Lis elezions in Ongjarie e Bulgarie. Une gnove Vierte de Europe?

La gnove Vierte in Europe e à tantis musis diferentis, jenfri cuistions politichis di diviers gjenar e conessions tra sport, lenghis, dirits, autoguvier e identitâts. In cheste suaze, cence dismenteâ la crisi internazionâl che e je devantade ancjemò plui grivie dopo dal atac al Iran de bande dai Stâts Unîts (USA) e di Israêl e che il so impat al va dilunc a jessi une vore pesant, a àn clamât dongje in maniere pardabon rilevante la atenzion di chê che si pues calcolâle la opinion publiche europeane lis elezions politichis che si son davueltis un Ongjarie ai 12 di Avrîl e in Bulgarie la domenie seguitive.
◆ Al jere clâr za di timp che, intal contest de Union Europeane (UE), i doi apontaments eletorâi a jerin – e a saressint stâts – impuartants ancje a nivel continentâl. In particolâr e jere une grande spiete par ce che al sarès saltât fûr des urnis ongjaresis. Saressial restât ancjemò al podê Viktor Orbán, dal 2010, par sedis agns, ae vuide dal guvier di Budapest, o si varessial vût un mudament? E trop radicâl varessial podût jessi?
◆ Dai 13 di Avrîl si pues dî che alc al è par sigûr cambiât, stant che Orbán e il so partît, Fidesz, cundut de poie esplicite (o forsit propit par vie chê…) dal president e dal vice president dai USA e dai leaders di sù par jù ducj i partîts di diestre dai diviers Stâts europeans, tacant di chei talians, a àn pierdût, stant ch a àn cjapât dome il 38% dai consens e par chel a àn dome 52 seçs in parlament. Il vincidôr al è Péter Magyar, che dal 2002 al 2024 al à fat part di Fidesz e al è stât une vore dongje dal premier che al à pierdût lis elezions e doi agns indaûr si è slontanât di lui, metint dongje il moviment politic «Talpra, Magyarok!» (che al vûl dî sù par jù «Impins, Ongjarês») e po jentrant in Tizsa, il «Partît dal rispiet e de libertât»), fuarce politiche fondade tal 2020, cuntun profîl di centridiestre, che tes ultimis elezions al à rivât a cjapâ ducj i vôts dai oposidôrs, comprendûts chei di çampe e centriçampe, che tes schedis no àn cjatât nissun dai partîts di riferiment, stant che chei stes a vevin decidût di poiâ Tisza. Cun sù par jù il 53% dai vôts cjapâts, daûr de leç eletorâl che e garantìs un fuart premi di maiorance, il gnûf guvier al gjolt de poie di 141 parlamentârs (i doi tierç dai 200 seçs totâi). Magyar al à vinçût presentantsi tant che une alternative ae cussì clamade “democrature” orbaniane e a chel sisteme di podê, palesant un ategjament almancul euroconformist, diferent dal eurosetisisim, deventât antieuropeisim, dal so antagonist, e duncje segnât di un dialic gnûf cun Brussel e di une relative revision de posizion ongjarese in cont dai siei rapuarts cu la Russie.
◆ Ai 19 di Avrîl si à votât ancje in Bulgarie. Ancje achì, compagn che in Ongjarie, il risultât al è lât daûr di ce che si spietavisi, almancul intes ultimis setemanis prime des elezions, e al è cressût in gjenarâl il numar dai votants. Al à vinçût Rumen Radev, che tal mês di Zenâr stât si veve dimetût de cjarie di President de Republiche juste cun chê di meti dongje un partît gnûf, clamât «Bulgarie progressiste», e cjapâ part al vôt… par vinci. Cuntune propueste politiche marcade di une cierte atenzion pes cuistions sociâls e di un antagonisim declarât cuintri de coruzion, Radev al à cjapât il 44,5% dai vôts che i permetin di vê 130 dai 240 seçs in parlament. I conservadôrs de coalizion conservadore GERB-UDF, leade al ex premier Boiko Borissov, e i liberaldemocratics di WCC-DB a àn cjapât il 13,5% e al 12,8% dai consens. La sô afermazion e je viodude de bande di diviers osservadôrs cuntune cierte preocupazion, parcè che al ven calcolât «filorùs». Saraial propit cussì? ❚