramolant un colaç – al dubite ancje de sô buine fede. Eh, il patriarcje Denêl Dolfin nol à intenzion di molâ il vues! Al à za scrit al pape che “la prime Glesie di Italie e deventarà la ultime, e chê, che no lu è mai stade, e deventarà plui grande de prime.” E al à pandude la sô asse al pape, a Viene a ancje ai siei di Vignesie!” “Brâf! – al sbroche Gotart – Al difint il so popul come un pari, come un vêr furlan. Jo o soi cun lui!” ❚