“Omenut di aghe” lu diseve gno nono bis, fevelant di cualchi frut. Cheste espression e rint, cuntune bielece uniche, la sensibilitât di un nono che al saveve a cjalâ e che, colpît dal compuartament che ta chel moment alì al veve un frut, lu veve definît cussì, cul confuart di vê viodût i trats par podê rimeti in lui la sperance pal om che al sarès deventât un doman: il so prometi ben.
◆ Il riferiment implicit al vin, che al rive in maniere imediade specificant “di aghe”, al è bielissim par un zovenut no ancjemò dispatussât e de juste prospetive.
◆ In maniere semplice, sintetiche, clare e profonde un nono al descrîf ce che al viôt intun frut. Dome une peraule ma che e rive a fâ stâ ben.
◆ Nuie ce fâ cun ce che si sint in dì di vuê cuant che, fevelant di fruts, si doprin peraulis altisonantis che si ripetin dome par mode, dentri di frasis che no àn un significât concret e limpi. Concets di une banalitât avilente, spiegâts in maniere confusionarie, che si pierdin in discors che, di lôr, la uniche robe che e reste al è il ritmi sgnervant de solite naine.
◆ Une fevelade sometude e cence grinte, plene di une terminologjie complicade doprade par taponâ in maniere scjadinte il vueit che al è daûr. No trasparìs nissune bielece, nissune sperance, a emerzi e je dome la mancjance di concretece di un fevelâ che al evidenzie la mediocritât di un presint che nol sa dâ une prospetive; parcè che di viodi in prospetive a nissun i interesse plui nuie.
Simpri plui da râr, ma cualchi “omenut di aghe” si lu viôt ancje in dì di vuê. ❚
Omenut di aghe
Luca Bertossi
