MUSICHE. Loris Vescovo ‘Targa Tenco 2014’

Ultime ore intant che o jerin in stampe. Un ricognossiment impuartanton al è rivât pe musiche furlane. Loris Vescovo, cul so ultin disc ‘Pensolâti’ (etichete Nota), che o vevin ancje fevelât su la Patrie di Jugn, al è il vincidôr de Targhe Tenco pal album in “dialet”. E je prime targhe di simpri ae musiche in lenghe furlane. E je une buinore di Novembar cuant che Loris, inte sô cjase di San Cristoforo al Lago, frazion di Pergine Valsugana, là che al vîf, al ricêf la biele clamade di bande dal Club Tenco. «Mi fâs un grum plasê che chest ricognossiment al sedi biadelore rivât in Friûl» al à comentât a cjalt il cjantautôr di Trivignan, che cu la sô musiche al è rivât prin di artiscj come Davide Van De Sfroos e i 99 Posse «tancj tocs dal album si ispirin a lûcs e microcosmis des nestris zonis come Gjiviane, Resie, Grau e la Istrie. ‘Pensiolâti’ al fevele di distac e di isolament: al è un disc di gjeografie fisiche in continuazion ideâl con Borderline, il disc rivât in finâl al premi Tenco tal 2009». E ai 6 di Dicembar Loris Vescovo al sarà sul pal dal Teatri Ariston di Sanremo par strenzi finalmentri tes sôs mans la prestigjose targhe. Brâf Loris, i compliments di dute la Patrie dal Friûl! ❚
✒ N.G.