Sul social Instagram a àn grant sucès i accounts che a spieghin par inglês peraulis locâls. O vin sintût i autôrs di chei che a àn vût plui sucès in Friûl fin cumò
La ultime mode di Instagram e je chê di spiegâ par inglês peraulis in dialet o tes lenghis locâls in maniere spiritose e simpatiche. Al pâr che la prime a vê vût la idee e sedi stade la instagrammer Carolina Venosi cul so account @Romeismore. Di li, de Sicilie cun @Siciliasays, passant par dut il stivâl fin a rivâ al Venit cun @Spokenveneto, al è dut un menâ di accounts di cheste sorte. Par solit, a doprin il sufìs “says” e “spoken”, dongje dal lûc di indulà che a vegnin lis peraulis. In Friûl, fra chei che a àn plui followers o ‘nt vin doi in teme Cjargne, @CarniaSays e @SpokenCarnia, e fin pôc timp fa al jere atîf ancje un @UdineSays.
Cui autôrs di @CarniaSays si viodìn in grant segret, parcè che a àn voie di mantignî l’anonimât. A son une fantate e un fantat tor dai vincj agns.
__
Cemût mai cheste ale di misteri?
Parcè che nus somee che la pagjine e vedi un significât al di là di cui che le fâs. E al è deventât alc che nus caraterize: par esempli, chê altre dì o vin fat une interviste a Radio Tausia (une biele radio internet fate di un grup di zovins cjargnei, ndr) e nus àn modificât lis vôs cu la eletroniche par no fâlis ricognossi. Nus pâr ancje divertent.
__
Cemût vêso tacât?
O soi stât jo – al dîs il fantat – e fra l’altri o jeri a Triest (al rît, ndr). Za di un pôc, o vevi viodût tancj accounts di chest gjenar e mi soi dit “parcè no fâlu par cjargnel?”. O vevi il celulâr in man e o ai scrit un test, condividintlu cui miei amîs. Duncje si sin metûts ducj insiemi a fâju e cumò o sin un gruput di nô che ju inventìn, ancje in gracie dai sugjeriments dai letôrs.
__
O fasês la sielte di no doprâ la grafie standard, parcè?
Parcè che no nus “sune” masse cu lis particolaritâts dal cjargnel. In chê uficiâl a son soluzions fatis di pueste, tant che il “sj”, ma par cui no le à studiade nol è naturâl. No vin la pretese di insegnâ alc a nissun, ma dome di divertî, duncje o vin fat cheste sielte, ancje se no sarès corete.
__
Un sucès che al è partît di subit…
Sì, magari i followers a aumentin di plui cuant che o metìn cualchi peraule che i plâs di plui al public, ma si va indevant in maniere costante.
__
E ce pensaiso di chê altre pagjine cjargnele @SpokenCarnia?
Tal imprin o sin restâts un tic mâl parcè che, subit dopo che o vin tacât, o vin viodût cheste pagjine cul stes argoment. Si sin dits “vino di fâ simpri come i Cjargnei?” (a ridin, ndr). Po dopo, o vin viodût che a fasin robis diviersis des nestris, cu la grafie standard e cun dongje la promozion dal teritori… Une robe plui “istituzionâl”, disìn. Nô invezit o sin plui matarans: o metìn lis peraulis ma ancje i memes, e cumò o vin inviât l’oroscop, che al à vût gradiment. Duncje, nissun probleme cun lôr.
I fantats di @SpokenCarnia no àn problemis di anonimât. Mi cjati cun doi di lôr, Andrea e Gabriele.
__
Cemût vêso tacât, e cemût mai subit dopo di un account cul stes argoment?
Al jere di tant che o volevin fâle, soredut sul esempli de pagjine @SpokenVeneto; o vevin za avonde materiâl. O sin un grup, e par vie che cualchidun di nô al è tichignôs (a ridin, ndr), prime di metisi ben dacuardi al passe il timp. Cuant che o jerin li par publicâ, o vin viodût @CarniaSays: si sin dits “ce sfortune!”, ma o vin decidût di tacâ a publicâ chel che o vevin.
__
E cemût sono i rapuarts cun chel altri account cjargnel?
No vin fastidis cun lôr, ancje parcè che ognidun al fâs un discors diviers. Nô o vin chê di promovi la Cjargne cu la scuse des peraulis tradusudis in maniere umoristiche: par esempli, lis alternìn cun bielis fotos dal teritori. @CarniaSays al fâs plui robe simpatiche e vonde, par esempli ancje cui memes.
__
In trops sêso?
Uns siet di nô, ancje cjargnei che a son a stâ fûr dal Friûl: par esempli, une e je une fantate di non Chiara che e viôt principalmentri dal inglês.
__
Parcè fâ chest account?
Une intenzion e jere, al di là de Cjargne, di promovi ancje la lenghe furlane su Instagram, pai zovins. In chest social no jere tante robe furlane, a part l’account di Average Furlane Guy, che al ven però de lôr pagjine Facebook. I account «Says» e «Spoken» a son une robe “native” di Instagram.
__
Voaltris o doprais la grafie uficiâl, dulà le vêso imparade?
Jo e un altri dal grup o vin fat il servizi civîl in Filologjiche (al dîs Andrea, che al è ancje president de Pro Loco de Val Pesarine, ndr), e le ai studiade li. O doprìn chê ancje parcè che in gracie dal vocabolari e dai varis imprescj che a son stâts prontâts (coretôr, app e v. i.) o vin un riferiment sigûr par ducj. Dut câs, o cirìn di vê ancje une atenzion particolâr pes variantis cjargnelis (par es. riguladot, cjanalot).
__
Parcè àno sucès i accounts a teme Cjargne e no Friûl?
Parcè che la Cjargne e je plui caraterizante e simpatiche. Nus somee che un fatôr di sucès al sedi propit la particolaritât locâl, e in Friûl a ‘nd è tantis. Par esempli, al jere @UdineSays che al à vût un grant sucès, ancje se cumò al à sierât. Fâ une robe gjenerâl sul Friûl al è masse impegnatîf par nô: fasint cussì, o podìn centrâsi miôr su lis particolaritâts de nestre amade Cjargne, in mût ancje di publicizâle. ❚
