MUSICHE. Sperimentant tra vilotis e Gjamaiche cun DJ Tubet

Mê mari e je di Loncje / gno pari di Cjanùs / a son colâts tal lutto / par che al è muart il mus / Al jere un mus di monte / un mus lavoradôr / al è par chest che il nono al è deventât un siôr.
No crodarês, ma chest al è il test di une cjançon di Dj Tubet. “Vilotis RubaDub” al è un toc reggae che al dopre vilotis (chi, par esempli, “Ducj i mus a montin”) tal ritmi dancehall sleng teng di King Jammy. La cjançon e je stade regjistrade e “dubade” di Mauro Tubetti a Nimis chest Istât. Ma cemût mai Tubet aial sielzût di doprâ lis cjantis tradizionâls e di metilis adun cu la musiche de Gjamaiche? «Parcè che lis nestris vilotis a son une forme antighe di rap e di cantilene, simile a chê gjamaicane dal periodi rubadub prime de dancehall moderne», al sclarìs Tubet. «Lis vilotis a fasin une uniche cjançon insiemi, come se e fos une storie a puntadis, a componin un test plui grant. E il sleng teng al è il prin ritmi digjitâl, ven a stâi il prin ritmi de storie gjamaicane che nol è fat cun struments sunâts ma cun tastieris midi. La mê idee duncje e font un omaç ae nestre storie cu la musiche moderne». “Rub-a-dub-dub” e je ancje une cantilene inglese dal 1800: «Tal titul o ai volût fâ capî che la nestre lenghe e vâl come l’inglês», al zonte il musicist. «Interpretant il rûl dal deejay di chê volte in Gjamaiche, mi soi imagjinât di contâ lis nestris cantilenis in chê modalitât. Di plui, o ai volût fâlu inte modalitât maiôr, parcè che cussì mi pareve di dâi une altre acentazion psicologjiche di soreli e di vite, e ancje di scherç e lizerece, parcè che de bande de zoventût mi somee che lis vilotis a vegnin viodudis masse come une robe antighe e brute. Ogni tant, o ai citade la melodie origjinâl par dâi dignitât ae forme origjinâl e messedâle cu la forme tipiche des tabaiadis reggae, par fâ viodi che no je diference: lis dôs a valin e a fasin il stes lavôr sociâl di tignî dongje la int, contant storiis che a restin, simpri su chel pedâl, simpri su chê ande, inte maniere tipiche dai cjants popolârs». Di cualchi mês indaûr, al è un altri tentatîf dal artist di fâ un mix di tradizions popolârs in version contemporanie. In “Future Generation” di Dj Tubet feat Navid Freedom, regjistrade a Fevrâr, si cjate une “Scjaraçule Maraçule” nostrane, metude dongje di un cjant de tradizion persiane. E a sunin adun che a somein fatis di pueste. Lino Straulino e Stefano Montello lu vevin dit: «Vuê, cjantâ vilotis al è plui rivoluzionari che fâ rock. E i nestris rappers a son perfets par fâlu a ritmi di rap». Veju ca servîts. Intal toc “Love inna di danz” di Tubet dal 2012, e je une citazion de vilote “La ligrie”, adatade in ritmiche e in notazion. Bielissime, su Youtube si cjate une home session a Sant Denêl dal 2010 cun Giulio Venier, Midi violin, Improfolc e Dj Tubet che a cjantin la vilote “Sot il balcon”. Ma nol è inmò timp plen di vilotis par DjTubet: «Prime si scugne cjatâ un prodot che al plasedi ai zovins e che al sedi credibil ancje di un pont di viste comerciâl, po dopo si pues sfumâlu cun alc di nestri, fin a fâ scuvierzi ancje alc di pûr» al dîs. «Ma jo, pal moment, o sint la dibisugne di afermâmi miôr dentri des culturis musicâls che o rapresenti». Nô lu spietìn, parcè che Tubet che al fâs rap cu lis vilotis, al è une vore bulo. ❚
Natascia Gargano