Udin e Cjamin dal Tiliment a son stadis lis primis presentazions di “JNK oltri la ultime frontiere” il film dal regjist di Codroip Marco D’Agostini e che al viôt tant che protagonist il grup dai JoNoKognos, in particolâr Luca D’Angela, leader de formazion, ma in cheste ocasion vôs dal documentari. Tai passe 50 minûts di video si cjape spont de finâl dal Liet International 2012 davuelt a Xixon, tes Asturiis, dulà che a àn partecipât i nestris musiciscj.
Ducj i doi classe 1978, ju vin incuintrâts par fânus contâ alc di plui su cheste esperience e no dome.
Marco, presentinus Luca
Al è une persone determinade, cuntune fuarte vene artistiche che e ven fûr simpri, ancje cuant che nol sune. Al è un leader, sedi pai aspiets positîfs tant che il carisme, sedi pai difiets par vie che ogni tant al pues someâ ruspi. E su dut, al è un grant comunicadôr: potenzialitâts fuartis che o ai riscuintrât fin di cuant che lu ai viodût la prime volte.
Luca, presentinus Marco
Al è un visionari parcè che al rivât a tirâ sù un film di un base semplice. Lu veve za fat par un nestri video “Mai, mai”, dulà che i vevi dât cualchi spont pe senegjature e al è rivât a fâ propit ce che o vevi tal cjâf, tradusint in imagjins lis mês sugjestions: cuasi che lu ves za viodût prime di me. Il comunicadôr vêr al è lui.
Ce nus disêso di chei altris components dai JoNoKognos?
Luca Morassutti “il Cico”, djembè: al è chel che al à mancul tecniche tal sunâ, ma al met plui energjie e passion di ducj. Al è chel che forsit i crôt di plui tal progjet JoNoKognos.
Stefano Locatelli, batarie: chel che si fâs mil problemis par dut, al somee chel plui dûr e invezit al è une vore sensibil. Simpri disponibil cun ducj, un toc di pan!
Mauro Pontisso, bas: il mister X dal grup, di lui no si sa mai nuie, un caratar une vore particolâr… svoladi, ma tal stes timp istrionic ancje lui, cu la passion pe poesie e pal teatri.
Simone Mariotti, ghitare: l’ultin rivât tal grup che al à cjapât il puest di Marco Della Mora, il nestri vecjo ghitarist che, dopo vênus lassâts par studiâ in Austrie, cumò al è tornât in Friûl e al continue a sunâ cuntune altre band, i “Emily’s bed”. Simone al è une vore cuadrât, l’element plui tecnic dal grup.
JNK al nas prime come road movie, ma al finìs par jessi alc di plui…
Marco: O sin partîts come un diari di viaç in ocasion de finâl dal Liet Festival. Dopo al è stât naturâl costruî ce che al è prime dal viaç, ma ancje descrivi cemût che e vîf chi une gjenerazion. E dut chest lu vin costruît insiemit.
Luca: E je stade tant che une sentade cuntun psicolic: nol è facil contâsi in public cu lis tôs sensazions, fasint une fotografie gjenerazionâl. Tal film Marco al rive a descrivi lis nestris personalitâts e la musiche e ven dopo, e je chel element che al lee la storie.
Ce aie lassât cheste esperience dal Liet?
Luca: Nus à dât une cerce di cemût che e je la vite dal musicist. O vin simpri trascurade la autopromozion, parcè che o vin simpri cjapade cheste esperience di grup tant che une maniere di stâ insiemit tra amîs. Par nô e je stade une esperience formative une vore impuartante.
Marco: Dal pont di viste tecnic i JoNoKognos no vevin nuie di mancul, però ancje tal documentari o ai cirût di trasmeti il fat che no si son snaturâts: a àn mantignude la lôr identitât e no àn costruît un “personaç” dome parcè che e vevin di frontâ une platee internazionâl.
Il Friûl isal un ambient favorevul?
Marco: Fevelant di cine o pensi che nol sedi facil rispiet a une grande citât. Però si pues fâ tant, ancje parcè che tai ultins dîs agns la tecnologjie e je cressude, semplificant tancj problemis. Ce che invezit spes al mancje a son dôs robis: une e je une struture di produzion che e dedi la pussibilitât di organizâ il lavôr; chê altre e je une culture dal audiovisîf: al somee banâl, ma al covente studiâ.
