Un libri di lei e un dvd di cjalâ. In graciis de iniziative de cjase editore sarde Insula/Papiros chel test, jessût tal 1975 cul titul di “Ethnisme. Vers un nationalisme humaniste”, che si pues calcolâlu une sorte di manifest dal ocitanisim contemporani, al torne in librarie, voltât par talian e cuntune vieste grafiche plasevule.
Cun di plui, il saç di François Fontan al è compagnât dal videodocumentari “E i à lo solelh”, dedicât al fondadôr dal Partît nazionalist ocitan (PNO) tal Stât francês e ispiradôr dal Moviment autonomist ocitan (MAO) tes “Valadas” dal Piemont, fat passe vincj agns indaûr di Diego Anghilante e Fredo Valla.
La idee di vê metût dongje i doi materiâi, par cure di Fredo Valla e di Diego Corraine, cuntune jentrade di Sergio Salvi, e je pardabon preseabile, parcè che e permet di cognossi la personalitât e la vite di Fontan e di capî lis sôs ideis, che cundut des lôr contradizions a fasin indenant une vision e une sperance di identitât, di libertât, di solidarietât e di pluralisim, che a son buinis ancjemò in dì di vuê. ❚
François Fontan, Etnismo. Verso un nazionalismo umanista; Diego Anghilante – Fredo Valla, E i a lo solelh. François Fontan e la descoberta de l’Occitània, Insula/Papiros, 2018
Marco Stolfo