La Ue e prove a salvâ la muse: ancje tai conflits, la strade europeane e je la uniche par saltâ fur de crisi dal Covid-19

Confermâts jutoris straordenaris
e la ridefinizion dal MES.
Va ben la solidarietât,
ma a coventin risorsis

La difusion dal Covid-19 in Europe e la dibisugne di fâi cuintri a àn palesât a fuart lis dificoltâts, i limits e la crisi sostanziâl de Union Europeane (UE). Però a àn ancje mostrât che di cheste situazion si rive a saltâ fûr dome se si cjape une strade europeane. E soredut, che par fâi cuintri a pericui e problemis di cheste fate e covente une Europe che e sedi “plui Europe”. Lu vevin za ricuardât il mês passât, ma o tornìn sul argoment, par vie che la cuistion e je ancjemò vierte e e va ancjemò dilunc a mostrâ dutis dôs li sôs musis: chê de crisi e, cundut des contradizions, chê de soluzion a nivel european.
◆ In concret, il sisteme european – Comission (CE), Eurogrup (i ministris des financis dai 19 stâts che a àn l’euro) e Bancje Centrâl Europeane (BCE) – inte prime metât di Avrîl al à metût impins diviers struments di intervent cuntune operativitât svelte, massime dentri dal prin di Jugn dal 2020, tacant di une linie di credit speciâl pes impresis (200 miliarts di euros) creade de Bancje Europeane dai Invistiments (BEI), di un program de BCE di 750 miliarts di euros par cuistâ obligazions publichis e privadis dai paîs membris de Eurozone, che si zontin ai 20 miliarts mensîi dal “Quantitative Easing” e a altris intervents par 120 miliarts, e di une sorte di Casse integrazion europeane (il SURE) cuntun totâl di 100 miliarts di euros di prestits concedûts ai stâts membris a tas agjevolât. Cun di plui, e je stade fate indenant la redefinizion dal Mecanisim European di Stabilitât (MES), nassût tal 2012 tant che “font di salvament dai stâts” cu la concession di prestits ai guviers daûr di une serie di cundizions che a tocjin il tai de spese publiche, che al varès di deventâ un Fonts pe Salût, cuntune linie di finanziament specifiche pes spesis sanitariis che no domande cundizions o vincui di sorte: par fâ une operazion di cheste fate, però, l’iter nol è cussì svelt, ancje se la prospetive e je interessante, stant che al podarès jessi une sorte di Casse dai Dipuesits e dai Prestits europeane.
◆ Ae fin, ancje se al è stât dut un pitufâ tra stâts “nordics” e “rigoriscj” e stâts “meridionâi” che a domandin “flessibilitât”, si à rivât a un compromès che al varès di zovâ un pôc a ducj: daûr di une logjiche di marcjât e di interès, la crisi dai stâts dal sud e varès consecuencis penzis ancje par chei dal nord… Lu à fat capî la presidente de Comission Europeane, Ursula Von der Leyen, cul so intervent fat inte sentade plenarie dal Parlament European (PE) a Bruxelles, ai 16 di Avrîl. Recuperant fintremai un passaç dal Manifesto di Ventotene, e à fevelât di «coraç», di «fiducie» e di «solidarietât», e de dibisugne di doprâ il belanç de UE e duncje i siei fonts.
◆ Si à mot in chê direzion ancje il PE, là che no je passade la propueste dal grup dai Verts e de Aleance Libare Europeane a pro de condivision a nivel de UE dal debit public (i cussì clamâts Eurobonds o Coronabonds), in particolâr cul vôt contrari de plui part dai liberâi di Renew Europe e dai eurodeputâts di Lega e Forza Italia (che cussì a àn rivât a jessi in chel istès “antieuropeans” e “antitalians”), ma e je stade fate buine une risoluzion a pro de flessibilitât dal ûs dai fonts struturâi par frontâ il coronavirus e lis sôs consecuencis (ven a stâi ce che e veve dit Von der Leyen).
Inte riunion dal Consei European dai 23 di Avrîl, i rapresentants dai stâts a àn cjatât l’acuardi in cont dal Fonts European pe Riprese (il Recovery Fund) e su chei altris struments za definîts di Avrîl, comprendude la linie di finanziament cence cundizions des spesis sanitariis (une sorte di MES “semplificât”). A restin viertis diviersis cuistions e al sarà ce lavorâ, in tiermins tecnics, par inviâ pardabon i struments proviodûts. Par intant la UE e à salvade la muse. E varès di rivâ a fâ alc di bon ancje a pro dai siei citadins. ❚