Musiche Furlane Fuarte on line

Vêso voie di scoltâ un rap di Dj Tubet o di meti a dut volum il gnûf toc dai Arbe Garbe? O, magari, di tornâ a sintî une sghitarade di Guido Carrara? Po ben, se il vecjo disc al è lât pierdût, chel masterizât no si sint plui ben, o sês fûr de Patrie e no rivais a cjatâ il vuestri grup favorît, no stait a vê pôre. Digitait http://musichefurlanefuarte.bandcamp.com/ e par magjie us comparirâ la interie produzione de etichete Musiche Furlane Fuarte, ven a stâi 40 discs dal 1998 a vuê. L’inovatîf progjet, che al à il grant mert di vê metût online la mari de sene musicâl furlane, al nas de colaborazion cu la etichete ReddArmy, cueste de MFF in ativitât dal 2007, che e prodûs musiciscj come i Carnicats, Dj Tubet e Madrac, par ricuardâ dome cualchidun. Cuntun link si pues (za di vuê) scoltâ sore nuie dut il catalic e comprâ i discs in alte cualitât (ancje in format FLAC pai intindidôrs) par a pene 2 euros par album. Insome cun 10 euros o zontais a vuestre librarie 5 cd de miôr produzion de nestre. Bon pai scoltadôrs de buine musiche in marilenghe e bon ancje par Onde Furlane: i bêçs a laran a finanziâ lis ativitâts de radio. Miôr di cussì no si podeve fâ.
Natascia Gargano