Sfuei Mensîl Furlan Indipendent
Archivi de Patrie

A Tarcisio Mizzau il S. Simon trentecinchesime edizion

............

Il premi S. Simon numar trentecinc al è stât assegnât. Cheste la prime buine gnove che o vin vude martars ai 28 di otubar, li de biblioteche civiche di Codroip. A vinci al è stât Tarcisio Mizzau, cu la opare ‘Speriments di perfezion’.
E no je la sole buine gnove. Rispiet al àn passât, che il premi nol jere stât assegnât, chest an a son stâts ben sedis di lôr a partecipâ. E, in plui di chê che e à vint, a son stadis segnaladis altris cuatri oparis (di Roberto Meroi, Adriano Nascimbeni, Raffaele Serafini e Juncker Florian).
Ma ancje la atmosfere e jere dal dut diferente. L’an passât al pareve di sedi a scuele devant di professôrs ruspiôs che a vevin metudis su lis moschetis, ducj cul dêt pontât e cul lapis blu menaçôs in man. E passave la voie di metisi a scrivi! Chest an i tons a jerin une vore plui calms e o crôt che i partecipants, ducj, ancje chei che no son stâts segnalâts, a vedin vude un pocje di sodisfazion e di gratificazion. Che no je robe di pôc cont.
Ducj a àn fevelât par furlan: il sindic, il president de provincie, il segretari dal premi, il president de Filologjiche, il conseîr regjonâl e ducj i premiâts. Uniche parentesi taliane la leture di un ricuart di Franco Marchetta (la serade e jere dute inmaneade sot il segn dal scritôr mancjât inte primavere stade, cussì come che chê dal an passât e jere intal segn di Amedeo Giacomini), scrit di Giorgio De Tina (ma let dal president de juirie Carlo Tolazzi). Interessante une considerazion fate di Gotart Mitri: oltri che di scritôrs, la lenghe furlane e à dibisugne di letôrs: di chi la impuartance dai cors di lenghe imbastîts de Filologjiche.
No vint let nissune des oparis presentadis, naturalmentri nissun judizi su la cualitât des voris (o prometìn une recension dal libri di Mizzau intun dai mês che a vegnin). Ma al è un fat che, intal ultin an, a son stadis scritis par furlan, almancul cinc oparis degnis di atenzion. No son pocjis.
Ma, salacor, la robe plui biele che e je stade dite e je che lis voris presentadis, chei de jurie lis àn letis cun plasê. E che il premi lu varès mertât plui di cualchidun. Alore al ven di domandâsi se no sedi vere che lis polemichis a zovin, a sticin, a rapresentin une sfide e, in fin dai fats, a constituissin l’ostacul che magari si varès voie di evitâlu, ma che invezit, se si lu fronte, al da la sodisfazion di vê fat un pas impuartant.
Salacor, ancjemò, e coventave propit une inovazion dal premi; e lis novitâts no son mancjadis: la viertidure a lis racueltis di contis (vot su sedis presentadis, une e je stade segnalade), il ‘reading’ (ancje se nol somee che al vedi vût un grant sucès, par chest an) e il fat di rindi disponibil il libri al moment stes de premiazion.
Intes sôs trentecinc edizions, il S. Simon nol è stât assegnât cinc voltis. A son stâts premiâts vincjesîs autôrs (cualchidun plui di une volte) e trentesiet oparis (no dutis di narative). Nol somee propit che a sedin numars di dispreseâ.
Franco Marchetta al varès vût gust a viodi i risultâts di cheste edizion dal premi. Lui che al veve metût jù il progjet di un rilanç e che al veve simpri sburtât par un rignuviment de culture furlane, che al passàs ancje par un rignuviment de lenghe. La buine gnove di chest S. Simon e je che la lenghe e la culture furlane a son vivis. Lu savevin ancje l’an passât, cumò o vin une conferme. ❚
Laurin Zuan Nardin

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +