Ulisse e i Ciclopi vincidôrs dal Premi Friûl

Un Cuba Libre intune man e un spagnolet in chê altre. Cussì i Ulisse e i Ciclopi a àn ricevût il Premi Friûl te suaze verde dal Parc dal Cormôr ai 19 di Avost passât. I doi zovins di Mortean ju vevin za cognossûts proprit al Premi Friûl dal an passât, cuant che a cjapavin une menzon pe origjinalitât e caratar de lôr propueste. E chi a son tornâts, cheste volte puartant a cjase il prin premi dal plui impuartant concors musicâl in lenghe furlane rivât ae sô 27esime edizion, «par vê vût cûr di proponisi cuntune formazion dal dut gnove tal panorame musicâl furlan».
La inovazion de musiche furlane chest an e sune cu la vôs agressive e poetiche dai Ulisse e i Ciclopi, grup punk blues tindint al stoner psichedelic. Disenûf agns, Ulisse Viezzoli ae vôs e ghitare, al è il plui zovin vincidôr de storie dal Premi Friûl, dome Dek Ill Ceesa (che al à presentât la serade cun Mojra Bearzot) al veve fat tant, vincint tal 2005 a dome vincj agns. Lui al è duncje Ulisse e Moreno Fedele, vincjetrê agns ae batarie, al è il “ciclope”. No basta pi/fa fenta di nuia/che va dut ben/ben no và/no va ben!/No basta resisti/gji ûl la rivolusion, a cjantin cun “Rivolusion”, il toc bilengâl (furlan e talian) vincidôr de kermesse. E chi si sint la çate de famee: Ulisse al è fi di art e chestis a son lis peraulis di une poesie di sô mari, Lussia di Uanis, une des figuris femininis plui esplosivis dal Friûl contemporanei, che e a batiât la vitorie de band distropant une butilie di vin, discolce in prime file sot dal palc. Cumò o spetìn dome di scoltâ il disc, che daûr tradizion dal premi al sarà editât de etichete Musiche Furlane Fuarte, par viodi dulà che al rivarà Ulisse cul so compagn.
Insiemi cun Ulisse e i Ciclopi a àn partecipât ae finâl dal Premi Friûl altris cuatri grups: Sunrise (progjet de cjantautore Nicole Lizzi), Trio Tubazzi (rock sconseât ai delicâts di stomi che si è esibît cu la cjançon “Mangano eroe”), (H)ausbau (formazion elegante de Val di Arzin che e cjante lis poesis di Luigina Lorenzini) e Umori Instabili (duo folk cjantautoriâl di Cjamin dal Tiliment). La serade, organizade – tais o no tais – de scuadre di Radio Onde Furlane cu la colaborazion di Homepage Festival, chest an si è davuelte li dal Teatri Palamostre al Parc dal Cormôr, cun chê di ufrî une suaze plui dongje dal spirt rock de manifestazion. Un bon risultât pe libertât di moviment e informalitât, mancul bon a nivel di concentrazion viers lis esibizions.
A sierâ la fieste i Luna e un quarto, vincidôrs de edizion stade, che cul lôr gnûf disc “Basse Pressiòn” a àn scjaldât il teren e i cuarps a dovê, cuntun public discjadenât tes danzis. Un biel viodi: cheste e je la musiche che e ven fûr dal Premi Friûl.
Natascia Gargano