Edizion 23 pal Festival
di musiche antighe dai Dramsam
Musica Cortese e torne cuntune edizion che e met adun musiche antighe, storie, paisaç e memorie. Il Festival internazionâl di musiche antighe tai centris storics dal Friûl-Vignesie Julie e dal Gurizan sloven, inmaneât dal ensemble Dramsam, al rive ae 23e edizion e al propon, dal 4 di Lui al 10 di Otubar, dîs apontaments fra glesiis, museus, dimoris storichis e cjistiei.
◆ Il titul, “Sants, poetis e navigadôrs”, al segne un percors ben clâr e intrigant. I sants a clamin la devozion, i poetis a puartin tal mont dai cjants storiis e peraule liriche; i navigadôrs a vierzin lis rotis dal Adriatic e i incuintris fra culturis de Ete di Mieç. La musiche medievâl e rinassimentâl e reste il cûr dal cartelon, ma il festival al cîr e al cjate ancje dai dialics gnûfs: visitis vuidadis, prolusions, percors naturalistics, moments conviviâi e il cine mut, cu la colone sonore dal vîf di “Robin Hood” dal 1922, curade di Dramsam in colaborazion cul Premi “Sergio Amidei” di Gurize.
◆ La viertidure e je sabide ai 4 di Lui, aes 20.00, tal Ospedâl e Glesie di Sant Zuan di Sant Tomâs di Maian. Agnul Floramo al introdusarà la serade e i Dramsam a presentaran “Laudato sie, mi Signore”, program dedicât ae devozion poetiche fra Cuatricent e Cinccent. L’ensemble, cognossût pal lavôr sul patrimoni musicâl medievâl di aree romaniche, al unìs rigôr di ricercje e gust naratîf.
◆ Domenie ai 5 di Lui, tal Museu Archeologjic Nazionâl di Cividât, Aball Redon al puartarà “Figh’e lasagne”, musiche di taule, di ostarie, di convivi, di fam, sêt e dizun, cuntune note ironiche. Sabide ai 11, tal cjistiel di Tresesin, dopo la visite vuidade condusude dal sindic Giorgio Baiutti, La Manticora e propon “Miragres!”, dedicât aes Cantigas de Santa Maria e al incuintri fra culturis cristianis, musulmanis e ebraichis ae cort di Alfons X. Domenie ai 12, a Vile Codelli – Cobenzl di Mosse, Valter Colle al introdusarà “Cori Miu” cun Pino De Vittorio, vôs fra musiche antighe, teatri e tradizion dal Sud Italie, e daspò al sarà imbandît un “buffet storic” di bande de Academie Jaufrè Rudel.
◆ Ai 16 di Lui, tal Palaç Torriani di Gardiscje, Matteo Zenatti al darà vôs a “Raimbaut, vida et cansos”, conciert-recital sul trovadôr Raimbaut de Vaqueiras. Ai 23 di Lui, tal Parc Coronini Cronberg di Gurize, Dramsam al compagnarà dal vîf “Robin Hood”, trasformant il film intune aventure fra cine des origjinis e Ete di Mieç imagjinade. Ai 26 di Lui, inte Glesie dal Sant Crucifìs di Cormons, dopo un percors naturalistic a La Subide, Anonima Frottolisti e presentarà “Gloriosus Franciscus”, fra memorie francescane e repertoris medievâi.
◆ Vinars ai 31 di Lui, tal Museu Nazionâl di Archeologjie Sotmarine dal Alt Adriatic di Grau, De Vulgari al proponarà “Diario di bordo”, ven a stâi un viaç sonôr su lis olmis di Zorzi, sorenomenât Trombetta, musicist e navigadôr venezian dal Cuatricent, fra rotis adriatichis e sunôrs de Serenissime.
◆ Daspò de polse estive, il festival al tornarà vinars ai 25 di Setembar te Vila Vipolže di Vipulzan, in Slovenie, cun “Amour courtois” dal Trio Bailly Lopes Baker, coproduzion cun Flores Musicae e Kulturni Dom di Nova Gorica. Si trate di un puint fra melodiis medievâls, improvisazions, strumentazions storichis e jazz. La sieradure finâl e sarà sabide ai 10 di Otubar tal Palaç Attems Petzenstein di Gurize, cun visite vuidade, aperitîf “cortês” e “Arianna vive” dal ensemble Dialogos, fondât e direzût di Katarina Livljanić, in coproduzion cun Alto Livenza Festival.
◆ Musica Cortese e conferme la sô vocazion di volê fâ dialogâ ricercje musicâl, patrimoni e conte dal teritori. Ogni apontament al devente un mût par scuvierzi lûcs e repertoris, metint in relazion epochis lontanis e sensibilitât contemporanie, memorie e presint.
◆ Il festival al è sostignût de Regjon Friûl-Vignesie Julie, Fondazion Carigo, Fondazion Friûl, Comuns di Gurize, Gardiscje e Cormons, Kulturni Dom di Nova Gorica, Direzion Regjonâl Museus dal F-VJ, Premi “Sergio Amidei” e Consorzi pe Difese dai Cjistiei storics dal F-VJ. Informazions e inzornaments su dramsam.org e sui profîi social dal ensemble. ❚
