Interviste cun Paolo Patui: insegnant, scritôr,
ma soredut autôr e grant apassionât di teatri
Paolo Patui, classe 1957, al è di Udin. Insegnant, scritôr, autôr di teatri. Dal 2020 al 2022 al è stât diretôr artistic dal Teatri Stabil Furlan. Il teritori e la culture dal Friûl a son il font dai siei studis e des sôs oparis, scritis par talian e par furlan. Tra chês par furlan Bigatis. Storie di donne friulane in filanda, in colaborazion cun Elio Bartolini.
__
Paolo, di dulà sêstu e in ce ambient sêstu vignût sù?
Jo o ven fûr di une famee contadine, sbarcjade a Udin dopo la vuere. Chest al spieghe che il talian a cjase mê al jere considerât un alc di impuartant, il segn di une piçule scjalade sociâl. Mê mari e gno pari a àn simpri fevelât par furlan, ma cun me e mê sûr par talian. La lenghe e il mont furlan e de sô culture par me, piçul, e jere un alc di stranîr.
Cuant che o jeri al liceu classic Stellini o ai cjatât cui che mi à fat cjapâ cussience di chel che al jere il Friûl: Gilberto Pressacco, gno professôr di religjon. Un professôr une vore a la man, che nus provocave cun domandis e riflessions, e al fevelave cun nô di Adorno e Marcuse, di contestazion, ma ancje di Aquilee, des lenghis minoritariis.
_
E cuant âstu tacât ancje a fevelâ furlan, recuperantlu?
Cheste e je une storie curiose: a Triest! O ai fat la Universitât li, e o condividevi l’apartament cun 6-7 fantats che a vignivin di dutis lis bandis dal Friûl e che fevelavin par furlan, e cussì o ai tacât a fevelâlu cun lôr.
_
Ti visistu la prime robe che tu âs let par furlan, e par scrivilu cui sono stâts i tiei mestris?
Chel al è stât plui tart, cuant che o ai scomençât a lavorâ cun Elio Bertolini, che mi à passât doi libruts di poesie che al veve scrit Poesiis Protestantis e Canzonetutis. Po dopo o soi lât indevant cun cualchi test teatrâl, e al è stât Franco Marchetta che mi à sburtât a lei par furlan. Un che o ai let al è Alberto Lucchini, che al scriveve tal furlan di Sant Zorç da la Richinvelde, di dulà che al vignive: un omp cuntun voli larc e viert su la culture furlane, plen di ideis e iniziativis. Mi plâs citâ ancje Maurizio Mattiuzza, in particolâr il so «l’inutile necessitât».
_
Cuant âstu tacât a scrivi, e parcè massime di teatri?
O ai simpri vût la passion di pandi traviers la scriture ce che o sintivi. Di zovin o scrivevi cjançons. Cuant che mi soi rindût cont che a jerin brutis (al rît, ndr) o soi passât ad altri e o ai scrit un monolic teatrâl, «L’insuccesso», che al à vinçût un premi e soi lât dilunc a scrivi pal teatri. O crôt une vore inte fuarce di cheste art, dulà che si dopre no une lenghe leterarie, ma chê di ogni dì, chê spontanie, buine di trasformâsi e di rinovâsi. Lu ai imparât soredut di Angela Felice, che e je stade une femine vivarose di culture e di teatri, e ancje di Gigi Dall’Aglio, regjist di Parme, ma che al jere inamorât di cheste lenghe, de sô fuarce comunicative.
_
La prime opare par furlan che tu âs scrit cuale ise stade?
Simpri Elio Bartolini mi à proponût di voltâ par furlan la serie animade di Berto Lôf, che e je stade la prime volte che la Rai regjonâl e à trasmetût une opare par furlan. Po dopo o vin pensât a un lavôr su lis filandis. No vevin decidût in ce lenghe fâlu, ma dopo vê scrit lis primis trê pagjinis si sin rindûts cont che al veve di jessi par furlan, e al è vignût fûr «Bigatis: storie di donne friulane in filanda». Ma il moment li che il furlan mi è vignût fûr in maniere plui prepotente e naturâl al è stât cuant che o voltât e adatât «Maratona di New York».
_
Tu âs studiât il teatri par furlan ancje dal pont di viste storic: ce carateristichis aial?
No vin vût i Pirandello o i De Filippo, ma al à une tradizion dramaturgjiche salde. E in particolâr cun autôrs che a àn savût contâ la cundizion sociâl di chenti, za tal Votcent: Giuseppe Edgardo Lazzarini, Carlo Favetti, un gurizan che al scriveve cuintri de dominazion austriache par une identitât furlane, Ercole Carletti. Di chei a vegnin fûr dopo i grancj autôrs tant che Siro Angeli, Alviero Negro, Renato Appi, Gianni Gregoricchio, Candoni e vie indevant.
_
Mi fâstu il non di un to mestri dal pont di viste dal pinsîr “ideologjic”?
O ai di dî che la idee di Friûl, il mût di lei la sô storie e la sô culture che al veve Elio Bartolini mi à simpri colpît une vore.
Nol jere furlan di nassite, ma al jere cressût di piçul indenant chenti. Il so lâ vie dal Friûl di une bande i faseve sintî la sô mancjance, di chê altre i veve permetût di cjalâlu di fûr. Chest ti jude a formâti une vision critiche indispensabile pe cressite di une culture, di une lenghe, di un popul. Cun di plui, fate cun chê ironie tipiche di Elio. Si sintive atrat dal Friûl ancje di Milan o Rome, ma al viodeve ancje lis sôs contradizions. Par esempli fevelâ di Friûl esaltantlu par cemût che al jere, e no par chel al è daûr a deventâ. Fevelâ cun lui di cheste vision lu ricognòs come un passaç fondamentâl pe mê cressite.
