Sfuei Mensîl Furlan Indipendent
Archivi de Patrie

Par cuant la television par furlan? Pai 32 di Mai?

Serena Fogolini
_
_

Plui di vincj agns e la Rai e ignore ancjemò
lis trasmissions in marilenghe

Nol è piês sort di chel che nol vûl intindi. Nus pâr l’unic titul pussibil par chest cine grotesc che nus ven sgnacât su lis rêts Rai ogni volte che si fevele di trasmissions in lenghe furlane. Une pelicule che no si rive ben a capî di ce gjenar che e sedi, stant che par un viers e mostre il paradòs di une leç che di passe vincj agns e spiete di jessi metude in vore (paranormâl o di ridi?) e par chel altri e testemonee la pierdite di un dirit di bande di une comunitât (documentari o investigatîf?). Cussì, stant che il guvier nol sint di nissune des dôs orelis, i utents furlans no puedin ni scoltâ ni viodi programs inte lenghe che a doprin ducj i dîs. A chei che a crodin che al sedi miôr ancje tasê, cu la sperance di un “piçul” intardament de rivade de programazion par furlan, ur sugjerìn di no stâ masse a spietâ Godot e di dâur invezit une voglade ai dâts di chês altris lenghis minorizadis presintis in Regjon e tal Setentrion di Italie. L’an passât, di fat, biel che pal furlan a rivavin i solits fruçons – 200.000 euros par 90 oris di programazion radiofoniche -, pal sloven a vignivin stanziâts 11.600.000 euros par nuie di mancul che 4.517 oris di programs radio e 208 oris di television. Ancje il todesc al à vude la sô biele slepe, cun 17.347.000 euros par 5.300 oris di radio e 760 oris di television in lenghe. E se chestis dôs lenghis a podaressin vê il lôr parcè, vint un Stât daûr a parâlis, di chê altre bande il ladin al mostre di vê vût cui che al à batût mans e pîts, stant che cun 2.653.000 euros e je stade garantide une programazion cun 352 oris radiofonichis e 100 oris televisivis. Se dopo si van a scandaiâ i numars di chei che a fevelin la lenghe (furlan denant di ducj, cun 600.000 personis; i vegnin daûr 300.000 pal todesc, 50.000 pal sloven e 30.000 pal ladin) si capissarà che cualchidun al à vendude la piel dal ors prime di copâlu, dome che si viôt che la bestie – che o saressin nô furlans – fin cumò no à savût fâ avonde scjas.
Par dîle juste, al è di un toc che si va indenant a tontonâ, al basti ricuardâ la letare firmade l’an passât di passe 70 Sindics de Assemblee de Comunitât Linguistiche Furlane, che a àn fintremai menaçade une azion legâl; no cate dut, o sin inmò culì a contâse. Cun di plui, ae fin di Avrîl e scjât la Convenzion jenfri Guvier talian e Rai su la programazion regjonâl (za sprolungjade un pâr di voltis). Al è par chel che il president de ARLeF, Eros Cisilino, al à fat un apel al aministradôr delegât RAI, Fabrizio Salini, e al Guvier, in particolâr al Ministri competent Stefano Patuanelli (nestri coregjonâl), par domandâ garanziis sul cont de tutele de lenghe furlane. Cisilino al à sclarît che pal furlan no son previodudis trasmissions di gjenar informatîf, fondamentâls pe promozion di une lenghe minoritarie. Cun di plui, chei 200.000 euros pal furlan a son i vanzums di 11.800.000 euros assegnâts ae sede RAI regjonâl, che e spint cuasi dut pes trasmissions par sloven e par talian.
La ARLeF, duncje, e à dade la sô poie ae azion che a son daûr a puartâ indevant il President dal Consei regjonâl Piero Mauro Zanin e l’Assessôr aes minorancis linguistichis Pierpaolo Roberti, di mût di rivâ a un confront imediât e garantî al furlan une presince almancul compagne di chê de lenghe ladine.
E se o pensais che in chest moment cheste azion no sedi une prioritât, visaitsi ben che pal Stât talian no lu è stade par passe vincj agns e che “O fasarai al è fradi di no fâ mai”. Cumò viodìn di viodi (la television, par furlan).  ❚

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +