Inte citât no mancje la brave int
che e ricognòs la veretât
Magari cussì no, tes pontadis jessudis fin cumò o podaressin vê dât la impression che a Pordenon a son ducj cuintri i furlans, che nissun al (ri)cognòs la realtât e la veretât sul Friûl intîr e, soredut, su chel di soreli a mont. Nol è cussì, a Pordenon al è un grum di brave int, dome che – come che al capite spes – a fasin plui scjas chei pôcs che a berlin strambolots e falsetâts che no chei in scuare. Achì o volìn rindi merit ai galantoms di Pordenon – che a son tancj e no podìn ricuardâju ducj – cun doi esemplis impuartants pal rûl che a àn vût in citât.
◆ Scomencìn cul sindic emerit (e di grant merit) Alvaro Cardin. Pordenonês sclet, di marilenghe venite, al à simpri rispietât il Friûl, il furlan e i furlans. Cardin al è stât, tra l’altri, grant amì di Renato Appi, poete e om di culture furlane poliedriche, par altri ancje lui di dissendence venite e di lui indi scrivarìn une altre volte. Alvaro al è stât fra i prins socis dal “Grop Cordenones dal Ciavedal” (ancje di chel o scrivarìn plui inlà) e al partecipave aes ativitâts. Sul plan public e aministratîf, ogni volte che e saltave fûr la fufigne dal “conurbament”, ven a stâi la idee malsane di meti Cordenons sot Pordenon, Cardin le à çoncjade disint che si pues colaborâ e judâsi ancje restant doi o trê, viodint che i centralizadôrs di citât a volaressin cjapâ dentri ancje Purcie.
◆ Passìn a un altri galantom di Pordenon, il dotôr Abele Casetta. Casetta, che al è mancjât timp indaûr, al fo funzionari e dirigjent tal Comun di Pordenon. Cu lis competencis che al veve, e vint a disposizion i numars dai finanziaments de Regjon aes provinciis, al butà fûr doi libruts titulâts “Trieste è lontana” e “Trieste è lontana 2”. In chestis publicazions Casetta al ripuartà, cui numars a consuntîf si che duncje sigûrs, la ripartizion dai bêçs intes Provinciis fate de Regjon, rapuartantju cui abitants di ognidune. I doi studis a son articolâts su nûf cjapitui, come che a son chei dal rindicont regjonâl (Sanitât, Gjestion dal teritori, Ativitâts economichis, e vie indenant) plui il struc gjenerâl. La analisi e mostre che plui o mancul par ogni cjapitul di spese Triest al à vût plui bêçs di ce che i saressin spietâts (di li i titui dai libruts) e, par cuintri, a chês altris Provinciis indi son rivâts di mancul. Cun chescj studis il dotôr Casetta al à smascarât chei bausârs che a disevin (e cualchidun lu dîs inmò): “Udin si profite, al puarte vie a Pordenon…”.
◆ Abele Casetta al fo galantom, al cirì e al pandè la veretât, par chest, a Pordenon, no ducj lu ringraciarin; ma lu fasin nô di cûr.❚