_
E cualchi non di personis che, oltri che par te, a àn savût rapresentâ il Friûl in gjenerâl?
Il prin non che mi ven al è Giovanni Minut, sindacalist, poete e po dopo imprenditôr, che al à fat alc pe sô tiere tal sociâl doprant la lenghe furlane par fâlu. Po dopo Pasolini, che nus insegne che il Friûl al è un puest che al lote simpri (o al prove) cuintri de omologazion. Cheste e je une carateristiche biele de storie furlane, ancje di une part dal Friûl di vuê. Un altri al è Giacomo Ceconi, deventât un dai plui grancj imprenditôrs edîi te Europe dal Votcent che al à contribuît a creâ chê imagjin di furlan che, partint dal bas, cul lavôr al rive al obietîf.
_
Se no ti plâs la peraule ideologjie, clamìnle filosofie… Tu ce ti sintistu? Furlanist, autonomist, indipendentist… E ce aspirazion varessistu pal Friûl?
Jo mi sint furlan fin te anime, ma che al cjale il mont. O soi furlanist tal sens che il Friûl al è un toc di mont che al à di savê la sô carateristiche, e metile a confront cun ce che al è ator di lui. La mê aspirazion e je che al resti un puest che al cîr di resisti ae omologazion.
_
Ce puest aie la storie dal Friûl par inventâ storiis come che tu fasis tu? E dulà ti documentistu, cuâi sono autôrs impuartants?
La storie e je impuartante di savê parcè che nus mostre moments li che al è stât fat un pas just e li che al è stât fat sbaliât, e tu puedis doprâ cheste cognossince. Par documentâmi o ai let un pôc di dut: pre Bepo Marchet, Gianfranco Ellero, Pier Silverio Leicht… Ma une robe impuartante e je sgarfâ tes bibliotechis e tai archivis, li che e je la storie reâl, no filtrade dai autôrs. Une leture che o consei al è un librut piçul di Tito Maniacco: «L’ideologia friulana: critica di un immaginario collettivo». Un libri che al provoche domandis.
_
Personaçs o esperiencis culturâls che a àn rivât a incidi su la storie o culture dal Friûl?
Mi fermi su esperiencis contemporaniis: Onde Furlane e je une testemoneance de cussience de culture furlane, «Suns» al è un festival bielon che ti mostre une vision amplie pe realtât des minorancis. Il prin festival che al à fat il Teatri Stabil Furlan «Lenghis» a Gurize capitâl de culture li che o vin vût mût di viodi cemût che a lavorin chês altris minorancis intal cjamp teatrâl.
Lant plui indaûr te storie, la racuelte di firmis par vê la Universitât dal Friûl, e po dopo o met ancje la scjalade sportive dal Udin de Serie C ae Serie A.
_
Tal sport isal cualchi non che al à savût mostrâ il caratar furlan?
Dal sigûr Dino Zoff, che al mostrât un mût di jessi che al ven fûr des lidrîs de societât furlane.
_
Stant che tu âs citât «Suns», cualchi non pe musiche…
Mi plâs citâ Gigi Maieron, Lino Straulino e Doro Gjat che al à savût vierzi il Friûl a un model no nome di “cjançon di autôr”.
__
Ultime domande, un personaç o opare che par te al varès di jessi valutât di plui.
Dal sigûr Luigi Candoni, cjargnel leât di simpri al Friûl. La sô straordenarie ativitât teatrâl le à vivude a Rome, dulà che al è stât il prin a puartâ in Italie il Teatro dell’assurdo (Beckett e daspò Ionesco, Genet, Pinter). Al scrîf par talian, ma al fâs cognossi a dute la Italie la realtât crude de Cjargne cun «Desiderio del Sabato sera» e intal 1974, pôc prime di murî, al scrîf un test teatrâl straordenari par furlan, «Strissant vie pe gnot (Caino)», une cuintristorie moderne de Bibie. Tra il 1970 e il ‘74 al scombat pe Universitât dal Friûl e par un Teatri Stabil Furlan, distacât di chel di Triest. Lu fâs cuntun coragjo incredibil savint che cheste bataie i tirarà cuintri un grum di nemîs. Chei che dopo la sô muart a àn contribuît a fâlu dismenteâ. ❚
:::::::::::::::::::::::::::::::::::::::::::::::::::::::::::::::::::::::::::::::
FOCUS. Il personaç
GIUSEPPE EDGARDO LAZZARINI (Udin, 1832 – Udin 1883)
Al fo avocat e scritôr tra i plui atîfs dal panorame culturâl furlan dal Votcent. Dopo de lauree in jurisprudence a Padue (1856), al esercità la profession, soredut a Tumieç, risaltant ancje in causis di impuartance civîl e politiche. Tal cjamp juridic al fasè discuti la publicazion dal saç Della necessità del divorzio come legge civile.
Insiemi ae cariere legâl al svilupà une produzion leterarie tant grande, in particolâr tal teatri. Dopo un prin sucès cun oparis par talian – cumò dismenteadis – al cjatà tal furlan il cjamp plui fertil e plui indurant de sô ativitât. Al è calcolât, adun cun Francesco Leitenburg, il plui grant protagonist dal teatri furlan dal Votcent.
Al componè cetantis comediis par furlan, tra chestis Malis lenghis, La sdrondenade, Il vêncul e In Germànie!, stimadis pe lenghe sclete, pai dialics svelts e pe rapresentazion vive de societât e des tradizions popolârs. I siei tescj a metin in sene caratars ricognossibii e sintiments elementârs, cun tramis semplicis e fins morâi educatîfs. Ancje se cun cualchi limit struturâl, il so teatri al ve une grande fortune di public e al segnà une tape fondamentâl te storie de dramaturgjie furlane. ❚