Luca: Fevelâ di Friûl tant che un puest sierât al è un pôc ridutîf. Disìn pluitost che il moment al è dificil par ducj e dapardut. Fevelant di musiche, a nivel internazionâl, la ultime rivoluzion musicâl e je stade tai agns ’90 cui Nirvana. E la dificoltât che in chescj agns a àn vût ducj, chi di nô no son diferentis.
Luca, a FriuliDoc e jere in program une vuestre esibizion, invezit ce isal sucedût?
Ehhhh (riduçant)… disìn che si sin cjatâts intune situazion che no jere la nestre e alore o vin preferît no sunâ. Ae fin o jerin contents distès parcè che la nestre filosofie e je chê di divertîsi e fâ divertî: se o vessin sunât probabilmentri cualchidun al varès bruntulât. O vin passade une biele serade parcè che nus pareve di vê fat passâ une biele serade a ducj chei che no nus àn sintût e che a jerin li par mangjâ e par stâ cuiets.
Marco, e cumò ce sucedial dal documentari?
Mi auguri di condividilu il plui pussibil, fasintlu viodi a plui int pussibil organizant proiezions sul teritori, che i ten in particolâr. Par intant o pues anticipâ che o vin preparade la version in DVD cui sottitui ancje par inglês e o parteciparìn a 2 festivals: in Portogal e a Udin, la mostre dal cine a fin Novembar cun altris films di dute Europe. E o stin preparant une sorprese ancje pe Patrie, ma no zonti di plui… Però no sin grancj promotôrs di nô stes e duncje e je forsit la part plui dificil, ancje parcè che come che al diseve Luca, e je stade une esperience une vore intime, nassude ad ôr dal Tiliment che al è la anime che e cor sot vie e che e je plasude une vore, metint dacuardi dutis lis gjenerazions che a stan viodint il documentari.
Prossim progjets?
Luca: Nô o lassìn che lis robis a sucedin… no vin mai cirût puescj par sunâ. O vin tocs gnûf, nus plasarès fâ il tierç Cd…
Marco: O continui a colaborâ cu la Universitât insegnant a Pordenon e o stoi lavorant a diviers progjets, magari alc plui di scrit…
E sul Friûl e la nestre lenghe, cemût le viodêso?
Luca: No pensi che e sedi une lenghe in estinzion e o soi content parcè che o vin rivât a fâ scuvierzi a tancj zovins che si pues fâ musiche ancje par furlan: i Residui di Chernobyl che a àn partecipât chest an a lis selezions dal Premi Friûl lu àn fat dopo vênus sintûts nô. E ancje dopo des proiezions dal documentari tancj zovin mi son vignûts dongje e mi àn fat domandis.
Marco: Il furlan al è une lenghe in evoluzion, e fasint robis di nivel, musiche o cine, tu rivis a tirâ dongje ancje i zovins che a ricognossin la cualitât.
Ce rapuart vêso cu la tradizion, in chest câs musicâl?
Luca: O amet la mê ignorance, ancje se la mê tesi di lauree e je stade su la musiche resiane e duncje o ai cirût di studiâ la tradizion. Ma par fâ musiche, o ai simpri sintût la dibisugne di esprimimi te mê maniere e la mê maniere e je rock ‘nd roll. Ancje par chest o pensi che o vin rivât a tirâ dongje divierse zoventût fasintjur sintî une lenghe che se no a varessin viodût dome come la lenghe dai lôr nonos. Il nestri percors e chel di Lino Straulino su lis vilotis a son parelis, a àn di lâ indevant ducj i doi, cence dibisugne di scuintrâsi.
Marco: Come che o soi fan dai JoNoKognos, lu soi ancje di Lino Straulino. O soi convint che dal moment che o vin une lenghe nestre fevelade, e sedi ancje une “lenghe musicâl” origjinâl e al è just aprofondî il so studi. Però o pensi che la ricercje che al fâs Lino e vadi intune direzion che no je contaminabile cun ce che a fasin i JoNoKognos, parcè che ju learès intun scheme che nol è chel che lôr a sintin plui naturâl. ❚
✒ Christian Romanini
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +
Nature e Ambient / L’unic che si à di crodiji cuant che al conte chê dal ors
Serena Fogolini
Stefano Filacorda, responsabil sientific pal grup di ricercje dal Ateneu furlan su la faune salvadie Un cors par imparâ a cognossi la faune salvadie des nestris Alps, cun lezions teorichis e pratichis su lis tecnichis di monitorament e di cature dai animâi, massime grancj carnivars, ungulâts e uciei.◆ Al è chest l’intindiment de Winter School […] lei di plui +