Cemût nassino e cualis sono lis particolaritâts des mascaris de frazion paularine di Ravinis? “Il prin grup di volontaris dal Carnevâl artistic di Ravinis – nus spieghe Fiore Screm, de Asc Ravinis – si forme al principi dai agns ‘80 de idee di fâ mascaris che il lôr aspiet al podès onorâ e tignî in vite in maniere simboliche particolaritâts, costums e liendis dal Cjanâl di Incjaroi”. La lôr ativitât e va indenant cun sucès fin a rivâ ae formazion de Associazion Ravinis tal 1991. Lis mascaris a son fatis dutis a man e a son il risultât straordenari de creativitât, gust artistic, cognossince, dedizion e passion dai volontaris che, cun cjâf e man propriis, si son impegnâts di ogni passaç par fâlis.
◆ “L’aspiet des mascaris al colpìs pe cure minuziose di ogni lôr detai, de finece dai tiessûts a chê dai materiâi, dal inzen struturâl ae cumbinazion complessive di colôrs, sfumaduris, formis, par rivâ a un efiet di insiemi finâl spetacolâr”. Tantis di chestis a rapresentin un element carateristic dal Cjanâl di Incjaroi, che al pues lâ des liendis tipichis (come chê dai Guriuts, dedicadis ai spirfolets dai boscs des contis di chi) ai mîts peâts aes popolazions celtichis che a àn vivût in chescj lûcs (tant che chel di Belen, la divinitât celtiche de lûs). Ma no dome: intal agns a àn cjapât forme mascaris che a rapresentin elements naturâi “sempliçs” ma di impat estetic fuart (tant che la serie “Crystal”, che e rapresente la bielece fragjile dai cristai, o “Lunari”, dedicade aes fasis lunârs e ae lôr influence su la vite di ogni dì) o ancjemò mascaris dal dut origjinâls tant che “Scac al Re”, che a riclamin tant l’aspiet des pedinis dai scacs che ancje il zûc dai contrascj tra il ben e il mâl, la lûs e la ombre.
◆ La associazion “Ravinis” e à metût adun ancje cjars alegorics che, intune cu lis mascaris, in passât a sfilavin ogni Carnevâl pes viis di Paulâr; dal 2011 incà e je scomençade ancje la programazion des sfiladis, che si son fatis fin a cualchi an indaûr, in ocasion dal avigniment culturâl “Mistîrs”.
◆ Simpri intal 2011, il grup di Ravinis al à aderît al progjet culturâl Ecomuseu “I Mistîrs” di Paulâr, partecipant ae inaugurazion di un museu che al espon part des oparis artistichis realizadis in 30 agns di Carnevâi e 20 agns di associazion. Chest museu al da acet a tancj visitadôrs, in particolâr a son grups organizâts di agjenziis, comitivis e scueladis, e al è simpri disponibil par visitis vuidadis e sore nuie daûr prenotazion.
◆ Cuâi sono i events principâi che a àn caraterizât la storie di chestis mascaris? “Vie pai agns o vin rapresentât plui voltis la nestre regjon partecipant a avigniments a nivel talian e internazionâl, e vincint ancje premis di lustri, tant che par esempli il Prin premi internazionâl tal 2001 pe “Mascare artistiche plui biele” al Carnevâl di Vignesie; intal 2005 il “Premi Speciâl” pal “Costum plui inovatîf e origjinâl” e il “Sigjîl di Arint” de citât a Abano Terme; dal 2000 al 2004 il Prin premi al Concors nazionâl “Maschera d’argento”, intal 2007 o vin partecipât ae viertidure dal Carnevâl di Viareggio; intal 2008 o vin vinçût il premi pe Art ae trentesime edizion de Rassegne Cjargnele cu la mascare “Celtic – il fûc di Belen”; intal 2010-2011 la mascare “Lunari” e à vût il Premi speciâl tant che “Miôr costum dal Friûl-Vignesie Julie par inovazion e tecniche”.
◆ “Cun di plui – peraule di Screm – o vin vût l’onôr di contribuî ae cerimonie di viertidure de Fiere Internazionâl “ARTIGIANOINFIERA” di Milan intal 2014, intant che intal 2013 la mascare “Celtic” e à viert une serade di gale a Montecarlo. Infin, intal 2014, il nestri grup al à rapresentât il Friûl ae sfilade innomenade di “Sanremo in fiore” in direte RAI pe trasmission LineaVerde. In totâl, tra concors artistics e Carnevâi, o vin partecipât a plui di 300 avigniments. ◆ O vin puartât la bielece de nestre tradizion in diviersis manifestazions impuartantis tal forest, tant che il Carnevâl di Mulhouse in France, o in Paîs tant che Svuizare, Cravuazie, Austrie e in Normandie. I ten infin a marcâ che lis mascaris a son stadis ogjet di studi de bande de Universitât dal Friûl, cuntune tesi di lauree in Siencis dal Turisim Culturâl che e à tocjât i temis de autenticitât, identitât e tradizion.” ❚
