Fin tai agns Otante, tal paîs e rivave tante int,
ancje dal forest, par scoltâ, balâ
e passâ moments di ligrie cul innomenât tercet
E je une fieste par ducj. Par ricuardâ, par mantignî vive e par puartâ indevant une tradizion che e je tacade tor la fin dai agns Sessante e che e je lade vie drete fin te metât dai agns Otante. Cuant che a Cleulis, tal storic Bar Pakai, si riunive tante int di Cjargne, de furlanie e dal forest, fintremai de Austrie. Ogni domenie, par scoltâ, par balâ e par passâ moments di grande ligrie cul armonicist Amato Matiz, il lironist Gjenesi Puntel, il ghitarist Paolo Morocutti e il cjantant Stefano Paletti. Il Trio Pakai. Un grup mitic di musiciscj che ancje vuê al met dacuardi gjenerazions su gjenerazions, tant amât che al è. Sedi di bande di chei no plui zovins – che a àn cognossût il Trio di persone -, sedi dai zovins che a sunin cun tante passion ancjemò cumò lis lôr melodiis.
Pal Trio e pai lôr storics amîs, tant che la armoniciste Cecilia Boschetti, leader dal “Trio Cecilia”, e tancj altris sunadôrs furlans plui o mancul cognossûts, la associazion “Giovins Cjanterins di Cleulas” insiemi al circul culturâl “La Dalbide” di Çurçuvint, e met adun ancje chest an l’incuintri “Une domenie in ligrie cun Pakai e amîs”, domenie ai 30 di Setembar tal Bar Pakai di Cleulis. A son invidâts a partecipâ sunadôrs di armoniche, ghitare, liron, cjantants, musiciscj di ogni sorte, balarins, amants dal folk cjargnel e de musiche di tradizion. Zovins e mancul zovins, soliscj e grups musicâi, inte volontât apont di meti insiemi lis esperiencis dai veterans cu lis passions dai zovins viers lis usancis de musiche in Cjargne. Par creâ un leam fuart che al permeti la continuazion di pratichis che a meretin di restâ vivis e vivarosis. Par partecipâ ae domenie pakaiane – la iscrizion e je gratuite e a ducj i musiciscj ur vignarà ufiert di mangjâ e di bevi – al baste scrivi une mail a giovinscjanterins@gmail.com o telefonâ al 3383365160, dentri di vinars ai 29 di Setembar, dant lis specifichis dal numar dai components e dal strument sunât.
Si balarà, si ridarà, si sunarà, si mangjarà e bevarà insiemi. Un event di no pierdi, une ocasion par passâ un bon moment cui elements vîfs dal Trio e ducj i lôr amîs: Stefano Paletti che al à simpri une biele vôs, Ennio del Fabro che al à sostituît diviersis voltis Pakai ae armoniche e Paolo Morocutti, storic ghitarist dal grup e autôr dal Trio, tant che la plui part des musichis e des peraulis dai lôr tocs, aromai cence timp, lis à scritis lui. Pe ocasion, al pâr che Paolo al veti la idee di presentâ lis sôs ultimis composizions: “Fischiosauro” e “Mari”, a cuarantedoi agns dai siei prins lavôrs, come “Lignan”. Tal tendon de plaçute Pakai, al sarà ancje pussibil mangjâ i plats plui gjenuins de cusine cjargnele, come i cetant bogns cjarsons di Cleulis.
Il progjet “Une Domenie in ligrie cun Pakai e amîs”, al vûl jessi un moment di grande condivision umane e artistiche, dulà che ducj a puedin esprimisi, tal non dal storic tercet che al à fat balâ e sumiâ une epoche. Une scuadre, il Trio Pakai, che e à zirât dut il Friûl, mieze Europe, la Afriche, la Americhe, la Argjentine, inventôrs di un mût di fâ musiche sclet, onest, fiestôs, imprevedibil, tai Fogolârs Furlans, intes sagris, tai matrimonis, dapardut e in ogni ocasion. Continuìn cheste biele usance. ❚
Alessio Screm
