Une piece teatrâl origjinâl,
estrose, in sene in Novembar
IIntai prins dîs dal mês di Novembar di chest an – i dîs de sô muart tragjiche – Pier Pauli Pasolini al sarà onorât cuntun spetacul dal Teatri Stabil Furlan. Une piece teatrâl origjinâl, di fantasie, di dissen atuâl, estrose, no une leture des sôs lirichis o des sôs prosis. Incentrade sul contribût di ideis e di impegn di Pier Pauli par otignî pal Friûl la autonomie regjonâl; cence colâ tal teatri che si autonomine “politic o documentâl”, bussulot di retoriche periculôs (come se dut il teatri nol fos politic).
◆ Duncje, Pier Pauli nol comparìs su la sene. Une famee, cuntune storie di vicinance al poete, e cjape su lis sôs spalis il so lassit, e e rive fra contrascj a mantignîlu vîf fin a vuê, cun modalitâts che a puartin il stamp di ogni gjenerazion. Il timp, cheste entitât malcuiete, al devente cussì coprotagonist de storie.
◆ L’impegn furlan di Pier Pauli al è stât il prin segnâl de sô passion civîl, durade dute la vite, spindude par difindi e dâ valôr a dut ce che al rapresentave une identitât, une particolaritât distintive dal singul o di comunitâts o di strâts sociâi, che a vivevin une lôr specificitât; cuintri ogni nivelament, ogni conformisim.
◆ Il test dal spetacul al sta nassint tun laboratori teatrâl li che a cjapin part Lisa Moras, Massimo Somaglino, Carlo Tolazzi e il sotscrit. Afiet par Pier Pauli e volontât di doprâ ogni strument che la tecniche teatrâl di vuê e met a disposizion a vuidin il trop di autôrs, par meti adun un spetacul che al divertissi il public e che al trasmeti la idee di Pier Pauli che jessi unics al è il vêr mût di vivi une vite degne, pai singui e pes comunitâts. Fasint bon acet aes novitâts, che la vite no je mai repliche ma rinassite in formis creis, plasmadis dal timp.
◆ Fra lis tantis bielis iniziativis realizadis chest an par ricuardâ il centenari de nassite di Pasolini, il spetacul dal Teatri Stabil Furlan al fronte un argoment no scontât e no considerât di altris. Ma dut câs impuartant te vite di Pier Pauli, e ancje pal nestri teritori, che al à dome di vuadagnâ a impensâsi dai furlans che lu àn tirât fûr des sgrifis dal Venit – li che al sarès stât isolât, al ultin puest fra vot provinciis – par dâi la forme di regjon, insiemi cun Triest.
◆ Il spetacul al sarà fat in coproduzion: al Teatri Stabil Furlan si è zontade la Società Operaia di Pordenon, che e sigurarà musichis origjinâls, componudis dal mestri Renato Miani, e sunadis dai strumentiscj in sene. ❚
