Dai 3 di Lui ai 5 di Setembar: musiche
di ogni sorte tai lûcs plui biei dal Friûl de Alte
Trentecinc Istâts e no si sintîju, ma scoltâju! Carniarmonie, il festival de mont furlane inmaneât de Fondazion Luigi Bon cu la direzion artistiche di Claudio Mansutti, al torne dai 3 di Lui ai 5 di Setembar cuntune edizion speciâl, la numar 35. Un complean che al conte no dome la vite lungje di une rassegne, ma ancje la sô capacitât di restâ vive, ricognossibile, uniche e ogni an gnove. A saran adiriture 43 i concierts fra Cjargne, Valcjanâl, Cjanâl dal Fier, Val Resie e une date a Nova Gorica, cun Tumieç comun a cjâf di une rêt di aministrazions, parochiis, associazions e realtâts locâls.
◆ La formule e je chê che il public al à imparât a cognossi di un biel toc, ven a stâi propuestis di musiche tai lûcs plui biei, e cualchi volte plui platâts dal Friûl de Alte. Glesiis, plêfs, domos, museus, teatris, salis, parcs e spazis vierts a deventin senaris naturâi indulà che si incrosin musiche classiche, jazz, funk, gospel, contemporanie, sunôrs dal mont e sperimentazions di ogni sorte. Carniarmonie e je une rassegne, ma ancje une maniere di vivi il teritori, metint dongje cualitât artistiche, patrimoni, turisim culturâl e sostignibil e grande partecipazion.
◆ La scree e sarà vinars ai 3 di Lui, aes 20.30, inte Badie di Sant Gjal di Mueç, cul conciert “Paesaggi sinfonici”. Protagoniscj il storic Trio Smetana, fondât a Praghe tal 1934, e la Fvg Orchestra direzude di Georgios Balatsinos. Schubert, Voríšek e Mendelssohn a inviaran la manifestazion cuntun respîr internazionâl.
◆ Il program al à events cuasi ogni dì, fra Lui e Avost, e al metarà in viste nons di grant rilêf. Sabide ai 11 di Lui, a Fresis di Denemonç, la pianiste Michelle Candotti e puartarà il recital “Tra ombra e luce”. Sabide ai 18 di Lui, te glesie di Sant Nicolau a Damâr, a rivaran i Cameristi della Scala cun Massimo Mercelli. Domenie ai 2 di Avost, te glesie di Sante Marie Assunte a For Disore, il conciert di gale dal Anciuti Music Festival al viodarà Albrecht Mayer, prin oboe dai Berliner Philharmoniker, insiemi cu la Fvg Orchestra direzude di Paolo Paroni.
◆ Fra i moments plui spietâts al è chel dai 13 di Avost tal domo di Sant Martin a Tumieç: une vegle noturne cul Slovenian Philharmonic Choir direzût di Stephen Layton. Ai 20 di Avost, tal Teatri Italia di Pontebe, al lusirà il zovin violoncelist Ettore Pagano, vincidôr dal concors internazionâl resint Queen Elisabeth di Bruxelles, unic talian. Al sarà in Cjargne cu la Münchner Kammerphilharmonie Dacapo direzude di Franz Schottky.
◆ Ma Carniarmonie nol cjale dome ai grancj nons internazionâi. Une part essenziâl e je dade ai artiscj dal teritori, aes formazions regjonâls e ai zovins musiciscj. Un classic che al plâs simpri, sintî i artiscj di chenti. Tal cartelon a tornin il Coro del Friuli Venezia Giulia, i Pueri Cantores dal domo di Udin e diviers soliscj par “55 secondi”, la opare musicâl ideade di Fiorenza Cedolins, musicade di Cristian Carrara e dedicade ai cincuante agns dal taramot in Friûl, in program ai 5 di Setembar tal Teatri Candoni di Tumieç. Si segnalin ancje la Accademia d’Archi Arrigoni a Cesclans, il Luca Colussi Quartet cun Francesco Bearzatti a Dimpeç, Rudy Fantin a Tarvis, e Mauro Ottolini & Trio Osaki a Mueç. Ma no son dome lôr. Si scuen lâ a viodiju e soredut a scoltâju, par scuvierziju.
◆ Tal 35t dal festival, al cjape spazi ancje il formât “Concors”, leât al Cors di Alt Perfezionament di Musiche di Cjamare de Fondazion Luigi Bon, tignût de professore Federica Repini. Nûf apontaments a daran il palc ai ensembles zovins selezionâts, tra chescj a son diviers furlans, che a puartaran tai borcs cjargnei repertoris di cjamare di cualitât.
◆ E torne “Dopo Messa”, lis buinoris dai 9 e 30 di Avost a Vile di Cjargne e a Damâr, e, altre novitât, “Note di Comunità”, cul Trio Zigano ai 26 di Avost a Testeons di Paluce e ai 27 a Davâr, dedicât ai Centris di Agregazion de Cjargne e ai anzians. Lis colaborazions si slargjin ancjemò: Anciuti Music Festival, Fvg Orchestra, Festival di Lubiane, Emilia Romagna Festival, CarniaMusei, Via Iulia Augusta Kultursommer e Carinthischer Sommer Festival. Il risultât al è un festival che al met in relazion art, memorie, paisaç e comunitât, dentri e fûr dal Friûl.
◆ Carniarmonie si realize cul sostegn de Regjon Friûl-Vignesie Julie, dal Ministeri de Culture, dai Comuns aderents, des parochiis, dai mecenats de Fondazion Luigi Bon e di diviers sponsors privâts. Il program complet al è su www.carniarmonie.it e sui canâi social dal festival. Lait in Cjargne a cjatâ armoniis! ❚
