Sfuei Mensîl Furlan Indipendent
Archivi de Patrie

A tutele dal prossim: lis organizazions regjonâls dai vigjii dal fûc in Austrie

Barbara Cinausero

Te nestre societât no si pues plui fâ di mancul di une istituzion di sigurece publiche tant che chê dai vigjii dal fûc, che e je sapontade di cetant lustri jenfri la int. Si trate di miârs di personis – feminis e oms – che si metin di lôr volontât al servizi dal prossim ogni zornade dal an par 24 oris in dì par intervignî in câs di fûcs, di calamitâts naturâls, di incidents o di altris emergjencis.
◆ Diferent che in Italie (fale che in Sudtirôl, là che la istituzion si cjatile dal 1864), il servizi dai vigjii dal fûc da la Austrie si poie dome sul volontariât, sore nuie, di bande de popolazion dal lûc. Dome cualchi citât – lis plui grandis – e cualchi grues grup industriâl a àn ancje pompîrs di mistîr. Dal pont di viste juridic, lis associazions dai vigjii dal fûc a dipendin ognidune dal so Land e lis lôr formis di organizazion a puedin mudâ regjon par regjon: in Carinzie i grups di pompîrs locâi a son regolâts dal comun, stant che di altris bandis ogni grup al à la proprie personalitât juridiche, sicu corporazion di dirit public. Cun di plui, ogni regjon e ten un regjistri cu la liste dai volontaris. Dut câs ogni grup al è autonom ma al va daûr des regulis e des disposizions de associazion regjonâl dai vigjii dal fûc che e saponte ogni grup pe formazion e pai furniments e e fisse ancje i nivei di riferiment pes monturis e pai imprescj. Ma in chest câs nol va simpri dut ben par ducj e – stant che ognidun al bale cun sô agne – tancj grups a van par lôr cont. Il stât centrâl si interesse dome dal coordenament gjenerâl de Protezion Civîl Nazionâl, là che lis associazion regjonâls a son cjapadis dentri.
◆ La nassite dal cuarp volontari dai vigjii dal fûc in Austrie e je dal 1851, cuant che – inte suaze de monarchie – si è formade la prime milizie volontarie par man di un uficiâl in pension; po dopo, tal 1853, e je stade la fondazion dal prin cuarp citadin a Graz. Sul imprin, i iscrits a partignivin aes sociis di gjinastiche, e in reson di chel a vignivin adestrâts par distudâ i fûcs. In tantis regjons, i vigjii a doprin inmò il salût des vieris associazions di gjinastiche (Gut Heil) e i lôr simbui. Cuant che des sociis origjinariis si è passâts aes formazions modernis, lis vieris associazions no àn rivât plui a tignî daûr aes spesis, e par chest i pompîrs a son stâts cjapâts dentri dai comuns o sussidiâts dai privâts.
Cheste idee di volontariât e à cjapât pît simpri di plui e cussì, in dì di vuê, ogni comun al à di medie un pâr di grups. Metipen che un comun nol vedi un grup di volontaris, alore al pues meti sù un servizi obligatori midiant di une sorte di jeve, o ben poiâsi ai servizis dai grups di un comun dongje. Par solit ducj a puedin jentrâ in chescj grups ma a son diferencis par ogni regjon sui criteris, come par esempli jessi citadins di un stât de UE. In Carinzie, dal 2012 a àn gjavât vie ancje cheste cundizion.
◆ In merit ai Vigjii di mistîr, no esist in Austrie une suaze professionâl par cheste categorie, duncje chestis figuris a dipendin par solit dal comun che ur da la incarghe. In dì di vuê, chescj grups professioniscj si cjatiju dome in sîs citâts che a son a cjâf di Land: Viene, Linz, Innsbruck, Graz, Solispurc e Clanfurt. Il plui vieri al è chel di Viene, là che intal 1685 al jere stât dât l’ordin di cjapâ sù lavorents paiâts par distudâ i fûcs intant dal assedi dai Turcs.
◆ I prins riferiments ai pompîrs sul teritori austriac si cjatiju a Carnuntum (su la Danau, parmìs de Slovachie), là che bielzà intal secul III e esisteve intal cjamp militâr une scuadre di pompîrs metude adun cui soldâts veterans.
◆ La istituzion e à passât alts e bas vie pai secui e e je stade metude in suaze pe prime volte di Marie Taresie e po dopo di so fi Josef II. Il regjim nazist no le tignive in buinis, par vie che e jere une istituzion democratiche, e ae fin le à metude sot de scorie dal guvier centrâl. Cuant che chel regjim al è colât, si è tornâts aes regulis di prime de vuere, ma i grups a son restâts inmò sot dal control dal Servizi di Sigurece fin ai agns Setante, cuant che in ducj i Länder a àn cuistât il stât di corporazions di dirit public. ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +