Sfuei Mensîl Furlan Indipendent
Archivi de Patrie

Zorç Jus, l’inventôr de nestre bandiere di vuê

W. T.

Mai come chest an, sierâts in cjase, i furlans si son peâts ae lôr bandiere: la acuile di aur in cjamp turchin che e à jemplât i barcons e ven di lontan, di chê dal patriarcje Bertrant, ma e à un dissen grafic definît nancje 50 agns indaûr. Il pari di cheste ridefinizion, tal 1974, al è stât un autonomist “Doc”, Zorç Jus di Tarcint. Al è stât lui che, tal mieç des bataiis dal Moviment Friûl, sot de regjie di Marc De Agostini, si è cjapât sù il caric di reinventâ in clâf plui moderne e inclusive il simbul di une identitât furlane che e voleve tornâ a pandisi cun fuarce. E soredut, cumò che la cuarantene e à sburtât ancjemò di plui a scuvierzi la bielece de nestre acuile, al è just ricognossi chest merit ae azion visionarie di om tant gjenerôs e inamorât de sô Patrie, che – in timps di dirits di autôr – vuê al podarès pretindi cuissà ce. E invezit, al è un vêr idealist e al à gust di viodi il sucès di cheste sô “invenzion”, cence rivendicâ nuie. “No mi soi mai svantât, lu ai fat dome par amôr di Patrie. Tancj mi disin che se o ves vût un euro par ogni bandiere che e svintule in Friûl e ator pal mont o sarès milionari… Ma la sodisfazion di vê tornât a dâ ai furlans un simbul par ricognossisi e vâl di plui di dut l’aur dal mont. Cuant che o viôt che i fogolârs e ducj i nestris confradis intal forest a àn adotât chest vessil, mi si incolme il cûr di gjonde”.
◆ Ma cemût ise nassude la idee di cheste gnove version de bandiere? “O jeri tornât de Svuizare, là che o jeri lât a vore tant che emigrant. Cul Moviment Friûl e cu la Clape Culturâl Hermes di Colorêt o resonavin su cemût stiçâ intai furlans il sens de lôr identitât, e un aspiet une vore impuartant al jere chel di cjapâ il lôr imagjinari, scomençant dai simbui. La bandiere de Filologjiche che e ripropon la cussì clamade acuile di  Bertrant, e jere pôc adate a chest intindiment. Chê de Provincie di Udin, po, e veve cjâf di copasse e cuel di zirafe: ma o soi partît di li par fâ un dissen che al fos plui tratîf e inmagant. In sumis, plui popolâr”.
◆ E il risultât lu vin sot dai voi, sui barcons des cjasis e sui profîi social di ducj. “Mi soi visât daurman che me vevin robade. Dopo pôcs mês, o ai viodût a vendi spilutis e maiutis a Lignan cul gno dissen. Mi vevin conseât di fâ cause, ma pierdi timp e bêçs cui avocats no jere robe par me”. Ancje parcè che la finalitât de sô creazion no jere sigûr chê di fâsi siôr: “e jere chê di tornâ a fâ sù une identitât, no chê di tirâ palanche”.
◆ De Agostini stes al memoree cemût che “la prime ocasion di doprâ cheste bandiere in maniere massive e fo la prime Fieste de Patrie, ideade di pre Checo Placerean. In chest event che il Moviment Friûl al organizà ai 3 di Avrîl dal 1977, par marcâ un gnûf inizi par un popul che al tornave a nassi des maseriis dal taramot. A chê fieste autoconvocade, a jerin stâts invidâts ducj i sorestants ma no si è fat viodi propit nissun”.
◆ Il timp, dut câs, al è stât galantom. Tal cjâf e tal cûr dai furlans, in chescj agns la Fieste e la bandiere a àn vuadagnât un puest di gale, e un afiet che nancje la cuarantene e je rivade a smamî. Propit par chest, al covente che la nestre int e ringracii e che no dismentei cui che ur es à regaladis. ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +