Tal tinel scûr, di une puarte che si vierç a sclese, al jentre un rai di soreli e e sponte une biele muse di femine ancjemò zovine, dute sbarlufide.
«Rosute, Rosute mê!»
«Ce âstu, Tunine, ce ti isal capitât?»
«Rosute, no lu sai. Mi sint un grop tal cûr. O ai tante pôre».
Cheste Tunine e sarès deventade la mari di S. Luîs Scrosoppi, che di lui Roberto Meroi nus conte la vite in cheste agjiografie di 110 pagjinis, buride fûr des edizions Della Laguna.
Une vore curade la ricercje che e je la fonde dal libri: i vons, la mari che si veve sposade dôs voltis e che e ve ben trê fîs predis, il pari oresin a Udin, galantom, ma tichignôs. I studis di frut e di zovin, il leam une vore fuart cul fradilastri Carli, l’impegn inte Cjase des derelitis, vâl a dî frutis vuarfinis o bandonadis che no vevin nissun puest dulà lâ, il scombati cuintri des burocraziis, la umiltât di lâ a cirî la caritât par podê dâi alc di meti sot dai dincj a chestis frutis, la muart dal fradi, la responsabilitât che e deventà dute sô di tignî in pîts la barache, lis strussiis par comedâ l’edifici e po fânt sù un gnûf, la balfuerie dal ‘48, il passaç di Udin sot de Italie, la istituzion dal cuarp des muiniis de Providence che a vevin la cjame di assisti i malâts di colere e fintremai di cjapâju sù pes stradis, lis preieris, la volontât di jessi umiliât par seguitâ cun ustinazion la vie de perfezion par dute la vite, fin ae malatie finâl e al moment ultin li che i pâr di viodi place S. Pieri di Rome, dute in fieste pe proclamazion di un sant.
Une figure di benfatôr, che al à spindude la vite par fâ dal ben. Lis frutis acetadis inte Cjase a imparavin a lei e a scrivi e dut ce che al coventave par imparâ a deventâ ancje lôr muiniis o bravis massariis, o ben par lâ a marît in maniere dignitose. Pai chei timps no si podeve pretindi di plui.
Chest libri al à il merit, in plui di fânus cognossi miôr chest sant furlan, di dânus une idee avonde precise di ce maniere che e jere la vite un secul e mieç indaûr. Noaltris letôrs dal doi mil o restarìn scaturîts e fintremai infastidîts des pratichis di santitât di pari Luîs (sicu fâsi spudâ in muse…) e setics a lei dai siei miracui: il gran che si moltipliche tal granâr, la fassine umide che e devente secje e pronte par impiâ il fûc, il sac di farine che al rive su la puarte de cjase propit cuant che la panarie e je vueide. Miracui. Che in chê volte a sucedevin par vie che la int i crodeve e che in dì di vuê no sucedin plui, par vie che la int e cjale la television. ❚
Roberto Meroi, Padrut, storie romanzade de vite di S. Luigi Scrosoppi, Edizioni Della Laguna, 2002
Laurin Zuan Nardin