Sfuei Mensîl Furlan Indipendent
Archivi de Patrie

BASTIANCONTRARIE. STORIE FURLANE AL FEMININ. Muiniis ribaltonis

............

Dispès la libertât des feminis si le cjate intai puescj plui impensâts. E il munistîr, inte Ete di Mieç fintremai ai agns dal Concili di Trent – ma ancje plui tart – al pues deventâ un spazi intrigant.

Dal sigûr al è un lûc di presonie, une reclusion obleade, sfuarçade, imponude dai paris, dai fradis, dai oms di famee. Ma al è ancje un spazi dut al feminin, e li i oms no puedin jentrâ, se no vegnin invidâts in maniere esplicite.

Intes badiis, lis feminis a rispietin une jerarchie dute feminine, e la badesse e je une femine che e pues gjoldi di un podê straordenari, ancje su chei oms che a son al servizi dal munistîr e che a vivin intes competencis feudâls dulintor: mulinârs, contadins, marangons e cualchi volte ancje cavalîrs e soldâts. Si podarès cuasi sostignî che il claustri al sedi une specie di spieli dal pinsîr al feminin.

Dispès a forin lis frutatis istruidis de miôr nobiltât furlane a jessi destinadis a deventâ muiniis: a vignivin fûr di un contest sociâl e culturâl impuartant, riverît e rispietât. A vevin la pussibilitât di lei e di scrivi – prerogative par nuie scontade par chei timps, ni pai oms e tant di mancul pes feminis! – e a jerin stadis educadis a une forme di pinsîr che al rivave a jessi profont, orientât ae riflession e ae ricercje personâl e intimiste. Lis lôr ideis duncje, fondadis su lis pagjinis dai libris e fatis florî di precetôrs privâts di grande fame, a puedin deventâ un imprest impuartant, util a di une forme di resistence che no je di pôc cont, e ae fin ancje di riviel, di svindic e di ribelion propit cuintri chel mont che lis à sieradis intun lûc là che nol pues jentrâ, ni meti bec. I oms a restin difûr. No puedin meti pît tra i mûrs dal claustri.

A son lis Sioris dal Munistîr che a decidin, che a filtrin e duncje che a controlin, esprimint in cheste maniere ancje une cjarie fuartone di seduzion orientade su ducj chei che lôr a vuelin inmagâ e fâ sogjets dal lôr podê: fraris confessôrs, scrivans, operaris tant che zardinîrs o muredôrs. Episodis une vore curiôs e ancje pevarins a jemplin lis cjartis dai archivis storics dal nestri Friûl patriarchin. Suntun plan plui alt, chel de dutrine, il spazi monastic feminin, par cheste sô vocazion di libertât, si oriente dispès al pinsîr ereticâl. Al è il câs des Clarissis di Udin: cuintri di lôr si vierç un procès che al dure tant, dai agns Otante dal Cinccent fin cirche al 1640, e che al pâr no cjatâ soluzion. La acuse dotrinâl si pee dispès aes censuris cuintri de disubidience dai articui previodûts de Regule, o ancje cuintri di un compuartament che si podarès definîlu di resistence pandude cun ats e mûts contraris ae incuisizion atente dal Clericât masculin, che nol rive mai a domâ dal dut chestis feminis ribaltonis, ametint ae fin la impussibilitât di pandi il so control.

Cualchi episodi al è pardabon gustôs e al met in evidence il caratar morbinôs di chestis muiniis birbantis: “Che si decidin une buine volte a no piturâsi la muse, e a no doprâ pelicis e altris ornaments intal vistîsi. Che a stedin pluitost atentis a cuvierzisi ben, cence tignî fûr in biele mostre lis lôr tetis. E che nissune e olsi balâ ni dentri ni fûr dal claustri, o partecipâ a bai, fiestis e altris ocasions par zuiâ intune forme vergognose e laide” (Aquilee, 1480); “Jo, Iacopo Maracco, vicjari patriarcjâl, o ai decidût di sospindi chestis feminis de Comunion cul Santissim Cuarp dal Nestri Signôr Jesù Crist parcè che a jerin stadis scomunicadis e no domandavin di jessi perdonadis. A son disubidientis e a continuin a lâ fûr dal munistîr, cuant che ur plâs, di dì e di gnot. A àn balât devant dal public vistudis di muinie, a àn zuiât su la publiche vie e fat tantis altris robis brutis che o ai miôr no contâ par pudôr” (Aquilee, 1570); “La muinie Laure, dismenteade dal onôr di Diu, des promessis fatis a mi e dal so dovê, e je tornade a durmî su la tor dal cjampanili e e mostre dut il so dispiet pes sûrs e pe mari badesse!” (Glemone, sec. XVI); “A son scjampadis dutis fûr che trê, vecjis di otante agns, par lâ a vendemâ, a fâ il bagn e a oselâ, cun mil altris intrics. Jo o sarès plui content di comandâ un milion di oms pluitost che dîs feminis come chestis, mâl usadis e capriçosis par tancj agns. Al sarès ben cjatâ fûr une soluzion, ma no savarès ce fâ!” (Cividât, sec. XV). Une fuarce dirompente.

Sot dal vêl, intai munistîrs dal Friûl, si platave une anime incuiete e plene di braùre, che dispès e à lassât ancje testemoneancis di poesie e di leterature. ❚

Agnul Floramo

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +