MUSICHE. I ‘Suns’ de Europe a Udin

La Europe des minorancis linguistichis e torne a Udin ai 15 di Novembar li dal Teatri Palamostre. L’apontament al è cu la seste edizion di Suns 2014, il Festival de cjançon in lenghe minoritarie, nassût proprit in Friûl tal 2009. La manifestazion, che l’an passât e je stade fate a Moena, te Val di Fasse, e je promovude dal ARLeF (Agjenzie Regjonâl pe Lenghe Furlane) e inmaneade di Radio Onde Furlane cu la poie dal Comun di Udin. Sul palc de rassegne dedicade ae creativitât musicâl de Europe alpine e mediteranie a saran 8 grups o soliscj, selezionâts jenfri 26 candidâts, che a presentaran dal vîf une cjançon. Il public al podarà scoltâ artiscj che a rivin des comunitâts di lenghe furlane, sarde, ladine, rumance, ocitane, francoprovençâl e cravuate. De Val di Fasse e rive la zovine cjantautore ladine Martina Iori e dal Cjanton dai Grisons (Svuizare) Pascal Gamboni, che di passe dîs agns al è atîf te produzion musicâl par rumanç sei in patrie che tal Ream Unît. Sul palc dal Palamostre e sarà ancje la lenga d’oc, doprade miscliçant rock e folk dai Lou Tapage, grup che al rive des Valadis ocitanis dal Piemont. Billy Fumey al presentarà invezit un toc cjantât tal francoprovençâl de Francje Contee (France) e pe prime volte a Suns al sarà ancje un grup de minorance linguistiche cravuate dal Molîs: i zovins Kroatarantata. Dal panorame musicâl sart a son stâts sielzûts i Ratapignata, formazion che di agns e met dongje la lenghe proprie cui ritmis dal rock, dal funk e dal reggae. Infin il Friûl, rapresentât di Aldo Sbadiglio e la Famiglia Ananas in Vacanza a Dresda, che a àn juste dât fûr il lôr gnûf album “Ljuba Toast Cricket Club”, e Elsa Martin, frescje vincidore dal premi de critiche “Bianca d’Aponte”, ricognossimet talian dedicât al cjantautorât feminin, cul toc in marilenghe “Cjante”. Dentri dal program de serade si esibirà ancje il grup hip hop sart dai ForeFingers Up!, che al à vinçût la edizion passade di Suns e duncje finalist di dirit al Liet International 2014, il festival dedicât ae musiche tes lenghis minoritariis di dute Europe, che si tignarà ai 12 di Dicembar a Oldenburg, te Gjermanie dal Nord, dulà che al parteciparà ancje il vincidôr di Suns 2014. Udin e sarà il centri de musiche europeane intes lenghis minoritariis ancje intai dîs dongje dai 15 dal mês, in gracie di altris iniziativis leadis a kermesse. Si cjatin sul sît www.sunscontest.com.  ❚
✒ N.G.