Sfuei Mensîl Furlan Indipendent
Archivi de Patrie

I PROTAGONISCJ – De sô famee potente une dinastie di vescui

Diego Navarria

Denêl Dolfin (Vignesie 1688 – Udin 1762) al è stât Patriarcje di Aquilee dal 1734 fin ae muart, ma za dal 1714 al jere coadiutôr dal barbe patriarcje Dionisi Dolfin che, ancje lui, al jere sotentrât al barbe Zuan Dolfin. Di barbe in nevôt, i ultins trê patriarcjis a son de potente famee veneziane dai Dolfins. Ducj i trê grancj oms di glesie, di culture, di art, e di politiche.
◆ Tant che pastôr, Denêl si da di fâ une vore: visitis pastorâls, grande caritât cui puars e cui fruts bandonâts, al implante il munistîr des Poverelle tal borc di Cisis e al clame i predis di S. Vincenzo de’ Paoli. Al convoche tal 1740 l’ultin Sinodi dal patriarcjât, a ‘nt fâs stampâ i ats e al publiche lis sôs predicjis e letaris pastorâls.
◆ Denêl al è ancje om di culture e sensibil a la art. Di fat, al implante une Academie Eclesiastiche, al zonte la scuele di grêc tal ‘seminari, al fâs sculpî altârs gnûfs, al tire sù il domo di S. Vît, la glesie di S. Zorç tal borc di Graçan a Udin, e chel bombon de glesie de Puritât cu lis pituris di Zuan Batiste e di Domeni Tiepolo.
◆ Dal 1500 la grande diocesi di Aquilee e jere spartite, dal pont di viste politic, tra Vignesie e l’Imperi che nol viodeve di bon von voli che il patriarcje venit al ves competence sui siei teritoris. Di chê volte, une vore a son i tentatîfs par risolvi la cuistion, simpri puartade fûr. Tal 1747 il pape al nomene Denêl Dolfin gardenâl, che e somee une caramele par fâi gloti il tuessin che al rivarà. L’imperi al insist, si cjate la soluzion di meti sù un vescul a Gurize pe part austriache de diocesi. Lis tratativis a son afanadis. Vignesie si môf cul so ambassadôr a Rome, Francesco Foscari, e cui gardenâi venezians Rezzonico e Querini, adun cul rapresentant dal patriarcje, Josef Bini. Ai 6 di Lui dal 1751 cu la bole Injuncta Nobis, pape Benedet XV al sdrume “par simpri e di fonde fûr” la sente patriarcjâl di Aquilee. A Denêl Dolfin i tocje subî la sopression dal patriarcjât. I reste il titul di patriarcje a vite e il marum di une domande intrigose: “Dopo vê contentât l’Imperi e metût sù un vescul a Gurize, parcè il Pape di Rome, cul acuardi cidin di Vignesie, aial sdrumât il gloriôs Patriarcjât di Aquilee?” O speri di vê in curt la ocasion di scrivi ce che o pensi jo su chest. ❚
D.N.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +